ජනාධිපතිවරයාගේ විධායක බලතල කප්පාදු කරමින් ස්වාධීන කොමිෂන් සභා ඇති කරන ලද 19 වන ව්‍යවස්ථා සංශෝධනය අහෝසි කර දැමීමට උත්සාහ දරන වත්මන් ආණ්ඩුවේ ඇමැතිවරයෙක් එම පනතේ ගුණ වයා තිබේ.
දහනව වන ව්‍යස්ථා සංශෝධනය හරහා හිටපු ජනාධිපතිවරයාගේ ධුර කාලය වසර පහකට සීමා වීම එම ව්‍යස්ථා සංශෝධනය හරහා රටට ලැබුණු එකම හා ලොකුම ජයග්‍රහණය බවයි රාජ්‍ය අමාත්‍ය කාංචන විජේසේකර පෙන්වා දෙන්නේ.
“මම දකිනවා 19න් එක හොඳ දේකුත් වුනා. අවුරුදු හයට පත් වෙච්චි මෛත්‍රීපාල සිරිසේන මහත්තයා අවුරුද්දක් කලින් ගෙදර යවන්න ලැබීමම 19න් ලබපු ලොකුම ජයග්‍රහණය හැටියට අපි දකිනවා.” යි ඇමැතිවරයා 26 ඉරිදා මාතර පැවති ජන හමුවකදී කියා සිටියේය.
හිටපු ජනපති මෛත්‍රීපාල සිරිසේන තවත් වසරක් රට පාලනය කළේ නම් රටට අත්වන ඉරණම සිතාගත නොහැකි බව රාජ්‍ය අමාත්‍යවරයා ප්‍රකාශ කරන්නේ.
ජනාධිපතිවරයා හා ආරක්ෂ අංශ ප්‍රධානීයා ලෙස තම වගකීම හිටපු ජනපති මෛත්‍රීපාල සිරිසේන හරියාකාරව ඉටු නොකළ බව කී කාංචන විජේසේකර ඇමැතිවරයා නායකයෙක් නොකරන ආකාරයට ඔහුගෙ වගකීම් වෙනත් අයට පැවරූ බවට චෝදනා කළේය.
හිටපු ජනපති මෛත්‍රීපාල සිරිසේන නැවත වරක් පාර්ලිමේන්තුවට පැමිණ රටට දිය හැකි දායකත්වය කුමක් දැයි තමන්ට නොතේරෙන බවද ඇමැතිවරයා වැඩි දුරටත් කියා සිටියේය.
Facebook Comments
