ජනාධිපතිවරයා විසින් පත්කරන ලද මුල්ම කොමිසමක් අධිකරණ ක්‍රියාවලිය සම්බන්ධයෙන් නියෝග දීමට යාම නීතිපතිවරයා සමඟ ගැටුමකට මග පාදා තිබේ.
හිටපු නාවික හමුදාපති, අද්මිරාල් ඔෆ් ද ෆ්ලීට් වසන්ත කරන්නාගොඩ සහ හිටපු නාවික හමුදා මාධ්‍ය ප්‍රකාශක රියර් අද්මිරාල් ඩී.කේ.පී. දසනායක ඇතුළුව 14 දෙනෙකුට විරුද්ධව කෙළඹ ඇතුළු තදාසන්න ප්‍රදේශ වලින් 11 දෙනෙකු පැහැරගෙන ගොස් අතුරුදහන් කිරීමට අදාළව ගොනු කර ඇති නඩු විභාගය ඉදිරියට නොපත්වන ලෙස දේශපාලන පළිගැනීම් පිළිබඳව පරීක්‍ෂා කොට කොට තොරතුරු ලබාගැනීම සඳහා පත් කළ ජනාධිපති පරීක්ෂණ කොමිසම දෙන ලද නියෝගයත් සමඟ මෙම මතබේදය හට ගෙන ඇත.
කොමිසන් සභාව විසින් දුන් ලිඛිත නියෝගයට පෙරළා පිළිතුරු යවා ඇති නීතිපති දප්පුල ලිවේරා අධිකරණයේ විභාග වන නඩු කටයුත්තක් සම්බන්ධව නිර්දේශ හෝ නියෝග ලබා දීමට පරීක්ෂණ කොමිසන් සභාවකට බලයක් නොමැති බව දන්වා ඇතැයි නීතිපතිවරයාගේ සම්බන්ධීකරණ නිලධාරිනි නිෂාරා ජයරත්න මාධ්‍ය වෙත පවසා තිබේ.
හිටපු නාවික හමුදාපතිවරයා හා හිටපු නාවික හමුදා මාධ්‍ය ප්‍රකාශක විසින් තමන්ද සැකකරුවන් ලෙස නම් කර ඇති නඩුව සම්බන්ධව ජනාධිපති කොමිසන් සභාවට පැමිණිළි කර ඇත්තේ ඒ හරහා තමන් දේශපාලන පළි ගැනීමට ලක්ව ඇති බවයි.
එම පැමිණිල්ල සලකා බැලු ජනාධිපති කොමිසන් සභාව පැමිණිල්ල විභාග කර නියෝගයක් හෝ නිර්දේශයක් ලබා දෙන තෙක් අදාළ නඩුව මහාධිකරණයේ පවාත්වාගෙන යාමට නීතිපතිවරයා හෝ ඔහුගේ බලතල සහිත කිසිදු නිලධාරියකු විසින් සිදු නොකළ යුතු බවට කොමිසන් සභාව ඒකමතිකව තීන්දු කළ බව නිවේදනය කර තිබුනි.
ගෝඨාභය රාජපක්ෂ ජනාධිපති ධුරයට පත්වීමෙන් පසුව පිහිටවු පළමු කොමිසම මෙය වන අතර 2015 ජනවාරී 08 වැනිදාත් 2019 නොවැම්බර් 16 වැනිදාත් අතර කාලය තුළ සිදුවී ඇතැයි කියන දේශපාලන පළිගැනීම් පිළිබඳව පරීක්‍ෂා කොට කොට තොරතුරු ලබාගැනීම සඳහා කොමිසම පත් කරන ලදී.
විශ්‍රාමික ශ්‍රේෂ්ඨාධිකරණ විනිසුරු උපාලි අබේරත්න (සභාපති) විශ්‍රාමික අභියාචනාධිකරණ විනිසුරු චන්ද්‍රා ජයතිලක හා විශ්‍රාමික පොලිස්පති චන්ද්‍රා ප්‍රනාන්දු යන අයවලුන් මෙම කොමිසමේ සමාජිකයින් ලෙස කටයුතු කරනු ලබයි.
Facebook Comments
