සාමසාධක රාජකාරි සඳහා බටහිර අප්‍රිකාවට යවා සිටින ශ්‍රී ලංකා භට කණ්ඩායමේ අණ දෙන නිළධාරීයා එක්සත් ජාතීන්ගේ ඉල්ලීමට අනුව නැවත මෙරටට ගෙන්වා ගන්නා බවට ශ්‍රී ලංකා යුද හමුදාව පවසයි.
මානව හිමිකම් උල්ලංඝනය කර ඇති බවට චෝදනා එල්ලවී ඇති ලුතිනන් කර්නල් කලණ ප්‍රියංකර අමුණුපුර ආපසු කැඳවා ඇපෑලක් ඉදිරිපත් කර ඔහු නැවත මාලි රාජ්‍යයට සාමසාධක බලකායේ රාජකාරි සඳහා යැවීමට බලාපොරොත්තු වන බවයි යුද හමුදා මාධ්‍ය ප්‍රකාශක බ්‍රිගේඩියර් සුමිත් අතපත්තු පෙන්වා දෙන්නේ.
ශ්‍රී ලංකා යුද හමුදාව හෝ මෙම ලුතිනන් කර්නල්වරයා කිසිඳු මානව හිමිකමක් උල්ලංඝනය කර නැතැයි පවසන යුද හමුදා ප්‍රකාශක එම නිලධාරියා මීට පෙරද මාලි රාජ්‍යයේ සාම සාධක කටයුතු වල නිරත වු බව කියා සිටියේය.
මාලියේ එක්සත් ජාතීන්ගේ සාමසාධක බලකායේ (MINUSMA) ශ්‍රී ලාංකික භට කණ්ඩායමේ අණදෙන නිලධාරියාගේ අතීත මානව හිමිකම් චර්යාව විමර්ශනය කිරීමෙන් අනතුරුව ඔහු ආපසු යවන්නට තීරණය කරන ලද බව එජා මහලේකම්වරයාගේ ප්‍රකාශක ස්ටීවන් දුජාරික් 19 සිකුරාදා නිව්යෝර්ක් නුවරදී මාධ්‍යවේදීන්ට දැනුම් දුන්නේය.
ඔහු සම්බන්ධයෙන් මෑතදී ලැබුනු තොරතුරු තීරණය ගැනීමට හේතුවූ බව ඔහු වැඩිදුරටත් කියා සිටියේය.
ලුතිතන් කර්නල් අමුණුපුර හා දෙවැනි අණදෙන නිළධාරි මේජර් හසන්ත හැන්නදිගේ නායකත්වයෙන් යුත් සෙබළුන් 200ක පිරිසකගෙන් සමන්විත සංග්‍රාමික රථ ආරක්ෂක ඛණ්ඩයක් මාලි බලා ගියේ මේ වසර මුලදීය.
ලුතිනන් කර්නල් කලණ ප්‍රියංකර ලංකාමිත්‍ අමුණුපුර ආපසු කැඳවා ගැනීමේ වියදම දරනු ඇත්තේ ශ්‍රී ලංකාවේ රජයයි.
Facebook Comments
