යුද හමුදාපතිවරයා සිය ධුරය අහිමි වීමේ අවදානමට මුහුණ පා සිටින බව එක්සත් ජාතික පක්ෂයේ නීතිවේදී මන්ත්‍රීවරයකු ප්‍රකාශ කර තිබේ.
පොහොට්ටු පක්ෂයේ ජනාධිපති ධුර අපේක්ෂක ගෝඨාභය රාජපක්ෂගේ දැන්වීමකට යුද හමුදාපතිවරයා නිල ඡායාරූපයක් හා ප්‍රකාශයක් ලබා දීම ඊට හේතුව බවයි අමාත්‍ය අජිත් පී පෙරේරා පෙන්වා දෙන්නේ.
“මෙවැනි බරපතල වැරදි කරපු අවස්ථා වලදි මීට කලින් රටේ මැතිවරණ නීතිය ක්‍රියාත්මක වෙලා ඒ ධුර දරන පුද්ගලයන්ගේ ධුර අහිමි වෙලා තියෙනවා,” යි නීතිඥවරයා 14 සඳුදා එම දැන්වීම පිලිබඳ මැතිවරණ කොමසාරිස් වෙත පැමිණිළි කිරිමෙන් අනතුරුව කියා සිටියේය.
හිටපු හමුදාපතිවරුන් කිහිප දෙනෙකුගේ හා වත්මන් යුද හමුදාපති ශවේන්ද්‍ර සිල්වා නිල ඇඳුම සහිත ඡායාරූප සමඟ ඔවුන් කරන ලද ප්‍රකාශයන් කිහිපයක් උපුටා දක්විමින් ගෝඨාභය රාජපක්ෂගේ මැතිවරණ දැන්වීමක් සති අන්ත පුවත්පත් වල පළ කර තිබුනි.
එම දැන්වීම මැතිවරණ නීති උල්ලංඝනයක් බව විකල්ප ප්‍රතිපත්ති කේන්ද්‍රයද මැතිවරණ කොමසමට කළ පැමිනිල්ලකින් පෙන්වා දී ඇත.
ෆිල්ඩ් මාර්ෂල් සරත් ෆොන්සේකා හට අනාගත රජයේ නීතිය හා සාමය අමාත්‍ය ධුරය ලබා දෙන බවට ජනපති අපේක්ෂක සජිත් ප්‍රේමදාස කරන ලද ප්‍රකාශය හේතුවෙන් කලබලයට පත් පිරිස් මෙසේ මෙම දැන්වීම පළ කරන්නට ඇති බවටයි අමාත්‍ය අජිත් පී පෙරේරා විශ්වාසය පළ කරන්නේ.
ලංකාවේ තීන්දු වු මැතිවරණ පෙත්සම් වල මුලධර්ම සලකා බැලිමේදී ජන්දය ජය ගන්නා අපේක්ෂකයකුගේ ජයග්රාහණය නිෂ්ප්‍රභ කළ හැකි තරමේ වරදක් ගෝඨාභය රාජපක්ෂ මෙම දැන්වීම හරහා සිදු කර ඇති බවට නීතිඥ අජිත් පී පෙරේරා අමාත්‍යවරයා වැඩි දුරටත් අවධාරණය කළේය.
රාජපක්ෂ පාලන සමයේ යුද අපරාධ සම්බන්ධයෙන් චෝදනා ලබන 58 සේනාංකයට අණ දුන් ලුතිනන් ජනරාල් ශවේන්ද්‍ර සිල්වා හමුදාපති ධුරයට පත් කිරීම එක්සත් ජාතීන්ගේ ද දැඩි දෝෂ දර්ශණයට ලක්වු අතර ශ්‍රී ලංකාවේ හමුදා සේනාංක සාම සාධක හමුදාවට එක් කර ගැනීමද නතර විය.
Facebook Comments
