පටු දේශපාලන අරමුණු වෙනුවෙන් ජාතින් අතර ගැටුම් නිර්මාණය කළ දේශපාලනඥයන් වෙනුවට, සංහිඳියාව වෙනුවෙන් කැපවන නායකයන් බිහි වී ඇති බව මුදල් හා ජනමාධ්‍ය අමාත්‍යවරයා පවසයි.
ඉතිහාසයේ ප්‍රථම වරට සංහිඳියාව පිළිබඳ අමාත්‍යාංශයක් පිහිටුවමින් සංහිඳියාව යථාර්ථයක් බවට පත් කිරීමේ කාර්යයට ආණ්ඩුව උර දී ඇති බව පවසන මංගල සමරවීර ඇමැතිවරයා එය ලෝකයට ප්‍රබල පණිවුඩයක් බවයි පෙන්වා දෙන්නේ.
“ජාතීන් ජාතීන් හප්පපු දේශපාලනය වෙනුවට අද අපේ ජනාධිපතිතුමා ඉතිහාසයේ ප්‍රථම වතාවට සංහිඳියාව සම්බන්ධයෙන් අමාත්‍යාංශයක් පිහිටුවලා ඒ අමාත්‍යාංශයත් තමන්ගෙ යටතේ තබා ගැනීම මම හිතන්නෙ ලෝකයට ප්‍රබල පණිවිඩයක් වුණා.” යැයි ශ්‍රී ලංකා රූපවාහිනි සංස්ථාවේ නව දෙමළ නාලිකාව වන “සංහිඳියා නාලිකාවේ“ විකාශ සමාරම්භක උත්සවයට 20 අඟහරුවාදා එක්වෙමින් අමාත්‍යවරයා කියා සිටියේය.
නිදහස ලබා ගැනීම සඳහා ලාංකිකයන් හැටියට සිංහල දෙමළ මුස්ලිම් බර්ගර් මැලේ කියන සියලු ජාතීන් සහ ඔවුන්ගේ නායකයන් එක්ව සටන් කල බව සිහිපත් කල මංගල සමරවීර ඇමැතිවරයා “අපේ අවසනාවට අපි ජාතින්, ආගම්, කුල, දේශපාලන වශයෙන් වෙන් වෙලා කුළල් කා ගත්තා. අවසානයේ අවුරුදු 30කට ආසන්න කාලයක් තිස්සේ ඇදී ගිය යුද්ධයකට මූණ පෑවා. තරුණ කැරලි දෙකකට මුහුණ පෑවා” යි කියා සිටි අතර එම හේතුව නිසාවෙන් රට ආපස්සට යමින් තිබු බව ප්‍රකාශ කළේය.
එවන් අවස්ථාවක රට බාරගත් ජනාධිපති මෛත්‍රීපාල සිරිසේන නිදහස ප්‍රජාතන්ත්‍රවාදය නොමැති වීම නිසා පමණක් නොව රටේ පසුබෑමට ජාතීන් අතර සංහිඳියාව නැති වීම ප්‍රධාන හේතුවක් වු බව වටහා ගත් බවයි ඇමැතිවරයා පෙන්වා දුන්නේ.
වත්මන් අගමැතිවරයා සහ ජනාධිපතිවරයා තරම් ජාතික ප්‍රශ්නය විසඳීමට මින් පෙර සිටි කිසිඳු නායකයෙකු උනන්දු නොවු බව කී මංගල සමරවීර අමාත්‍යවරයා දෙමළ සංහිඳියා නාළිකාවද ජනපතිගේ සංකල්පයක් බව හෙළි කළේය.
“මම දන්න විදියට අපේ ජනාධිපතිතුමා මේ ගෙවුණු කාලෙට 17වතාවක් උතුර නැගෙනහිර සංචාරය කරල තියෙනවා. අගමැතිතුමා 9 වතාවක් ඒ ප්‍රදේශවලට ගිහින් තියෙනවා. මීට පෙර කිසිම රාජ්‍ය නායකයෙක් මේ ගැටලුව විසඳන්න මේ තරම් උනන්දු වෙලා නෑ. මේ අද ආරම්භ වන නාලිකාවත් සංහිඳියා විෂය භාර ජනාධිපතිතුමාගේ ම අදහසක් බවත් අපි මතක් කරන්න ඕනෙ.”
උතුරේ සිටින දෙමළ ජනතාව අදටත් නරඹන්නේ දකුණු ඉන්දියාවේ නාලිකා බව පෙන්වා දුන් මුදල් හා ජනමාධ්‍ය අමාත්‍ය මංගල සමරවීර නව නාළිකාව හරහ ඒ තත්ත්වය වෙනස් වී සංහිඳියාව කරා යන ගමනට විශාල පදනමක් වනු ඇති බවටයි විශ්වාසය පළ කරන්නේ.
Facebook Comments
