බාරවු අයගේ තොරතුරු හමුදාවෙන් ගන්න අමාරුයි

0

යුද්ධවසානයේ ශ්‍රී ලංකා යුද හමුදාවට බාරවීමෙන් අනතුරුව ආගිය අතක් නැතියවුන් සොයාගැනීම සම්බන්ධයෙන් අතුරුදහන් වුවන් පිළිබඳ කාර්යාලයට (OMP) දුෂ්කරතා මතුවී තිබේ.

බාරවී අතුරුදහන් වුවන්ගේ ලැයිස්තු ඉදිරිපත් කරන ලෙස ඥාතීන් ඉල්ලා සිටියත් ඒවා ලබා ගැනීමේ අසීරුතාව OMP ප්‍රධානි නීතිඥ සාලිය පීරිස් විසින් හඳුන්වන ලද්දේ “යතාර්ථය” ලෙසිනි.

හැබැයි අපි තේරුම් ගන්න ඕනේ යතාර්ථය තමයි, හැමෝම තොරතුරු ඉල්ලුව ගමන් තොරතුරු දෙන එකක් නෑ. හැබැයි අපිත් ක්‍රමවේද හදාගන්න ඕනේ තොරතුරු ලබාගන්න. යනුවෙන් OMP ප්‍රධානියා ප්‍රකාශ කළේ දකුණේ අතුරුදහන් වුවන්ගේ ඥාතීන් පිරිසක් සමග කොළඹ 7 ලක්ෂ්මන් කදිරගාමර් මධ්‍යස්ථානයේ පැවති රැස්වීමකදීය.

එම තොරතුරු ලබා ගැනීම සඳහා ක්‍රියාදාමයක් ආරම්භ කර ඇති බව OMP ප්‍රධානියා ප්‍රකාශ කළේ යුද හමුදාවෙන් ලබා නොදෙන තොරතුරු ලබා ගැනීම සඳහා එම කාර්යාලයට කළ හැකි මැදිහත්වීම කුමක් දැයි ජගත් සම්මානලාභී මානව හිමිකම් ක්‍රියාධාරිනී සන්ධ්‍යා එක්නැලිගොඩ කළ විමසීමකට පිළිතුරු වශයෙනි.

පුද්ගලයන් අතුරුදහන් කරවීම සම්බන්ධයෙන් චෝදනා ලබා සිටියදීත් සේවයේ යොදවා සිටීම සම්බන්ධයෙන් සන්ධ්‍යා එක්නැලිගොඩ මතුකළ පැනයකට පිළිතුරු දෙමින් සාලිය පීරිස් සභාපති වරයා කියා සිටියේ හමුදා නිලධාරීන්ගේ සේවය අත් හිටුවීම සඳහා OMP අතුරු වාර්තාවෙන් රජයට නිර්දේශ කර ඇති බවයි.

අතුරු වාර්තාව කැබිනට් කමිටුවකට භාර දී තිබෙන ආණ්ඩුව එම නිර්දේශ ක්‍රියාත්මක කරනු ඇති බවට අතුරුදහන් වුවන් පිළිබඳ කාර්යාලයේ සභාපති වරයා විශ්වාසය පල කළේය.

අතුරුදහන් ලැයිස්තුව

බාර දුන් අයගේ නම් ලැයිස්තු තමන් සතුව නොමැති බවට හමුදාපතිවරුන්ගෙන් කළ විමසීමකදී පැවසු බව ජනාධිපති මෛත්‍රීපාල සිරිසේන පසුගිය වසරේ සැප්තැම්බර් මාසයේදී උතුරු නැගෙනහිර අතුරුදහන් වුවන්ගේ ඥාතීන්ට කියා තිබුණි.

කෙසේ වෙතත් ලංකාවේ රාජ්‍ය පාලකයන්ගෙන් හා හමුදාවෙන් ඥාතීන් ඉල්ලා සිටි රජයට බාර දීමෙන් පසු අතුරුදහන් කරවුවන්ගේ ලැයිස්තුවේ නම් තුන් සීයකට ආසන්න සංඛ්‍යාවක් මේ වසරේ මැයි මාසයේදී ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) එළි දක්වන ලදී.

ඇසින් දුටු සාක්ෂිකරුවන් විසින් අතුරුදහන් කරවුවන් මේජර් ජනරාල් ශවේන්ද්‍ර සිල්වා හා ජනරාල් ජගත් ජයසුරිය වෙත බාර ගත් ඇති බවට පවසන ITJP සංවිධානය එම හමුදා නායකන්ගෙන් ප්‍රශ්න කළ යුතු බව OMP වෙත දැන්වු බව නම් ලැයිස්තුව එළි දක්වමින් කියා සිටියේය.

ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) සංවිධානය විසින් එළි දක්වන ලද යුද්ධාවසානයේ හමුදාවට බාර දීමෙන් අනතුරුව අතුරුදහන් කරවුවන්ගේ නම් ලැයිස්තුව පිළිබදව සිය අවධානය යොමුව ඇති බව විදේශ කටයුතු අමාත්‍යංශය නිවේදනයක් නිකුත් කරමින් සඳහන් කළේය.

Facebook Comments