ලංකා මුහුදේ මසුන් මැරීමට අසල්වැසි ඉන්දීය ධිවරයන්ට බලපත්‍රයක් නිකුත් කිරීම සම්බන්ධයෙන් සැලසුම් කිරීමට එරෙහිව මන්නාරම් නගරයේදී දැවැන්ත විරෝධතාවක් පවත්වා තිබේ.
මාර්තු 23 වැනි බ්‍රහස්පතින්දා පැවැති එම විරෝධයට උතුරු පළාතේ ධීවර සංගම් රැසක නියෝජිතයන්ට අමතරව කාන්තා සංවිධාන, සිවිල් සංවිධාන සහ දේශපාලන පක්ෂ වල නියෝජිතයන්ද එක්ව සිටි බවයි පළාත් බද වාර්තාකරුවන් පවසන්නේ.
මෙරට මුහුදේ ඉන්දීය ධිවරයන් සිදු කරන මත්ස්‍ය සම්පත කොල්ලකෑම සපුරා නතර කරන ලෙස රජයට බල කළ උද්ඝෝෂකයන් වීදි පුරා පෙළපාලි ගියේ ඉන්දීය ධිවරයන්ට මෙරට මුහුදේ මසුන් මැරීමට අවසර දීම සම්බන්ධයෙන් සාකච්ඡා පවත්වමින් සිටින බවට විදේශ කටයුතු අමාත්‍ය ජනාධිපති නීතිඥ අලි සබ්රි කළ ප්‍රකාශයට දැඩි විරෝධය පළ කරමිනි.
“අපේ සම්පත් විකුනන්නෙපා, අපේ භුමිය අපිට දියව්,” යනුවෙන් ද සටන් පාඨ හඬ නැගුණි.
උතුරු මුහුදට දිනකට ඇතුල්වන දෙතුන් දහසක් ඉන්දීය යාත්‍රා වළක්වාලීම ශ්‍රී ලංකා නාවික හමුදාවට ‘ප්‍රායෝගිකව කළ නොහැකි නිසා’ එම ධීවරයන්ට බලපත්ර ලබා දීම සඳහා සාකච්ඡා පවත්වමින් සිටින බවට විදේශ කටයුතු අමාත්‍යවරයා පාර්ලිමේන්තුවට දැනුම් දී තිබුණි.
ඉන්දු ලංකා ධීවර ප්‍රශ්නය විසදීමට විදේශ කටයුතු අමාත්‍ය ලෙස ගෙන ඇති රාජ්‍ය තාන්ත්‍රික පියවර කවරේදැයි දෙමළ ජාතික සන්ධානයේ පාර්ලිමේන්තු මන්ත්‍රී චාර්ල්ස් නිර්මලනාදන් මීට ඉහත පාර්ලිමේන්තු සභා වාරයේදී පාර්ලිමේන්තුවේදී ප්‍රශ්න කර සිටියේ දෙරටක් අතර ප්‍රශ්නයක් සම්බන්ධයෙන් කටයුතු කළ නොහැකි යයි ධීවර අමාත්‍ය ඩග්ලස් දේවානන්ද දැනුම් දී ඇති බව පවසමිනි.
” ශ්‍රී ලංකාව සහ ඉන්දීය ධීවරයන්ගේ ප්‍රශ්නය ගැනත් යම් යම් සාකච්ඡා තියෙනවා. මෙම තත්වය තුළ ඉන්දීය ධීවරයන්ට ශ්‍රී ලංකා මුහුදු සීමාවේ ධීවර කටයුතුවල නිරතවීමට අවසර ලබාදෙන ලෙස ඉන්දීය පාර්ශවයෙන් ඉල්ලීමක් කෙරුණා. එහෙම අවසරයක් දුන්නොත් ලංකාවේ මුහුදේ කොච්චර දුරක් එන්න පුළුවන්ද? ඒ බලපත්‍රයේ මුදල් අපේ ධීවරයන්ට දෙන්න පුළුවන්ද? අපේ ධීවරයෝ ඒක පිළිගන්නවද? අපි ඒ ගැන සාකච්ඡා කරගෙන යනවා,” යි විදේශ අමාත්‍ය අලි සබ්රි පිළිතුරු දුන්නේය.
“අපේ ධීවරයෝ අපිට වැදගත්. ඒ වගේම රටවල් දෙක අතර ප්‍රශ්න ඇති කරන්නත් බැහැ. හැබැයි බෝට්ටු 2000, 3000 හැමදාම එනවා. එය පාලනය කළ නොහැකි බව නාවික හමුදාව කියනවා . බලපත්ර නිකුත් කිරීම සඳහා දෙරට අතර ගිවිසුමක් ඇතිකරගැනීම ගැන අපි සාකච්ඡා කරනවා. ඒක පාලනය කරන්න ඕන ඒ රටේ නාවික හමුදාව. මේකෙන් ලැබෙන මුදල අපේ ධීවරයන්ට දුන්නොත් ඒ අයට ප්‍රශ්නයක් නැහැනේ.”
බ්‍රහස්පතින්දා මන්නාරම මහජන ක්‍රීඩා පිටියෙන් ආරම්භ කළ විරෝධතා පෙළපාලියෙන් ” අපේ මුහුදු සම්පත් විනාශය නවත්තන්න, අපේ මුහුදු සම්පත් විකුනන්න එපා, අපේ මුහුද අපිට දෙන්න, අපිව අඬවන්න එපා, ජීවත් වෙන්න ඉඩ දෙන්න” ආදී සටන් පුවරු ප්‍රදර්ශනය කරමින් මන්නාරම රෝහල පාර හරහා නගරයට රැස්වු සිය ගණනක ධීවරයන් එහිදී තව දුරටත් ඉල්ලා සිටියේ උතුරේ ධීවරයන්ගේ ජීවනෝපායට, සෞභාග්‍යයට සහ ආදායමට බලපාන ඉන්දීය ට්‍රෝලර් යාත්‍රාවලට ශ්‍රී ලංකා මුහුදු සීමාවේ ධීවර කටයුතුවල නිරතවීමට අවසර ලබාදීම සම්බන්ධයෙන් අමාත්‍යවරයා කළ ප්‍රකාශය වහාම ඉල්ලා අස්කරගන්නා ලෙසයි.
උතුරේ ධීවරයන් මුහුණ දෙන ගැටළු සම්බන්ධයෙන් නිසි පියවර ගන්නා ලෙස ඉල්ලමින් ජනාධිපති රනිල් වික්‍රමසිංහ වෙත ඉදිරිපත් කිරීම සඳහා සකස් කළ සන්දේශයක් මන්නාරම දිස්ත්‍රික් ලේකම්වරයා වෙත භාර දීමටත් විරෝධතාකරුවන් කටයුතු කර තිබුනි.
මන්නාරම රදගුරු ෆිඩෙලිස් ලයනල් එම්මානුවෙල් ප්‍රනාන්දු හිමිපාණන් ද ධීවර විරෝධයට එක්ව සිටි අතර මන්නාරම නගරයේ සියලුම වෙළෙඳ සැල් වසා දමමින් ව්‍යාපාරික ප්‍රජාවද විරෝධයට සහාය පළ කළ බව පළාත් බද වාර්තාකරුවෝ වැඩි දුරටත් පවසති.
Facebook Comments
