හොර රහසේ වන්නියේ ඉඩම් මායිම් කරන්නේ ආණ්ඩුවම දැයි සැකයක්

වන්නිවාසී දෙමළ පවුල් 200කට ආසන්න පිරිසකගේ කෘෂිකාර්මික කටයුතු සඳහා තිබු සුවිශාල භූමි භාගයක් ප්‍රාදේශිය ඉඩම් බලධාරියා හෝ දැනුවත් කිරීමකින් තොරව හිටි අඩියේ මායිම් ගල් පිහිටුවීම නිසා ගම් වැසියෝ නොසන්සුන්තාවයට පත්ව සිටිති.

දෙමළ ජනතා නියෝජිතයන් මෙන්ම මුලතිව් දිස්ත්‍රික්කයේ ජනයා ඉල්ලා සිටින්නේ සිය භුමියේ හොර රහසේ මායිම් ලකුණු කර එම ඉඩම් බලහත්කාරයෙන් අත්පත්කරගන්නට උත්සාහ ගන්නේ කවුරුදැයි වහා හෙළි කරන ලෙසයි.

එම ඉඩම් මායිම් කිරීමට මාස තුනකට පෙර ප්‍රාදේශීය බලධාරීන් සමග පැමිණි රජයේ මිනින්දෝරුවන් ආපසු හරවා යවන්නට ගම්වාසීන් සමත් වී තිබේ.

පළාත් බද වාර්තාකරුවන් පවසන පරිදි මාර්තු 18 වැනිදා රාත්‍රි කාලයේ මුලතිව් දිස්ත්‍රික්කයේ කෝකිලායි, කොක්කුතොඩුවායි සහ කරුනාට්ටුකේනි යන ග්‍රාම සේවා වසම් තුනට අයත් ඉඩම් අක්කර 2000 කට ආසන්න භුමියක් මැන වෙන් කිරීම සදහා මෙතෙක් හඳුනා නොගත් පිරිසක් මායිම් ගල් යොදා තිබේ.

දශක කිහිපයකට ඉහත දී දෙමළ ජනතාවගේ කෘෂිකාර්මික කටයුතු සදහා වෙන් කර තිබු මෙම ඉඩම් සිංහල ජනාවාසකරණය සදහා ලබා දීමේ සුදානමක් පවතින්නේදදැයි ගම් වාසීන් සමග මාර්තු 20 වැනිදා එම ප්‍රදේශයට ගිය උතුරු පළාත් සභාවේ හිටපු මන්ත්‍රී තුරෙයිරාසා රවිහරන් සැක පළ කර තිබුනි.

මෙම භුමිය පිහිටා ඇත්තේ දෙමළ ජනතාව සිය පාරම්පරික වාසභූමිය ලෙස උරුමකම් කියන උතුරු නැගෙනහිර යාවෙන ප්‍රදේශය ඇතුළු කොටගෙන අසුව දශකයේ සිට පිහිටුවන ලද සිංහල ජනාවාසවලට යාබදවය.

යුද්ධයෙන් පසු දෙමළ ජනතාවගේ ඉඩම් අත්පත් කරගැනීමේ යෙදී සිටින වනජීවී දෙපාර්තමේන්තුව, පුරාවිද්‍යා දෙපාර්තමේන්තුව, වන සංරක්‍ෂණ දෙපාර්තමේන්තුව හෝ මහවැලි සංවර්ධන අධිකාරිය මේ රහසිගත මායිම් ලකුණු කිරීමේ නිරත වී සිටිනවාදැයි ගම් වැසියන් සැක මතු කර තිබේ.

තුරෙයිරාසා රවිහරන් හිටපු පළාත් සභා මන්ත්‍රීවරයා පවසන පරිදි 1970 දශකයේදී දෙමළ පවුල් 190 ක ජනතාවට ගොවිතැන් කටයුතු කිරීම සදහා එක් පවුලකට අක්කර 10 බැගින් ඉඩම් අක්කර 1900 ක භුමියක් රජය විසින් ලබා දී තිබේ.

බලපත්‍ර සහිතව රජය විසින් එම ඉඩම් ලබා දුන් අතර 1940 න් පසු පවුල් කිහිපයකට එම ඉඩම් සදහා ඔප්පු පැවැති බවටත් තොරතුරු ඇති බවයි ඔහු වැඩි දුරටත් පවසන්නේ.

ගම් වැසියන් පවසන පරිදි 1984 දෙසැම්බර් 02 දින නිරායුධ දෙමළ වැසියන් 32 ක් මුලතිව් ඔදියමලෙයි ග්‍රාමීය සංවර්ධන ශාලාවට කැදවා වෙඩි තබා ඝාතනය කළ රජයේ යුද හමුදාව සිය ගම්බිම් අතහැර යන්නට දෙමළ ජනයාට බල කර තිබේ.

ඒ එම ගම්මාන වල එල්.ටී.ටී. ඊ සාමාජිකයන් සැගව සිටින බවට ජනතාව බිය ගන්වමිනි.

ඔදියමලෙයි ජන සංහාරය 1984 දෙසැම්බර් මුල සිට දෙසතියක් තුල මුලතිව්-ත්‍රිකුණාමලය දිස්ත්‍රික්ක මායිමේ පිහිටි දෙමළ ගම්මාන කිහිපයක් ගොදුරු කරගත් ඝාතන මාලාවකින් එකකි.

කෝකිලායි, තෙන්නමරවාඩි, අමරවයල්, කොක්කුතුඩුවායි, අලම්පිල්, නයාරු, කුමුලමුනෙයි සහ මනලාරු ප්‍රහාරයට ලක්වූ අනික් දෙමළ ගම්මානයි.

මේ ජනඝාතන වල අරමුණ වූයේ සිංහල ජනාවාසකරණය බව එවක පාර්ලිමේන්තුවේ සිටි ද්‍රවිඩ එක්සත් විමුක්ති පෙරමුණු මන්ත්‍රීවරු පෙන්වා දුන්හ.

මෙම සමූහ ඝාතන සමයේ ප්‍රදේශයේ සේනාංකාධිපති ලෙස අණ දුන්නේ පසුව මේජර් ජනරාල් පදවි ලද බ්‍රිගේඩියර් ජානක පෙරේරාය. ප්‍රහාරයෙන් පසුව පිහිටුවන ලද එක් සිංහල ජනාවාසයක නම ජානකපුරයි.

තම මුල් ගම්බ්ම් අත්හැර යාමට බල කෙරුනු කොක්කිලායි, කොක්කුතොඩුවායි සහ කරුනාට්ටුකේනි ග්‍රාමසේවා වසම් වල දෙමළ වැසියන් යුද්ධය නිමා වීමෙන් පසු 2010, 2011 සහ 2012 යන වසර වල ආපසු තමන් පදිංචිව සිටි මුල් භුමිය නවාතැන් කරගත්තත් තමන් පෙර වගා කටයුතු වල යෙදුන අක්කර 1900 ක භුමියේ වගා කටයුතු සදහා යුද හමුදාව, වන සංරක්ෂණ දෙපාර්තමේන්තුව සහ මහවැලි සංවර්ධන අධිකාරිය ඉඩ ලබා නොදුන් බව ඔවුහු වැඩි දුරටත් පවසති.

එවැනි පසුබිමක් තුළ 1984 වර්ෂයෙන් පසුව එම ඉඩම් තුළ වගා කටයුතු කිරීම වෙනුවෙන් තමන්ට කිසිම අවස්ථාවක් හිමි නොවු බව ගම් වැසියන් අවධාරණය කරන අතර උතුරු පළාත් සභාවේ හිටපු මන්ත්‍රී තුරෙයිරාසා රවිහරන් පෙන්වා දෙන්නේ 2022 දෙසැම්බර් මස 19 වැනි දින මිනින්දෝරු දෙපාර්තමේන්තුව එම භුමිය මැන මායිම් ගල් සවි කිරීමට කටයුතු කළ බවයි.

එම අවස්ථාවේ ප්‍රදේශවාසීන් එම ස්ථානයට පැමිණ මායිම් ගල් සවිකර තිබු කෘෂිකාර්මික ඉඩම් වලට තමන්ට තිබු අතීත සම්බන්ධතාවය පැහැදිලි කිරීමෙන් පසු මායිම් ගල් ජනතාවටම ඉවත් කරගන්නා ලෙස පවසමින් මිනින්දෝරු දෙපාර්තමේන්තුව එම ස්ථානයෙන් පිටව ගිය බව පවසන හිටපු මන්ත්‍රීවරයා වැඩි දුරටත් කියා සිටින්නේ එදින එම ස්ථානයට ග්‍රාම නිලධාරීන්, ප්‍රාදේශිය ලේකම් සහ දිස්ත්‍රික් ලේකම්ද පැමිණ සිටි බවයි.

කරෙයිතුරෙයිපත්තු ප්‍රාදේශිය ලේකම් උමා මහල් පවසන්නේ 2023 වසරේ මාර්තු 18 වැනිදා මුලතිව් දිස්ත්‍රික්කයේ කොක්කිලායි , කොක්කුතොඩුවායි සහ කරුනාට්ටුකේනි යන ග්‍රාම සේවා වසම් තුනට අයත් කෘෂි කාර්මික ඉඩම් වල මායිම් ගල් යෙදීම සම්බන්ධයෙන් තමන් දැනුවත් නොමැති බවයි.

දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාජා ගජේන්ද්‍රන් මන්ත්‍රීවරයා මාර්තු 21 වැනිදා පාර්ලිමේන්තුවේදී සදහන් කර තිබුනේ එම ඉඩම් බලහත්කාරයෙන් පවරා ගැනීමේ උත්සාහයක් දියත් වන බවයි.

“මුලතිව් – කොක්කුතුඩුවායි ප්‍රදේශයේ දෙමළ ජනතාවට අයත් කෘෂිකාර්මික ඉඩම් බලහත්කාරයෙන් පවරා ගැනීමට උත්සාහ කරනවා. මේවා වහා නැවැත්විය යුතුයි. ග්‍රාමසේවයට හෝ ප්‍රාදේශීය ලේකම් කාර්යාලයට නොදන්වා දෙමළ ඉඩම්වලට මායිම් ගල් දැම්මේ කවුද?” මන්ත්‍රීවරයා ප්‍රශ්න කර තිබුනි.

ආරක්ෂක අමාත්‍යංශය, මහවැලි අධිකාරිය, සංචාරක මණ්ඩලය, පුරාවිද්‍යා දෙපාර්තමේන්තුව, වන සංරක්ෂණ හා වනජීවි දෙපාර්තමේන්තු උතුරු නැගෙනහිර දෙමළ ජනයාගේ ඉඩම් බලහත්කාරයෙන් අත්පත්කරගන්නා බවට දිගින් දිගටම චෝදනාවට ලක්ව සිටී.