මාර්තු 20 දා ශ්‍රී ලංකාව පිළිබඳ ජාත්‍යන්තර මූල්‍ය අරමුදලේ (IMF) විධායක මණ්ඩලය ඩොලර් බිලියන 03 ක පමණ විස්තීර්ණ අරමුදල් පහසුකම් (EFF) ලංකාවට ලබා දීමට ගත් තීරණය සම්බන්ධව එහි කළමනාකාර අධ්‍යක්ෂ ක්‍රිස්ටලිනා ජෝර්ජිවා නිකුත් කළ නිවේදනයෙන් කියා සිටින්නේ මූල්‍ය ගැලපීම් සාර්ථක වීමට නම්, බදු පරිපාලනය, රාජ්‍ය මූල්‍ය හා වියදම් කළමනාකරණය මෙන්ම බලශක්ති මිලකරණය පිළිබඳ තිරසාර මූල්‍ය ආයතනික ප්‍රතිසංස්කරණ ඉතා වැදගත් වන බවයි.
එමගින් කළමනාකාර අධ්‍යක්ෂකවරිය ලංකාණ්ඩුවේ බදු ප්‍රතිපත්තිය හා බලශක්තීන්හි මිල ගණන් සම්බන්ධයෙන් කරන ලද ගැලපුම් වල ඇති ‘නිරවද්‍යතාවය’ පිළිබඳව ප්‍රශංසා මුඛයෙන් කතා කරන්නීය. රාජ්‍ය බදු ප්‍රතිපත්තිය ගැන ඇය සඳහන් කරන්නේ ‘ප්‍රගතිගාමී’ බදු ප්‍රතිපත්තියක් ලෙසය.
ලංකාව මුහුණ දී සිටින අවදානම් තත්ත්වය ගැන තම නිවේදනය මගින් අවධාරණය කරන ඇය කියා සිටින්නේ අධික උද්ධමනයත් සංචිත ක්ෂයවී යෑමත්, තිරසාර නොවන රාජ්‍ය ණය බර සහ ඉහළ ගිය මූල්‍ය අංශයේ අවදානම් මධ්‍යයේ ශ්‍රී ලංකාව දැඩි ආර්ථික අවපාතයකට මුහුණ දෙමින් දැවැන්ත ආර්ථික හා සමාජීය අභියෝගවලට මුහුණ දී සිටින බවයි.
ලංකාවේ ආයතන සහ පාලන රාමු සඳහා ගැඹුරු ප්‍රතිසංස්කරණ අවශ්‍ය වී ති‍බෙන බවත්, ශ්‍රී ලංකාව මේ අර්බුදයෙන් ගොඩ ඒමට නම්, ප්‍රතිසංස්කරණ සඳහා ශක්තිමත් භාරකාරීත්වයක් දරාගනිමින් විස්තීර්ණ අරමුදල් පහසුකම් (EFF) මගින් සහාය දක්වන මෙම වැඩසටහන වේගවත්ව සහ කාලෝචිතව ක්‍රියාත්මක කිරීම ඉතා වැදගත් වන්නේ යයි ද ඇය තම නිවේදනයෙන් කියා සිටී.
ජාත්‍යන්තර මූල්‍ය අරමුදලේ ණය පහසුකම ලබා දීමට පසුදා නිකුත් කළ නිවේදනයක, ජාත්‍යන්තර මූල්‍ය අරමුදලේ ලංකාවේ ජ්‍යෙෂ්ඨ දූත මණ්ඩල ප්‍රධානී පීටර් බෘයර් (Peter Breuer) සහ ලංකාවේ දූත මණ්ඩල ප්‍රධානී මෂාහිරෝ නොසාකි (Masahiro Nozaki), අවධාරණය කර තිබේන්නේ දූෂණයට එරෙහි එක්සත් ජාතීන්ගේ සම්මුතියට අනුකූලව දූෂණ විරෝධී නීති රාමු සැකසීම සහ රාජ්‍ය මූල්‍ය පාලන කළමණාකරණය වැඩි දියුණු කරන ප්‍රතිසංස්කරණයන්හි වැදගත්කම ගැනය.
එය අවධාරණය කරමින් මෙම නිවේදනය පෙන්වා දී ඇත්තේ, මේ පියවරයන් තමන් සහාය දක්වන විස්තීර්ණ අරමුදල් පහසුකම් වැඩසටහනේ කේන්ද්‍රීය කුළුනක් වන බවයි. ඒ එසේ වන්නේ ඉන් ලබාගත හැකි දුෂ්කර ජයග්‍රහණයන්ගේ (hard-won gains) ප්‍රතිලාභ ලංකාවේ ජනතාව වෙත සමීප කිරීම සඳහා මේ කර්තව්‍යයන් අත්‍යවශ්‍ය වන නිසා බව ද දූත මණ්ඩල ප්‍රධානීහු තම නිවේදනයෙන් පෙන්වා දී ඇත.
ඒ අනුව, IMF විසින් ශ්‍රී ලංකාවේ දූෂණ සහ මූල්‍ය පාලන දුර්වලතා තක්සේරු කර ප්‍රමුඛතා සහ අනුක්‍රමික නිර්දේශ ලබා දීම සඳහා වෝහාරික පරීක්ෂණයක් පවත්වනු ඇත.
ආර්ථික-පරිපාලන පිළිබඳ එවන් වැඩපිළිවෙලකට IMF විසින් භාජනය කෙරෙන ආසියාවේ පළමු රට ශ්‍රී ලංකාව වනු ඇති බව ද දූතමණ්ඩල නිවේදනයේ වැඩිදුරටත් සඳහන් වේ.
“ශ්‍රී ලංකාව නිදහස ලබා වසර 75 ක කාලය තුළ අපගේ ආර්ථික අනාගතය සඳහා මීට වඩා තීරණාත්මක කාල පරිච්ඡේදයක් තිබී නැතැයි” ජනාධිපතිවරයා ප්‍රකාශ කළ බව ජනාධිපති මාධ්‍ය අංශය නිවේදනය කළේ ය.
මෙම වැඩසටහන මගින් ශ්‍රී ලංකාවට IMF, ජාත්‍යන්තර මූල්‍ය ආයතන (IFIs) සහ බහුපාර්ශ්වික සංවිධාන වෙතින් ඇමරිකානු ඩොලර් බිලියන 7ක් දක්වා මුල්‍ය පහසුකම් ලබා ගැනීමට අවස්ථාව සැලෙසන බව ප්‍රකාශ කරන මෙම නිවේදනය වැඩිදුරටත් සදහන් කරනුයේ ජාත්‍යන්තර මූල්‍ය අරමුදලේ වර්තමාන වැඩසටහන ශ්‍රී ලංකාව යලි ධාවන පථයට අවතීර්ණ වීමක් වනු ඇති බවයි.
එමගින් ජාත්‍යන්තර විශ්වසනීයත්වය යථා තත්ත්වයට පත් කරනු ඇතැයි ද, විදේශ ආයෝජකයින් සඳහා ආකර්ශනීය ගමනාන්තයක් බවට ලංකාව නැවත ස්ථාපිත වන්නේ යයි ද. ප්‍රකාශය අවධාරණය කර තිබේ.
කෙසේ නමුත්, මෙම ණය පහසුකම ලබා දීමට අදාල කොන්දේසි සහ ඊට අදාල කාල සීමා සම්බන්ධයෙන් පැහැදිළි කිරීමක් රජය මගින් නිකුත් කළ නිවේදනයේ දැක්වෙන්නේ නැත.
ඒ සම්බන්ධයෙන් අද පාර්ලිමේන්තුවට කරුණු දක්වා IMF ගිවිසුම සභා ගත කරන බව ජනාධිපති රනිල් වික්‍රමසිංහ විශේෂ වීඩියෝ නිවේදනයකින් කියා සිටියේය.
Facebook Comments
