යාපනයේ බෞද්ධ පින්කමට ගිය ඉහලම හමුදා ලොක්කාට දෙමළ විරෝධය

0

යුද්ධය නිමා වීමෙන් පසුව උතුරේ අළුතින් ගොඩනැගු බෞද්ධ විහාරස්ථානයක ධාතු තැන්පත් කිරීමේ පින්කමක් සඳහා සන්නද්ධ භට පිරිස් පිරිවරා ප්‍රධාන ආරාධිතයා ලෙස පැමිණි ත්‍රිවිධ හමුදාවටම නායකත්වය දෙන නිලධාරියාට එරෙහිව දෙමළ ජනයා වීදි බැස දැඩි විරෝධය පළ කර තිබේ.

යාපනයේ නාවට්කුලියේ ශ‍්‍රී සමිද්ධි සුමන විහාරයට පිවිසෙන ප්‍රධාන මාර්ගයේ මාර්තු 18 වැනි සෙනසුරාදා විරෝධතා දියත් කළ දෙමළ ජනතා නියෝජිතයන් ඇතුළු පිරිස චෝදනා කළේ ජාතිවාදය හා දේශපාලනය කරපින්නාගෙන කටයුතු කරන දෙමළ වර්ග සංහාරයට සම්බන්ධ හමුදා නිලධාරියකු වන ආරක්ෂක මාණ්ඩලික ප්‍රධානි ජෙනරාල් ශවේන්ද්‍ර සිල්වා යාපනයේ සිංහල බෞද්ධ උරුමයන් ස්ථාපිත කිරීම සදහා නොපැමිණිය යුතු බවයි.

“දෙමළ දේශයේ බෞද්ධ විහාරයක් ඇයි?, වර්ග සංහාරක ශවේන්ද්‍ර සිල්වා පිටව යනු, නවතනු-නවතනු, බෞද්ධ කරණය නවතනු, පිටව යනු පිටව යනු හමුදාව පිටව යනු, නාවට්කුලි බෞද්ධ විහාරය බෞද්ධ ආක්‍රමණයේ ලකුණක්, නාවක්කුලිය දෙමළ ජනතාවගේ දේශයයි.” ආදී සටන් පුවරු ප්‍රදර්ශනය කරමින් ඔවුන් විරෝධතාවය දියත් කළේ උත්සවය සඳහා පැමිණි පෙරහර ආ මග පසෙක උද්ඝෝෂණය කරමිනි.

ආරක්ෂක මාණ්ඩලික ප්‍රධානි ජෙනරාල් ශවේන්ද්‍ර සිල්වාගේ ප්‍රධානත්වයෙන් පරිවාර චෛත්‍යයේ ධාතු තැන්පත් කිරිමෙන් අනතුරුව ශ‍්‍රී සමිද්ධි සුමන විහාරයේ ප්‍රධාන චෛත්‍යයේ කොත නිරාවරණය කිරීම සිදුකෙරුනේ මල්වතු පාර්ශවයේ අනුනායක ආචාර්ය නියංගොඩ විජිතසිරි නාහිමියන් ඇතුළු භික්ෂු පිරිසක සහභාගීත්වයෙනි.

ආරක්ෂක මාණ්ඩලික ප්‍රධානියාගේ පැමිණිමට විරෝධතා දැක්වීමට එක්ව සිටි දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාජා ගජේන්ද්‍රන් මාධ්‍ය වෙත කියා සිටියේ නාවට්කුලියේ සැලසුම් සහගතව සිංහල ජනාවාසයක් නිර්මාණය කර බෞද්ධ ආරාමයක් ද පිහිටුවා ඇති අතර එයට සිය විරෝධය පළ කරන බවයි.

දෙමළ ජනතාවට එරෙහිව දැවැන්ත වර්ග සංහාරයක් සිදු කළ එක් හමුදා නිලධාරියකු වන ශවේන්ද්‍ර සිල්වා මෙම බෞද්ධ විහාරස්ථානය වැඳපුදා ගැනීමට පැමිණෙන බවට දැනගන්නට ලැබුන බවත් වර්ග සංහාරයේ අපරාධකරුවන්ට එරෙහිව මෙන්ම දෙමළ භුමියේ බෞද්ධ විහාරයක් ඉදිකිරීමට එරෙහිව විරෝධතාවය දියත් කළ බවත් ඔහු වැඩි දුරටත් පවසා තිබුනි.

යුද්ධයේ අවසාන භාගයේ යුද අපරාධ ඇතුළු බරපතල මානව හිමිකම් උල්ලංඝන කළ බවට පුළුල් ලෙස චෝදනා ලබන 58 සේනාංකයට අණදුන් ශවේන්ද්‍ර සිල්වා එක්සත් ජනපදයේ සංචාර තහනමකට ලක්ව සිටී.

වර්ග සංහාරක හමුදාව උතුරෙන් ඉවත් කළ යුතුයැයි මාධ්‍යවේදීන් හමුවේ කී සෙල්වරාජා ගජේන්ද්‍රන් මන්ත්‍රීවරයා වැඩි දුරටත් අවධාරණය කළේ දෙමළ ජනතාවගේ අයිතිවාසිකම් දිනා ගන්නා තුරු අරගලය දිගටම සිදු කරන අතර උතුරේ සිංහල බෞද්ධකරණය කිසි සේත් පිළි නොගන්නා බවයි.

2009 වසරේදී උතුරේ යුද්ධය නිමා වීමෙන් පසුව දුම්රිය දෙපාර්තමේන්තුව සතු ඉඩමක් බලහත්කාරයෙන් අත්පත්කරගනිමින් නාවට්කුලි ශ‍්‍රී සමිද්ධි සුමන විහාරය පිහිටුවීමේ වැඩ කටයුතු ආරම්භ කළ අතර සජිත් ප්‍රේමදාස නිවාස, ඉදිකිරීම් සහ සංස්කෘතික කටයුතු අමාත්‍ය වරයා ලෙස කටයුතු කළ සමයේ එම භුමිය විහාරස්ථානය සදහා පවරා දුන් බවයි සෙල්වරාජා ගජේන්ද්‍රන් මන්ත්‍රීවරයා පවසන්නේ.

Facebook Comments

wedding people