සියළු බේද පසෙකලා දේශපාලන සිරකරුවන්ගේ නිදහස වෙනුවෙන් එක් වන ලෙස පහලොස් වසරක් සිර බත් කා ජනාධිපති සමාවෙන් නිදහස් ලැබු ලේඛකයකුද වන දෙමළ දේශපාලන සිරකරුවෙක් සංහිදියාවට හිතැති රට වැසියන්ගෙන් ඉල්ලා සිටී.
“ලංකාවේ සංහිදියාවට කැමති ඔක්කොම එකතු වෙලා දේශපාලන සිරකරුවන් ඔක්කෝම නිදහස් කරන්න පක්ෂ, ජාති, කුළ ආගම් භේද නැතුව එක්කහුවෙලා වැඩ කරන්න ඕනේ. එතකොට තමයි අපේ රටේ සංහිදියාව එන්න පුළුවන්.”
සිරගතව සිටියදීම ලේඛන කලාවට ද යොමු වූ දේශපාලන සිරකරු සෙල්ලයියා සතීස්කුමාර් එම ඉල්ලීම සිදු කළේ මාර්තු 17 වැනි සිකුරාදා නිදහස ලබා නව මැගසින් බන්ධනාගාරයෙන් පිටතට පැමිණ සිංහල බසින් අගනගරයේ මාධ්‍යවේදීන් අමතමිනි.
දෙමළ විමුක්ති කොටි සංවිධානයට ආධාර සැපයීමේ චෝදනා මත 2008 වසරේ ත්‍රස්තවාදය වැළැක්වීමේ පනත යටතේ අත්අඩංගුවට ගත් විවේකානන්දනූර් සතීස් හෙවත් සෙල්ලයියා සතීස්කුමාර්ට 2011 වසරේදී ජීවිතාන්තය දක්වා සිරදඬුවම් නියම විය. අත් අඩංගුවට ගැනීමට පෙර ඔහු කිලිනොච්චි මහ රෝහලේ ගිලන් රථ රියදුරකු ලෙස රැකියාව කරමින් සිටි අයෙකි.
2011 වසරේදී වව්නියාව මහ අධිකරණය ලබා දුන් ජීවිතාන්තය දක්වා සිර දඩුවම අභියෝගයට ලක් කරමින් සෙල්ලයියා සතීස්කුමාර් අභියාචනාධිකරණයේ සහාය පැතුවද වව්නියාව මහ අධිකරණය ලබා දුන් දඬුවම යළිත් වරක් ස්තීර කිරමින් තීන්දුව ප්‍රකාශයට පත් කිරීමට අභියාචනාධිකරණය කටයුතු කර තිබේ.
එම තීන්දුවෙන් සැහීමකට පත් නොවු සෙල්ලයියා සතීස්කුමාර් 2017 වසරේදී යළිත් වරක් ශ්‍රේෂ්ඨාධිකරණයට අභියාචනයක් ඉදිරිපත් කළ අතර එම නඩුව වසර හතකට අධික කාලයක් විභාග වෙමින් තිබියදී 2023 පෙබරවාරි 1 වැනිදා ඔහුට ජනාධිපති සමාව ලබා දීමට රනිල් වික්‍රමසිංහ ජනාධිපතිවරයා කටයුතු කර තිබුනි.
ජනාධිපති සමාව හිමිවුවත්, දඬුවම අභියෝගයට ලක් කරමින් ශ්‍රේෂ්ඨාධිකරණයේ ගොනු කර තිබු අභියාචනය ඒ වන විටත් විභාග වෙමින් පැවතීම හේතුවෙන් සෙල්ලයියා සතීස්කුමාර්ට නිදහස ලැබීමට නීතියෙන් බාධා පැමිණි අතර 2023 පෙබරවාරි 23 වැනිදා නීතිඥයන් මාර්ගයෙන් ඔහු එම අභියාචනය ඉල්ලා අස්කර ගැනීමෙන් අනතුරුව එම නඩුව අවසන් කිරීමට අධිකරණය ක්‍රියා කර තිබුනි.
නිදහසට තිබු නීතිමය බාධා ඉවත්වීමෙන් පසුව නව මැගසින් බන්ධනාගාරයෙන් මාර්තු 17 වැනිදා පිටතට පැමිණි සෙල්ලයියා සතීස්කුමාර් පිළිගැනීම සදහා දේශපාලන සිරකරුවන් නිදහස් කර ගැනිමේ ජාතික ව්‍යාපාරයේ මාරිමුත්තු සතිවේල් පියතුමා, ‘හඬක් නොමැතියවුන්ගේ හඬ’ සංවිධානයේ සම්බන්ධිකාරක මුරුගයියා කෝමගන් සහ උතුරු නැගෙනහිර ජනතා අරගල සඳහා සහයෝගිතා ව්‍යාපාරයේ ආර්. රජිව් කාන්ත් එක්ව සිටියහ.
සිරගතව සිටියදීම ලේඛන කලාවට යොමු වූ සෙල්ලයියා සතීස්කුමාර් මේ වනවිටත් කවි හා කෙටිකතා සංග්‍රහ 4 ක් පළකොට තිබේ.
ඉරුම්බුක් කදවුක්කුල්ලිරුන්දු (යකඩ දොරක් තුළ හිඳ) කවි 2012,
විඩියලෛ තේඩුම් ඉරවුහල් (අලුයම සොයන රාත්‍රීන්) කවි 2016,
සිරෛයිල් ඉරුන්දු සිංගල සහෝදරනක්කු (සිරගෙයි සිට සිංහල සහෝදරත්වයට) කවි 2017,
වේප්ප මරමුම් පවලම් ආච්චියුම් (කොහොඹ ගහ සහ පවලම් ආච්චි) කෙටිකතා, එම කෘති හතරයි.
සාහිත්‍යකරණයේ නියැලෙන විශිෂ්ටයන් වාර්ෂිකව ඇගයීමට ලක් කෙරෙන රාජ්‍ය සාහිත්‍ය උළෙලේදී හොඳම ස්වතන්ත්‍ර දෙමළ භාෂා නවකථාකරු ලෙස පසුගිය ඔක්තෝබර් මාසයේදී ඇගයීමට පාත්‍ර වු සිවලිංගම් අරූරන් ද ත්‍රස්ත නීති යොදාගෙන දහසය අවුරුද්දක් තිස්සේ සිරගත කොට සිටින්නෙකි.
හිටපු ජනාධිපති ගෝඨාභය රාජපක්ෂ ආරක්ෂක අමාත්‍යාංශයේ ලේකම්වරයාව සිටියදී ඝාතනය කිරීමට තැත් කළ බවට පොලිසිය විසින් ඔහුගෙන් පාපොච්චාරණයක් ලබාගෙන ඇත්තේ වධහිංසා පමුණුවා බරපතල තුවාලද සිදුකොට බව ඉකුත්දා අධිකරණයේදී අනාවරණය විය.
Facebook Comments
