“ජනපති අපිව රවටනවා” අතුරුදහන් වුවන්ගේ ඥාතීන්ගෙන් චෝදනා (VIDEO)

0

ජනාධිපති මෛත්‍රීපාල සිරිසේන විසින් අතුරුදහන් වුවන්ගේ ගැටලුවට විසඳුම් ලබා නොදී තමන් රවටමින් සිටින බවට අතුරුදහන් වුවන්ගේ ඥාතීන් චෝදනා කරයි.

“අපිව රවට්ටන්න තමා මේ සාකච්ඡාව තිබ්බේ ජිනිවා වලට යවන්න වාර්තාව සකස් කරන්න තමා මේක කළේ” 16 බ්‍රහස්පතින්දා කොළඹ දී ජනපති හමුවීමෙන් පසුව යෝගරාසා කලාරංජනී මාධ්‍ය වෙත කියා සිටියේය.

ජනපති සමඟ සාකච්ඡාව කිසිඳු පලක් නොවු බවට චෝදනා කරන ඥාතීන් අතුරුදහන් වුවන්ගේ ගැටලුවට විසඳුමක් ලෙස අතුරුදහන් වුවන් පිළිබඳ කාර්යාල පිළිගැනීමට බල කර සිටි බව ප්‍රකාශ කළේය.

මෙම හමුවේදී රජයේ සිර කඳවුරුවල ඇතැම් පිරිස් රඳවාගෙන සිටින බවට එල්ල වන චෝදනා ජනාධිපතිවරයා ප‍්‍රකාශ කළ බව පවසන ජනාධිපති මාධ්‍ය ඒකකය එවන් කිසිඳු රහස් කඳවුරක් වත්මන් රජයට නොමැති බව මෙන්ම කිසිඳු පිරිසක් එලෙස රඳවාගෙන නොමැති බව ද නිවේදනය කරයි.

ජාත්‍යන්තර පරීක්ෂණයක්

එහෙත් ජනාධිපතිවරයාගේ ප්‍රකාශය ප්‍රතික්ෂේප කරන යාපනයේ තංගරාසා චිත්‍රදේවී රහස් කඳවුරු පිළිබඳව සාක්ෂි තමන් සතුව පවතින බව සහ එක්සත් ජාතීන්ගේ නියෝජිතයන්ට එම තොරතුරු ලබා දිය හැකි බවයි මාධ්‍ය හමුවේදී කියා සිටියේ.

අතුරුදන්වූවන්ගේ පවුල්වල සාමාජිකයින්ගේ පවතින ගැටලූවලට කඩිනම් විසඳුම් ලබාදීම තම අපේක්ෂාව බව ජනාධිපතිවරයා මෙහිදී අවධාරණය කළ බව පවසන ජනාධිපති මාධ්‍ය ඒකකය අතුරුදන්වූවන්ගේ පවුල්වල සාමාජිකයින්ගේ පැමිණිලි, ඉල්ලීම් සහ තොරතුරු එක් රැස් කිරීම සඳහා නව අයදුම්පතක් දිස්ත්‍රික් ලේකම්වරුන් හරහා යොමු කිරීමට ජනාධිපතිවරයා උපදෙස් දුන් බව පවසයි.

එම තොරතුරු අතුරුදන්වූවන්ගේ කාර්යාලය සහ අතුරුදන්වූවන්ගේ කොමිෂන් සභාව මගින් නැවත විමර්ශනය කිරීමට ද උපදෙස් දුන් බවයි එම නිවේදනයේ සඳහන් වන්නේ.

ශ්‍රී ලංකා රජයෙන් තමන් හට යුක්තියක් අපේක්ෂා කල නොහැකි බව පෙන්වා දෙන අතුරුදහන් වුවන්ගේ ඥ‍ාතීන් ජාත්‍යන්තර පරීක්ෂණයක් හරහා තමන් හට යුක්තිය ඉටු වෙතැයි විශ්වාසය පල කරයි.

Facebook Comments