මහින්ද රාජපක්ෂගේ නායකත්වයෙන් ආණ්ඩුවකට සහාය ලබා ගැනීම පිණිස පැවැති පළමු ජන හමුවේදී ජනාධිපතිවරයා විසින් සමලිංගික විරෝධී ප්‍රහාරයක් එල්ල කර තිබේ.
තමන් ජනාධිපති ධුරයට ඔසවා තැබු එජාප රජයේ තීන්දු ගැනීමේ ක්‍රියාවලිය වෛරක්කාරී ලෙසින් හෙලා දුටු මෛත්‍රීපාල සිරිසේන ජනාධිපතිවරයා තීන්දු ගැනීම සඳහා රනිල් වික්‍රමසිංහ සමග සාකච්ඡා කළ පිරිස් හඳුන්වන ලද්දේ “සමනල කණ්ඩායමක්” ලෙසිනි.
“සිංහල, දෙමළ, මුස්ලිම්, මැලේ, බර්ගර් ජනතාවගේ සිතුම් පැතුම් සමගිය ඔහුට අමතක වුනා. රටේ ප්‍රශ්න විසඳීම ඔහුට අමතක වුනා. ඔහු සමනල ජීවිතයකට ඇතුල් වුනා. ආණ්ඩුවේ තීන්දු ගත්තේ ඇමැති මණ්ඩලය නොවෙයි ආණ්ඩු පක්ෂයේ ජ්‍යෙෂ්ඨයෝ නෙවෙයි, ආණ්ඩුවේ තීන්දු ගත්තෙ ජනපති අගමැති නෙවෙයි, ආණ්ඩුවේ තීන්දු තීරණ ගත්තෙ රනිල් වික්‍රමසිංහ මහතායි ඔහුගෙ සමනල රැලයි කියන එක මම කියන්න ඕනෑ,” යි අවඥා සහගතව සිනාසෙමින් පැවසීය.
“ජනාධිපති තුමනි… කූඩැල්ලෙක් වීමට වඩා සමනලයෙක් වීම වඩාත් ගෞරවාන්විතයි.” යනුවෙන් ජනපතිගේ සමලිංගික විරෝධි ප්‍රහාරයට පිළිතුරු දෙමින් ඇමැති මංගල සමරවීර සිය ට්විටර් ගිණුමෙහි සටහනක් තබා ඇත.
GSP+ බදු සහන ලබා දීම සඳහා වන යෝජනාවලියේ සමකාමීන්ට අපරාධයක් සේ සලකා දඬුවම් නොකරන ලෙසට යුරෝපා සංගමය කරන යෝජනාව ජනාධිපති මෛත්‍රිපාල සිරිසේන ගේ උපදෙස් අනුව ඉවත් කර දැමූ බව මුදල් රාජ්‍ය අමාත්‍ය ලක්‍ෂ්මන් යාපා අබේවර්ධන මීට පෙර පවසා තිබුනි.
රනිල් වික්‍රමසිංහ අගමැති ධුරයෙන් ඉවත් කොට එක්සත් ජාතික පක්ෂයේ වෙනත් නායකයකු එතැනට පත් කිරීම සඳහා මාස ගණනක් තිස්සේ කළ රහස් සාකච්ඡා සම්බන්ධව ද 5 සඳුදා පාර්ලිමේන්තු වටරවුමේ පැවති මහජන රැළියක් අමතමින් ජනාධිපතිවරයා හෙළි කළේය.
ජනාධිපති මෛත්‍රිපාල සිරිසේන ප්‍රකාශ කළේ කරු ජයසුරිය සහ සජිත් ප්‍රේමදාස දෙදෙනාම අගමැති ධුරය ලබාගැනීම රනිල් වික්‍රමසිංහට බියේ ප්‍රතික්ෂේප කළ බවයි.
එජාපයෙන් අගමැතිවරයෙක් පත් කිරීමේ උත්සාහය වැරදී ගිය තැන ජනාධිපතිවරයාගේ තේරීම වී ඇත්තේ මහින්ද රාජපක්ෂයි.
ඔහු දේශීය න්‍යාය පත්‍රයකට කටයුතු කරන අයකු ලෙස හැඳින්වූ ජනාධිපතිවරයා රනිල් වික්‍රමසිංහගේ “විදේශීය ලිබරල් අන්තවාදී” න්‍යාය පත්‍රය මෙතැන් පටන් ප්‍රතික්ෂේප කරන බව දැඩි ලෙස කියා සිටියේය.
Facebook Comments
