පෞද්ගලික මෙන්ම රාජ්‍ය උසස් අධ්‍යාපන ආයතනවල ගුණාත්මක භාවය පිළිබඳව වගකීම් දැරීම සඳහා ස්වාධීන කොමිසමක් ඇති කිරීම කෙරෙහි රජයේ අවධානය යොමු වී ඇති අතරම ඒ සඳහා අවශ්‍ය නීති සම්පාදනය කරමින් පවතින බව උසස් අධ්‍යාපන රාජ්‍ය අමාත්‍යවරයා පවසයි.
පසුගිය 2016 වසරේ දී විශිෂ්ඨ ලෙස උසස් පෙළ සමත් දරුවන් 147දෙනෙකු වෙනුවෙන් උසස් අධ්‍යාපන අවස්ථා ලබාගැනීම වෙනුවෙන් 7 බදාදා ශ්‍රී ලංකා වරලත් ගණකාධිකාරි ආයතනයේ පැවැති ශිෂ්‍යත්ව ප්‍රදානොත්සවයකට සහභාගි වෙමින් අමාත්‍ය මොහාන් ලාල් ග්‍රේරු මේ බව පැවසුහ.
2016 වසරේ දී රාජ්‍ය විශ්වවිද්‍යාල සඳහා ඇතුළත් කරගන්නා සිසුන්ගේ ප්‍රමාණය 10%කින් වැඩිකිරීමට පියවර ගත්ත ද වසරකට උසස් පෙළ සමත්ව උසස් අධ්‍යාපන ලැබීමට සුදුසුකම් ලබාගත් දරුවන් 80%ක් දෙනාට රාජ්‍ය විශ්වවිද්‍යාල වරම් අහිමිවන බව කී ඇමතිවරයා පෞද්ගලික උසස් අධ්‍යාපන ආයතන ඇති කිරීම කෙරෙහි රජයේ අවධානය යොමු වී තිබෙන බවද ප්‍රකාශ කළේය.
“පෞද්ගලික උසස් අධ්‍යාපන ආයතනවලට එරෙහි විශ්වවිද්‍යාල දරුවන් අරගල කරනවා. නමුත් සිතා බැලිය යුතුයි නිදහස් අධ්‍යාපනයෙන් ඉගෙන ගෙන රජයේ විශ්වවිද්‍යාල ප්‍රවේශය ද ලබාගත්තවුන් ඉන් එළියට විත් කරන්නේ කුමක් ද කියා. දුෂ්කර පළාත්වල පාසලට විද්‍යා විෂය උගන්වන්න, ගණිත විෂය උගන්වන්න යවන්න උපාධිධාරීන් නැහැ. එසේ නම් උද්ඝෝෂණ කිරීමේ නිදහස් අධ්‍යාපනය ආරක්ෂා කරගත නොහැකිය. නිදහස් අධ්‍යාපනය ලබන සෑම සියලු දෙනාම මේ රටේ හිඟන්නටත් ණයයි. ඒ ඔවුන් ඉගෙන ගන්නේ මහජනතාවගේ බදු මුදලින් නිසා” යැයි උසස් අධ්‍යාපන රාජ්‍ය අමාත්‍ය මොහාන් ලාල් ග්‍රේරු පවසයි.
තවමත් ශ්‍රී ලාංකිකයන් වෘත්තීය අධ්‍යාපනය කෙරෙහි එතරම් කැමැත්තක් නොදක්වන නමුත් රටක් ලෙසින් ඉදිරියට ගමන් කිරීමට නම් වෘත්තීය අධ්‍යාපනය නඟාසිටුවිය යුතු බවත් ඔස්ට්‍රේලියාව වැනි දියුණු රටවල පවා උසස් අධ්‍යාපනයෙන් වෘත්තීය අධ්‍යාපනයට යොමු වන බැව් පෙන්වාදුන් රාජ්‍ය අමාත්‍යවරයා ලංකාවේ මෙන් ම ලෝකය පුරාද ඉල්ලම පවතින්නේ ඒ සඳහා බවද සඳහන් කළේය.
Facebook Comments
