ත්‍රස්තවාදයට අනුබල දෙන බවට චෝදනා කරමින් කටාරය සමග සබඳතා අත්හිටුවීමට අසල්වැසි අරාබි රටවල් ගත් තීරණය තම ඉල්ලීමක ප්‍රතිඵලයක් බව අමෙරිකානු ජනාධිපති ඩොනල්ඩ් ට්‍රම්ප් පවසයි.
මෑතකදී තමන් සවුදි අරාබියේ කළ සංචාරයේ ප්‍රතිඵල දැනටමත් දැක ගන්නට ලැබෙමින් පවතින බව ට්විටර් පණිවුඩයක් යොමු කරමින් ඩොනල්ඩ් ට්‍රම්ප් ප්‍රකාශ කර තිබේ.
මැද පෙරදිග මතු වී තිබෙන වාතාවරණය “ත්‍රස්තවාදයේ බියකරු බව නිමා කිරීමේ ආරම්භය” වනු ඇති බව ඩොනල්ඩ් ට්‍රම්ප් සිය පණිවුඩයේ දක්වා ඇත.
ඉස්ලාමීය ත්‍රස්ත කණ්ඩායම්වලට සහය ලබා දෙන බවට චෝදනා කරමින් එක්සත් අරාබි එමීර් රාජ්‍යය, සෞදි අරාබිය, ඊජිප්තුව, බහරේනය, ලිබියාව සහ යේමනය යන අසල්වැසි අරාබි රටවල් කටාර් රාජ්‍ය සමග පැවති තානාපති සබඳතා අත්හිටුවනු ලැබීය.
අසල්වැසි රටවල තීන්දුවත් සමග ගුවන් සේවා සමාගම් ගණනාවක් කටාරයේ දෝහා අගනුවර වෙත සහ ඉන් පිටතට සිදු කෙරෙන ගුවන් ගමන් අත්හිටවූ අතර අරාබි රටවල තීන්දුවෙන් අනතුරුව කටාරය සමග සම්බන්ධතා අත්හිටුවීමට මාලදිවයින ද පියවර ගත්තේය.
Facebook Comments
