එක්සත් ජාතික පක්ෂයේ ජනාධිපති අපේක්ෂකයා තෝරා පත් කර ගැනීම 25 බදාදා නියමිතව තිබුන ද එය එක් දිනකින් කල් දැමීමට තීරණය කර ඇතැයි වාර්තා වේ.
සජිත් ප්‍රේමදාස අමාත්‍යවරයා කරන ලද ඉල්ලීමකට අනුව අගමැති රනිල් වික්‍රමසිංහ මෙම තීන්දුව ගෙන ඇති බවයි එක්සත් ජාතික පක්ෂ ආරංචි මාර්ග පවසන්නේ.
ජනාධිපති අපේක්ෂකයා තෝරා ගැනීමට කෘත්‍යාධිකාරී මණ්ඩල සාමාජිකයින්ට අමතරව එජාප පාර්ලිමේන්තු කණ්ඩායමේ සාමාජිකයින් ද කැඳවන්නැයි 23 අඟහරුවාදා පැවති සාකච්ඡාවක දී සජිත් ප්‍රේමදාස අමාත්‍යවරයා කරන ලද ඉල්ලීම අගමැතිවරයා විසින් සලකා බැලීමටද තීරණය කර ඇත.
මේ අතර එක්සත් ජාතික පක්ෂයේ ජනාධිපති ධුර අපේක්ෂකයා පක්ෂ ව්‍යවස්ථාවට අනුව ඉතා කඩිනමින් පත් කිරීමට පියවර ගන්නා බව එම පක්ෂ මහලේකම් අමාත්‍ය අකිල විරාජ් කාරියවසම් කොළඹ දී මාධ්‍ය වෙත පැවසීය.
කෘත්‍යාධිකාරී මණ්ඩලය සහ පාර්ලිමේන්තු කණ්ඩායම රැස්වී ඒ පිළිබදව අවසන් එකගතාවයකට පැමිණෙන බව ද අමාත්‍යවරයා එහිදී සඳහන් කළේය.
Facebook Comments
