ගංවතුරින් හා නායයාමෙන් දිවයිනේ දිස්ත්රික්ක හතරක මියගිය සංඛ්‍යාව 151ක් දක්වා ඉහල ගොස් තිබෙන අතර 111 දෙනෙකු අතුරුදහන්ව තිබේ.
වර්ෂාව හේතුවෙන් පවතින ගංවතුර අවදානම හෙට (29) සහ අනිද්දා (30) ඇදහැලීමට ඉඩ ඇති වර්ෂාවේ ප්‍රමාණය මත ගංවතුර අවදානම ඉහළ යාම හෝ පහළ යාම තීරණය වනු ඇතැයි වාරිමාර්ග අධ්‍යක්ෂ ජනරාල් එම්. තුරෙයිසිංහම් පවසයි.
මේ අතර දිවයිනේ නිරිත දිග කොටසට හෙට (29) සහ අනිද්දා යන දිනවල ගිගුරුම් සහිත වැසි ඇති විය හැකි බව කාලගුණ විද්‍යා දෙපාර්තමේන්තුව කියා සිටී.
ඒ අනුව බස්නාහිර, සබරගමුව, දකුණ, මධ්‍යම හා වයඹ යන පළාත්වලට ගිගුරුම් සහිත වැසි ඇති විය හැකි අතර මධ්‍යම කඳුකරයේ බටහිර බෑවුම් ප‍්‍රදේශවලට මිලිමීටර් 100 ඉක්මවූ තද වැසි අපේක්ෂා කරන බවයි කාලගුණ විද්‍යා දෙපාර්තමේන්තුව සඳහන් කළේ.
ජාතික ගොඩනැගිලි පර්යේෂණ සංවිධානය දිස්ත්රික්ක 07කට නිකුත් කර ඇති නායයාම් අනතුරු ඇඟවීම තවත් පැය 24ක කාලයක් සඳහා දීර්ඝ කර තිබෙනවා.
ජාතික ගොඩනැගිලි පර්යේෂණ සංවිධානය අනතුරු අඟවන්නේ වර්ෂාපතනය ඉදිරි පැය 24 තුළ ද අඛණ්ඩව පැවතුනහොත් නායයාමේ අවදානම් සහිත කඳ බෑවුම්වලින් ජනතාව ඉවත් විය යුතු බවයි.
ඉවුරු කැඩී බිදී යාමේ අවධානමක්
බොල්ගොඩ ජලාශයේ පනාපිටිය වේල්ල කැඩී යාමේ අවධානමක් හේතුවෙන් වාද්දූව, බණ්ඩාරගම, අඟුරුවාතොට, මොරේතුඩුව, පානදුර උතුර සහ දකුණ ගං වතුර අවධානමක්ට ලක්විය හැකි බව පොලිසිය නිවේදනය කරන අතර ගිංගගේ දෙපස ජනතාව දැඩි විමසිලිමත්ව පසුවිය යුතු බවත් එහි ඉවුරු කැඩී බිදී යාමේ අවධානමක් මතුව ඇතැයිද ගාල්ල මාතර වාරි මාර්ග අධ්‍යෂිකා දීපිකා ත්‍රිමාවිතාන අවධාරණය කරනවා.
බද්දේගම ප්‍රදේශයේ වේලි කිහිපයකින් ජලය කාන්දුවිමට පටන් ගෙන ඇති බවත් ඒ ස්ථාන ආරක්ෂාකර ගැනිම සඳහා හමුදා කණ්ඩායම් රැසක් වැලි ගෝනි ගැසිම සඳහා යොදවා ඇතැයි ද ඇය සඳහන් කළාය.
Facebook Comments
