රටේ නිදහස් අධ්‍යාපනය ශක්තිමත් කරමින් රජයේ පාසල් සහ විශ්වවිද්‍යාල සඳහා අවශ්‍ය සියලු මානව සහ භෞතික සම්පත් ලබාදීමට කටයුතු කරනවා සේම රාජ්‍ය නොවන අධ්‍යාපන ආයතන ද ශක්තිමත් කිරීමේ ප‍්‍රතිපත්තිය රජයක් ලෙස පිළිගෙන තිබෙන බව ජනාධිපතිවරයා පවසයි.
බෝඩ් ලෑලි වලට සීමා නොවී පෞද්ගලික අධ්‍යාපන ආයතන තුළ තිබිය යුතු ගුණාත්මකභාවය සහ ප‍්‍රමිතිය පිළිබඳව ද නිසි අවධානය යොමු කරමින් කටයුතු කරන බව ජනාධිපති මෛත්‍රීපාල සිරිසේන 06 සිකුරාදා සයිටම් ආයතනයේ සිසුන් සහ දෙමාපියන් සමග පැවති හමුවක දී පැවසු බවයි ජනාධිපති මාධ්‍ය ඒකකය පවසන්නේ.
කොතලාවල වෛද්‍ය පීඨයේ ඉඩ පහසුකම් සහ අනෙකුත් අවශ්‍යතා ඉහළ නැංවීම පිළිබඳව විධිමත් පියවර ඉදිරියේදී ගන්නා බව ද ජනාධිපතිවරයා කියා සිටියේය.
සයිටම් පෞද්ගලික අධ්‍යාපන ආයතනයේ අධ්‍යාපනය ලබමින් සිටි දරුවන්ගේ අනාගතය පිළිබඳ නොසිතා සිටියා නම් 2015 වසරේදීම එම ආයතනය වසා දමා ඇඟ බේරා ගැනීමට තමාට හැකියාව තිබුණු බව කී ජනපති චෝදනා, අපහාස, සහ විරෝධතා මැද වසර 03 ක් පමණ අදාළ සියලු පාර්ශ්වයන් සමග සාකච්ඡා පවත්වමින් එම ගැටලුවට නිසි විසඳුමක් ලබාදීමට උත්සාහ ගත්තේ එම දරුවන්ගේ අනාගතය වෙනුවෙන් බව ද අවධාරණය කළේය.
සයිටම් පෞද්ගලික අධ්‍යාපන ආයතනය පිළිබඳ උද්ගත වූ ගැටලුව විසඳීමට එවන් ගැටලුවකදී මේ රටේ කිසිදු රාජ්‍ය නායකයෙකු සිදු නොකළ මැදිහත්වීමක් සහ කැපවීමක් තමන් සිදු කළේ අධ්‍යාපනයේදී රටේ කිසිදු දරුවෙකුට අසාධාරණයක් වීමට ඉඩ නොතැබීමට බවයි ජනාධිපති මෛත්‍රීපාල සිරිසේන පෙන්වා දෙන්නේ.
විවිධ දේශපාලන හස්තයන් මෙම ගැටලුව පිටුපස සිට දේශපාලන වාසි ලබාගැනීමට උත්සාහ කළද සියලු දරුවන්ගේ අනාගතය පිළිබඳ නිසි අවධානය යොමු කරමින් මෙම ගැටලුවට විසඳුම් ලබාදීමට වත්මන් රජයට හැකියාව ලැබුණු බව ජනාධිපතිවරයා වැඩි දුරටත් කියා සිටියේය.
Facebook Comments
