දාහත් වසරකට ඉහත දී ශ්‍රී ලංකා ගුවන් හමුදාව විසින් ප්‍රහාර එල්ල කොට මරා දැමූ පාසැල් දැරිවියන් පනස් හතර දෙනකු ඇතුළු 61ක් වන්නියේ දී සහ උතුරේදී අනුස්මරණය කර තිබේ.
මහින්ද රාජපක්‍ෂ ජනාධිපතිධූර සමයේ , 2006 අගෝස්තු 14 වැනිදා ශ්‍රී ලංකා ගුවන් හමුදාව විසින් මුලතිව්, වල්ලිපුනම්හි සෙන්චෝලේ ළමා නිවාසයට එල්ල කළ ගුවන් ප්‍රහාර වලින් එහි සිටී පාසැල් දැරිවියන් 54 දෙනකු සහ කාර්ය මණ්ඩලයේ 7ක් ඝාතනය වී තිබුනි.
එකසිය පනහකට වැඩි පිරිසක් බරපතල ලෙස තුවාල ලැබූහ. ඇතැමෙක් සදාකාලයටම ආබාධිත වූහ.
බෝම්බ හෙළා මරා දැමුණු දැරිවියන්ගේ ඥාතීහු 17 වැනි වතාවටත් 2023 අගෝස්තු 14 වැනි සදුදා මුලතිව් ඉඩෙක්කට්ටු හංදිය ආසන්නයේ ළමා නිවාසය පිහිටා තිබු භූමියට රැස්ව ඝාතනයට ලක් වු තම සමීපතමයන්ගේ ඡායාරූප ඉදිරියේ මල් පහන් දල්වා කදුලින් ඔවුන් අනුස්මරණය කර තිබේ.
එම අවස්ථාවේ නිල ඇඳුමින් සැරසුණු හමුදා භටයන් ගිනි අවිද අතැතිව පා පැදි වලින් එම ස්ථානයෙන් ගමන් ගන්නා අයුරු ප්‍රදේශයේ වාර්තාකරුවන් විසින් රෑපගත කර ඇත.
අනුස්මරණයට එක්ව සිටි සිවිල් ක්‍රියාකාරී ෂන්මුගරාජා ජීවන් සදහන් කළේ දරුවන්ට දෙමළ ජනතාවගේ අරගල ඉතිහාසය කියා දීමේ අරමුණින් මෙවැනි අනුස්මරණ ඉදිරියේදීත් සිදු කරන බවයි.
“අපි මේ වගේ අනුස්මරණ කරන්නේ අනාගත දරුවන් වෙනුවෙන්. මේ වගේ සැමරුම් ඉදිරියේදීත් කරනවා. කවුරු මොනවා කිව්වත් මේ වගේ සැමරුම් හරහා තමයි දරුවන්ට ඒ මතකයන් කියලා දෙන්න පුළුවන්. දරුවන්ට එයාලගේ දෙමව්පියන් තමයි අපේ දෙමළ ජනතාවගේ අරගල ඉතිහාසය කියලා දෙන්න ඔනේ.”
අනුස්මරණයට එක්ව සිටි පිරිස් වෙත පොල් පැල බෙදා දිමක්ද සිදු කර ඇත. උතුරු පළාත් සභා මන්ත්‍රී තුරෙයිරාසා රවිහරන්, තමිළ් අරසු කච්චි (ITAK) මධ්‍යම කාරක සභික පීටර් ඉලන්චේලියන් ද එම අනුස්මරණයට එක්ව තිබේ.
මුලතිව් අනුස්මරණයට සමගාමීව යාපනය විශ්ව විද්‍යාලයේ සිසුන් සරසවිය තුලදීත් එම්.කේ සිවාජිලිංගම් හිටපු මන්ත්‍රීවරයා සිය කාර්යාලය භුමියේදිත් දාහත් වසක් පුරා සත්‍යය යුක්තිය ඉටු නොවුණු වල්ලිපුනම් හි දී බෝම්බ හෙළා මරා දැමූ පාසැල් සිසුවියන් සිහිපත් කර ඇත.
ආපදාවන්ට මුහුණ දීම සහ ප්‍රථමාධාර ලබාදීම පිළිබඳව සිසුවියන් සඳහා වූ වැඩ මුළුවක් මුලතිව් දිස්ත්‍රික්කයේ වල්ලිපුනම් හි සෙන්චෝලේ අනාථ නිවාසයේ පැවැත්වෙද්දී 2006 අගෝස්තු 14 දා හෙලන සුපර්සොනික් ප්‍රහාරක යානා බෝම්බ වැලකින් සිසුන් ඝාතනය වීම ගැන ඒ සමයේ ශ්‍රී ලංකා රජයේ ප්‍රකාශක කෙහෙළිය රඹුක්වැල්ල අමාත්‍යවරයා සෙන්චෝලේ එල්ටීටීඊ යුද පුහුණු කඳවුරක් බවට චෝදනා කරමින් ප්‍රකාශ කළේ එය යුක්ති සහගත ඉලක්කයක් බවයි.
එසේ වෙතත්, ශ්‍රී ලංකා සටන් විරාම නිරීක්ෂණ කමිටුව සහ එක්සත් ජාතීන්ගේ සංවිධානය ඇතුළු උතුරේ රාජකාරියේ යෙදී සිටි සහන සේවා ගණනාවක් විසින් තහවුරු කරන ලද පරිදි සෙන්චෝලේ අනාථ නිවාසය කිසිදු යුද පුහුණු ආයතනයක් නොවේ.
සටන් විරාම නිරීක්ෂණ කමිටු ප්‍රධානී උල්ෆ් හෙන්රික්සන් ප්‍රකාශ කර තිබුනේ බෝම්බ ප්‍රහාරයෙන් අනතුරුව එතැනට ගිය තම නිරීක්ෂකයන්ට දැක ඇති පරිදි ප්‍රහාරයට ලක්වී ඇති ස්ථානයේ කිසිදු හමුදා ස්ථාපනයක් හෝ ආයුධ තිබූ බවට සාක්ෂියක් නැති බවයි..
“මේ ප්‍රචණ්ඩත්වයේ ගොදුරු බවට පත්ව ඇත්තේ අහිංසක දරුවන් යැ,” යි එක්සත් ජාතීන්ගේ ළමා අරමුදලේ (UNICEF) විධායක අධ්‍යක්ෂිකා ඈන් මාග්‍රට් වෙනෙමන් කියා තිබුණි.
Facebook Comments
