හමුදාව චෝදනා ලබන සමූහ ඝාතනයකින් මියගිය පිරිසක් සැමරේ

තිස් එක් වසරකට ඉහත දී වත්මන් ජනාධිපතිවරයා කැබිනට් අමාත්‍යවරයකු සමයේ, රජයේ හමුදා චෝදනා ලබන සමුහ මිනිස් සංහාරයකින් ඝාතනයකරනු ලැබූ හතලිහකට ආසන්න දෙමළ පිරිසක් නැගෙනහිර දී අනුස්මරණය කර තිබේ.

1992 වසරේ සිදු කළ මඩකළපුව, කිරාන් ප්‍රදේශිය ලේකම් කොට්ඨාසයේ මයිලන්දනේ සමුහ ඝාතනයේ මියගියවුන් වෙනුවෙන් ශ්‍රී මුත්තුමාරි අම්මාන් කෝවිලේ අගෝස්තු 9 වැනිදා පුජාවක් පැවැත්වීමෙන් අනතුරුව මල්, පහන් දල්වා මිය ගිය පිරිස අනුස්මරණය කිරීමට ඔවුන්ගේ පවුල් වල ඥාතීන් කටයුතු කළ බව පළාත් බද වාර්තාකරුවෝ පවසති.

වත්මන් ජනපති රනිල් වික්‍රමසිංහ ද කැබිනට් ඇමැතිධුරයක් ඉසිලු රණසිංහ ප්‍රේමදාස ආණ්ඩු සමයේ සිදු කළ මෙම සමුහ සංහාරයෙන් කුඩා දරුවන්, ගැබිණි මව්වරු ඇතුළු 39 දෙනකු කපා කොටා මරා දමා තිබිණි. තුවාල ලැබූ තවත් 34 දෙනකු දිවි ගළවා ගැනීමට සමත් වී ඇත.

1992 අගෝස්තු 9 වැනිදා මයිලන්දනේ ගමට පැන මෙම ඝාතනය සිදුකළ බවට සිද්ධිය ඇසින් දුටුවන් විසින් පුනානි හමුදා කඳවුරේ සෙබළුන් 24 දෙනකු මඩකළපුව දිසා අධිකරණයේදී පැවති පෙරට්ටුවේදී හඳුනා ගැනිණි.

මඩකළපුව දිසා අධිකරණයේ 1992 අප්‍රියෙල් 02 වැනිදා පැවති හඳුනා ගැනීමේ පෙරෙට්ටුවෙන් අනතුරුව සැකකාර හමුදා සෙබළුන්ගේ ආරක්ෂාව සහතික කිරීමට යැයි පවසා පොලොන්නරුව අධිකරණය වෙත නඩු විභාගය මාරු කර තිබේ.

ඝාතනය ගැන මඩකලපුවේ උසාවියේදී ලබා දුන් 30 දෙනකුගේ සාක්ෂි සටහන් ද සමගින් යළිත් පොළොන්නරුවෙන් කොළඹ අධිකරණය වෙත විමර්ශන මාරු කෙරිණි.

මයිලන්දනේ සිට කොළඹ පැමිණෙන සාක්ෂිකරුවන් බිය ගැන්වීමත් සමගින් නඩුවේ විමර්ශනය ඔවුන්ගෙන් තොරව ජුරි සභාවක් විසින් පැවැත්වූ බවයි ගම් වැසියන් පවසන්නේ.

එම ජුරිය විසින් තීන්දු කරනු ලැබුවේ සැකකාර හමුදා සෙබළුන් 18 දෙනකු මෙම ඝාතනය සම්බන්ධයෙන් වැරදිකරුවන් නොවන බවයි.

නීතිපති දෙපාර්තමේන්තුවේ ඉල්ලීමට අනුව අදාළ සැකකරුවන්ට ලබා දුන් තීන්දුවට එරෙහිව අභියාචනයක් ඉදිරිපත් කිරීමේ අවස්ථාව ද නොතකා හරිමින් සර්ව සිංහල ජුරියක් විසින් එම තීන්දුව යළි සහතික කෙරිණි.

ජනාධිපති මහින්ද රාජපක්‍ෂගේ පාලන සමයේ 2007 දෙසැම්බර් 27 වැනිදා සැකකාර හමුදා සෙබළුන් 18 දෙනා නිදහස් කරනු ලැබුවේ මරා දැමුවන්ගේ ඥාතීන්ගේ, ගම්වැසියන්ගේ හා මානව හිමිකම් ක්‍රියාධාරීන්ගේ බලවත් විරෝධය මැදයි.

වසර තිස් එකක් ගතවීත් යුක්තිය පතන මයිලන්දනේ ගම්වාසින් කියා සිටින්නේ මෙම ජුරි සභා තීන්දුව ඔවුන් පිළිනොගන්නා බවයි.

මෙම සංහාරයට මැදිවූ සියලු දෙනා වෙනුවෙන් නැවතත් එම නඩුව විභාගයට ගන්නා ලෙස ඉල්ලමින් පසුගිය වසරේ ජනාධිපති රනිල් වික්‍රමසිංහගෙන් සංදේශයක් මගින් ඉල්ලා සිටීමට වින්දිත පවුල් වල සාමාජිකයන් කටයුතු කර තිබුනත් ඒ සම්බන්ධයෙන් ජනාධිපතිවරයා ගත් පියවර කවරේදැයි දැන ගන්නට නැත.