මේ රතු රෙද්දකින් මුහුණ වසාගෙන සිටින්නේ මහනුවර හන්තාන නායකත්ව පුහුණු ඇකඩමියේ දරු දැරියන් අපයෝජනය කිරීමේ සිද්ධියේ ප‍්‍රධාන සැකකරු නිමල් එන්. පීරිස් ය.
ආශාට මොනවද තියෙන්නේ… එයාට කටක් තියෙනවා. මූණක් තියෙනවා. ඇස් දෙකක් තියෙනවා. කන් දෙකක් තියෙනවා. අත් දෙකක් තියෙනවා. අපිට වගේ බඩ ගෙඩියක් තියෙනවා. කකුල් තියෙනවා… හොඳයි… පුතාලා දූලාට නැති එකක් ආශාට තියෙනවා. ඒ මොකක්ද? පාසල් ගුරුවරිය මෙසේ අසනු ලැබුවේ පළමු ශ්‍රේණියේ දූ පුතුන්ගෙනි. ගුරුවරියගේ පැනයට වහාම පිළිවදන් දුන් දරුවන් කීවේ ”වලිගේ ටීචර් වලිගේ” කියාය.
ආශා පිළිබඳ කතාව දරුවන්ට කියා දෙන්නේ වයස අවුරුදු හයේ සිටය. ”අපි සුරැකෙමු” තේමාව ඔස්සේ ආශා නමැති සුරතල් ඇත් පැටවා ගැන මේ පාඩම් මාලාව ඔවුන්ට කියා දෙන්නේ මුළු ජීවිත කාලයේම තමන් ආරක්ෂා වන්නේ කෙසේද යන්න දරුවන්ට විසඳා දීමටය. ශරීර අවයව ගැනත් ඒවා ආරක්ෂා කර ගත යුතු අන්දම ගැනත් බාහිර පුද්ගලයන්ට ඒවා ස්පර්ශ කරන්නට නොදී අතවරවලින් මිදෙන්නේ කෙසේද යන්න ගැනත් මේ පාඩම් මාලාවෙන් දරුවන්ට කියා දේ. පාඩම් කොතෙක් තිබුණත් දරුවන්ගේ රැකවරණය ‘සමාජ වගකීමක් ලෙස තේරුම් නොගත් සමාජයක අශිෂ්ට සම්පන්න ඛේදවාචකයන්ට අපි මුහුණ දෙමින් සිටින්නෙමු. අපේ දරුවන්ට ගොදුරු වෙන්නට ඉඩහැර සිටින්නෙමු. හන්තානයෙන් ඇසුණේ ඒ ඉකිගැසීම්ය. රැකවරණය කොල්ල කෑ දරුවන්ගේ අසරණභාවයේ සුසුම්ය.
සත්හඬ හෙළිදරව්ව
මානව නායකත්ව ඇකඩමිය (Human Leadership Academy) නාමයෙන් මහනුවර හන්තාන පැරඩයිස් පාර්ක්හි පවත්වාගෙන ගිය බාල වයස්කාර දරුවන්ගේ ශරීර කොල්ලකෑමේ අපයෝජන මධ්‍යස්ථානය පිළිබඳව ඉකුත් සතියේ අපි ඔබට හෙළිදරව් කළෙමු! එහි භාරකරුවා වූ ආචාර්ය චන්දිමාල් ගමගේ පිළිබඳවත් අයිතිකාරයා වූ සාමදාන විනිශ්චය කාර දේශශක්ති නිමල් එන්. පීරිස් පිළිබඳවත් දරුවන් අපයෝජනයට යොදාගත් ආකාරයත් අපි ඔබට කීවෙමු!
දේශපාලන බලය, ප‍්‍රභූ ඇසුර හා ඉහළ නිලධාරීන්ගේ මැදිහත් වීම මත භාරකාරයා හිරගෙට යවා අයිතිකාරයා ‘සුදනා’ කිරීමේ මෙහෙයුම ද අපි රටට හෙළිදරව් කළෙමු. බොහෝ මවුපියන් කාර්යාලයේ දුරකථනය නාද කරන්නට වූයේ එම හෙළිදරව්වෙන් පසුවය. අනාවරණය වූයේ ජුගුප්සාජනක සිදුවීම් වැලකි. අපයෝජනයට ලක් කර ඇත්තේ ගැහැනු දරුවන් පමණක් නොවේ. දරුවන්ගේ හෝ තමන්ගේ නම් සඳහන් නොකරන ලෙස ඉල්ලමින් හැඬූ කඳුළින් කී කතා කවර නම් පැමිණිලි පොතක සටහන් කරන්නද?
දූෂිත මෙහෙයුම
බාල වයස්කාර දැරියන් දෙදෙනකු සාපරාධී ලෙස අපයෝජනයට ලක් කර ඇතැයි කියන නිමල් එන්. පීරිස් නමැති කෝටිපති ව්‍යාපාරිකයා තමන් අත්අඩංගුවට පත් වීමෙන් වැළකී සිටීම සඳහා අපේක්ෂිත ඇප අයදුම්පතක් අධිකරණයට ඉදිරිපත් කර තිබිණි. ඇප අයදුම්පත‍්‍රය සලකා බැලීමට නියමිතව තිබුණේ අගෝස්තු මස නව වන දිනය. ”දේශශක්ති” සාමවිනිසුරු නිමල් එන්. පීරිස් එදින අධිකරණයේ පෙනී සිටියේ නැත. අපේක්ෂිත ඇප අවලංගු කළ මහෙස්ත‍්‍රාත්වරයා නිමල් එන්. පීරිස් අත්අඩංගුවට ගැනීමට නියෝග නිකුත් කළේය.
මේ සියල්ල සිදු වූයේ නිමල් එන්. පීරිස් අත්අඩංගුවට නොගෙන සිටීමටත් ඔහු ඇප ඉල්ලා සිටියහොත් පොලීසිය ඊට විරුද්ධ නොවන ලෙසටත් ඉහළ පෙළේ පොලිස් ලොක්කකු මහනුවර පොලිස් ප‍්‍රධානීන්ට අණ කර තිබිය දීය. අප විසින් හෙළිදරව් කරනු ලැබුවේ ඒ දූෂිත මෙහෙයුමයි. සියලූ සැලසුම් අවුල්ව ගිය පසුව නිමල් එන්. පීරිස් අගෝස්තු 10 වන දින අලූයම් කාලයේ මහනුවර පොලීසියට භාර වූයේ ය. 11 වන දින අධිකරණයට ඉදිරිපත් කළ සැකකරු අගෝස්තු 22 දක්වා රක්ෂිත බන්ධනාගාරගත කිරීමට මහනුවර ප‍්‍රධාන මහෙස්ත‍්‍රාත් බුද්ධික ශ‍්‍රී රාගල මහතා නියෝග කළේය. ඔහු සමඟ මානව නායකත්ව ඇකඩමියේ ප‍්‍රධාන පාලිකාව හා මූල්‍ය කළමනාකාරිය ද රක්ෂිත බන්ධනාගාරගත කෙරිණි. දරුවන්ගේ පෞරුෂ වර්ධනය කරනවා යයි කියමින් බාල වයස්කාර දැරියන් ප‍්‍රභූන් ඇතුළු ව්‍යාපාරිකයන්ට ඉහළ මිල ගණන්වලට විකිණූ ඇකඩමියේ ප‍්‍රධාන ගුරා වූ චන්දිමාල් ගමගේට අත් වූයේ ද එම ඉරණමය.
පොලිස් ලොක්කා කැලඹීම
බාල වයස්කාර දරුවන් අපයෝජනයට ලක් කළ ප‍්‍රධාන දේශකයාත් ටෙලිපික්ස් සමාගම් ජාලයේ සභාපති සහ කළමනාකාර අධ්‍යක්ෂ ‘දේශශක්ති සිංහ’ නිමල් එන්. පීරිස් ගැනත් අපි කළ හෙළිදරව්වෙන් පසුව දූෂිත මෙහෙයුමක නිරත වූ පොලිස් ලොක්කා මහත් සේ කැලඹුණු බව පොලිස් අභ්‍යන්තර ආරංචිමාර්ග අප වෙත සැල කර සිටියේ ය.
ඔහු අපගේ පුවත්පතේ කර්තෘ මණ්ඩල අධ්‍යක්ෂවරයා ඇතුළු කර්තෘ මණ්ඩලය පිළිබඳව වහාම ලිපිගොනු සකස් කරන්නට අණ කර සිටියේ ය. අපට එරෙහිව ඇති කේසස් මොනවාදැයි සොයා බලන්නට ජ්‍යේෂ්ඨ නියෝජ්‍ය පොලිස්පතිවරයකුට නියෝග කළේය.
මෙවන් යුගයක සඟවන්නට හැක්කේ කුමක්ද? ඒ සියල්ලම අප වෙත ද වාර්තා වූයේ ය. පොලිස් ලොක්කාගේ දෙවන දූෂිත මෙහෙයුම වෙනුවෙන් අපි මෙසේ කියා සිටින්නෙමු…! මහත්මයාණනි…! අපට එරෙහිව ඇති චෝදනා පිළිබඳවත් අපගේ අත් පා සලකුණු පිළිබඳවත් ත‍්‍රස්ත විමර්ශන ඒකකයේත් අපරාධ පරීක්ෂණ දෙපාර්තමේන්තුවේත් ඔබට අවශ්‍ය තරම් ලිපිගොනු ඇත. ඒවා ඉකුත් ආණ්ඩු සමයේ දී අප වෙනුවෙන් පිළියෙල කළ ඒවාය. කරුණාකර ඒවා පරීක්ෂා කර අපව වටහා ගන්න.
මාධ්‍ය සදාචාරය
හන්තාන බාල වයස්කාර දරුවන්ට වින කළ මානව නායකත්ව ඇකඩමියේ භාරකරු වූ චන්දිමාල් ගමගේ එම ආයතනයේ හිමිකරුවා බවට ඇතැම් මාධ්‍ය වාර්තා කළේ කුමක් හෝ සැඟවීමටදැයි අප දන්නේ නැත. එහෙත් එම ආයතනයේ හිමිකරුවා නිමල් එන්. පීරිස් බව අපයෝජනයට ලක් වූ දරුවන්ගේ මවුපියන් අපට කීවෝය. සොයා බැලූ කරුණු අනුව නිමල් එන්. පීරිස් තමා යටතේ තිබූ ආයතන සියල්ලම විමධ්‍යගත කර තිබූ අන්දම පැහැදිලි විය. ප‍්‍රභූන් සමඟ සමීප ඇසුරත් රජයේ ඉහළ නිලධාරීන්ගේ සහයෝගයත් නිමල් එන්. පීරිස්ට ඇති බව දන්නා ඇතැම් මාධ්‍ය ආයතන සිය වාර්තාකරණයේ දී නිමල් එන්. පීරිස් හඳුන්වනු ලැබුවේ ”කෝටිපති ව්‍යාපාරිකයා” කියාය. එසේ සඳහන් කර තිබුණේ මාධ්‍ය ආචාර ධර්ම රැකීමට නොවේ. නිමල් එන්. පීරිස් රක්ෂිත බන්ධනාගාරගත කිරීමේ පුවත අගෝස්තු 11 වන දින ජාතික පුවත්පතක වාර්තා කර තිබුණේ ”ප‍්‍රසිද්ධ ව්‍යාපාරිකයා” රක්ෂිත බන්ධනාගාරගත කළ බවය.
එම පුවත්පතේම ”සාපරාධී විශ්වාසය කඩ කළා යැයි කියන සිද්ධියක සැකකාර සේවකයාට ඇප” යනුවෙන් පළ කළ ප‍්‍රවෘත්තියේ සැකකාර පුද්ගලයාගේ නම, පදිංචිය ආදී සියල්ලම හෙළිදරව් කර තිබිණි. එසේම ”තම ඉඩමේ ගස් අතු නොකපා අසල්වැසියන්ට හිරිහැරයක් වන පරිදි කටයුතු කළ සැකකරුට රුපියල් තුන්දහසක දඩ” යනුවෙන් සඳහන් වූ ප‍්‍රවෘත්තියේ ද සැකකාර පුද්ගලයාගේ නම, ලිපිනය සියල්ලම සඳහන් වූයේය. බාල වයස්කාර දරුවන් අපයෝජනයට ලක් කළ සිද්ධියේ සැකකාරයා ”ප‍්‍රසිද්ධ ව්‍යාපාරිකයා” බවට පත් වූයේ එවැනි පුවත් වාර්තා කළ ජාතික පුවත්පතකය. ආචාර ධර්ම රකින්නේ උස්පහත්කම අනුව නම්, ප‍්‍රභූ බලය හෝ මුදල් බලය අනුව නම් ඒවා බලූ වටින්නේ නැත.
නිමල්ගේ මෙහෙයුම
නිමල් එන්. පීරිස් තම ව්‍යාපාරික ආයතනය දෙයාකාරයකින් නම් කර පවත්වාගෙන ගියේය. ටෙලිපික්ස් ප‍්‍රයිවට් ලිමිටඞ් යනුවෙන් හා ටෙලිපික්ස් ටෙක්නොලොජීස් ප‍්‍රයිවට් ලිමිටඞ් යනුවෙන් එකී ආයතන දෙක නම් කර තිබිණි. මූල්‍ය ආයතනවලින් ණය ලබා ගෙන ඒවා නොගෙවීම නිසා නිමල් එන්. පීරිස් හා ඔහුගේ ව්‍යාපාරික ආයතන බැංකුවල අසාදු ලේඛනයට ඇතුළත් කර ඇත. ආයතන විවිධ පුද්ගලයන්ගේ නමට විමධ්‍යගත කෙරුණේ ඉන් පසුවය. මහනුවරට එන ඕනෑම ප‍්‍රභූවරයකු, ව්‍යාපාරිකයකු, රාජ්‍ය නිලධාරියකු තමන්ට අවනත කරගන්නා සූත‍්‍රය නිමල් පීරිස් හොඳින්ම දැන සිටියේය.
ඔහු ඊට කෙතරම් ශූරයකු වීද යත් නිමල් එන් පීරිස්ගේ Facebook ගිණුමේ Profile Picture පරීක්ෂා කිරීමෙන් ඔබට වටහා ගන්නට හැකිය. 2015 ජනවාරි 09 වනදා වනතුරු එහි තිබුණේ නිමල් එන්. පීරිස් ජනාධිපති මහින්ද රාජපක්ෂට තුරුලූ වී සිටින ඡායාරූපයකි. දැන් එහි ඇත්තේ නිමල් එන්. පීරිස් ජනාධිපති මෛත‍්‍රීපාල සිරිසේන මහතාට තුරුලූ වී සිටින සේයාරුවකි. ප‍්‍රභූන්, රාජ්‍ය නිලධාරීන්, ව්‍යාපාරිකයන්, සිවිල් සමාජ කි‍්‍රයාකාරිකයන්, මාධ්‍යවේදීන් ඇතුළු මහනුවරට පැමිණෙන ඕනෑම අයකුට මත්පැන් සාද, රාත‍්‍රී භෝජන සංග‍්‍රහ දීමට නිමල් මැළි වූයේ නැත. ඇතැම් ඒවා සංවිධානය කළේ මානව නායකත්ව ඇකඩමියේ ය. සාදය අතරතුර කොට ගවුම් අන්දන ලද රූමත් බාලවයස්කාර දරුවන් ඇතුළු කාන්තාවන් ලවා අමුත්තන්ට සංග‍්‍රහ කරවන්නේය. වෙරි මතින් කාන්තාවන් කෙරේ බැල්ම හෙළන අමුත්තා නිමල්ගේ ඉලක්කය වූයේය.
සර් මොකද කියන්නේ අද? මෙයා එක්ක මෙහේ ඉමුද? අගුලූ ලූ කාමරවල දොර හැරෙන්නේය. රහසිගත කැමරා කි‍්‍රයාත්මක වන්නේය. ඒ රැයෙන් පසුව නිමල්ගේ යහළුවන් නොවූ ඇමැතිවරයකු නැත්තේය. මන්ත‍්‍රීවරයකු නැත්තේය, මාධ්‍යවේදියකු නැත්තේය, නීතිඥයකු නැත්තේය, ආණ්ඩුකාරවරයකු නැත්තේය, දිසාපතිවරයකු නැත්තේය, නිලමේවරයකු නැත්තේය. පොලිස් නිලධාරියකු නැත්තේය, හමුදා නිලධාරියකු නැත්තේය, ව්‍යාපාරිකයකු නැත්තේය, නළුවකු නැත්තේය, බැංකු නිලධාරියකු නැත්තේය, මහෙස්ත‍්‍රාත්වරයකු නැත්තේය, වෛද්‍යවරයකු නැත්තේය, බන්ධනාගාර නිලධාරියකු නැත්තේය, කුම්බලා කරවල කෑ බළලූන්ට දැන් ඒවා දිරවා ගන්නට සිදු වන්නේය.
පොලීසියේ මෙහෙයුම
ඉස්සාගේ හිස තුළ අසූචි ඇති බව බොහෝ දෙනකු දන්නා දේය. එහෙත් ඉස්සාගේ හිස තුළ උගේ හදවත ද පිහිටා ඇත්තේය. එබැවින් සියල්ලෝම දූෂිතයෝ නොවෙති. පිටබැද්දර ප‍්‍රදේශයේ බාල වයස්කාර දැරියක අපයෝජනයට ලක් කළ පුද්ගලයන් තිස් දෙනකු සම්බන්ධ තොරතුරු මාතර පොලීසියේ ළමා හා කාන්තා කාර්යාංශය ඇතුළු නිලධාරීන් විමර්ශනය කරමින් සිටින්නේය. ඔවුන් අත්අඩංගුවට ගෙන අධිකරණයට ඉදිරිපත් කරමින් සිටින්නේය. දැන් මහනුවර පොලීසිය හන්තාන මානව නායකත්ව ඇකඩමියේ දී අපයෝජනයට ලක් වූ දරුවන් වෙනුවෙන් යුක්තිය සොයාදිය යුතුය. මුදල්වලට හෝ ප‍්‍රභූ බලයට මේ දරුවන් අපයෝජනයට ලක් කළ පුද්ගලයන් කවුරුන්දැයි විමර්ශනය කළ යුතුය. වැරැදිකරුවන් නීතියේ රැහැනට හසු කරගත යුතුය. අපරාධ වැළැක්වීම සඳහා අද සටහන් වෙන පූර්වාදර්ශය මතුවට වැදගත් වන්නේය. දැන් අපි ඒ සියල්ල දෙසම විමසිල්ලෙන් බලා සිටින්නෙමු !
මූල්‍ය වංචාව
මානව නායකත්ව ඇකඩමිය සඳහා බඳවා ගත් නේවාසික සිසුන්ගෙන් එක් අයකුගෙන් රුපියල් එක්ලක්ෂ හතළිස් දහස බැගින් එම ආයතනය අය කරගෙන තිබුණේය.
දරුවන් අපයෝජනයට ලක් වන බව දැනගත් මවුපියන් ඔවුන්ගේ දරුවන් මේ ඇකඩමියෙන් ඉවත් කර ගැනීමට කටයුතු කළේය. තම දරුවන් වෙනුවෙන් නීති විරෝධී නේවාසික කඳවුරට මුදල් ලබා දුන් මවුපියන්ට අදාළ මුදල් නැවත හිමි විය යුතුය. එහෙත් ඉල්ලා සිටි අයට පවා එම මුදල් ලබා දුන්නේ නැත. අ.පො.ස. සා.පෙළ විභාගය අසමත් දරුවන්ට බලාපොරොත්තුවක් ලබා දීම වෙනුවෙන් කනකර උකස් කර බැංකුවලට ණය වී නොකා නොබී ඉතිරි කළ මුදල් මේ දරුවන්ගේ අනාගත අපේක්ෂාවන් වෙනුවෙන් ඔවුහු වැය කළහ. අවසානයේ මුදල්වලට මිල කළ නොහැකි දේ පවා ඔවුන්ට අහිමිව ගියේය. අයුක්තිසහගතව කොල්ල කෑ ජනතාවගේ මුදල් දරුවන්ගේ නාමයෙන් නැවත ඔවුන්ට ලබා දීමට නීතිය කි‍්‍රයාත්මක විය යුතුය.
සමාජ වගකීම
වෘත්තීය වගකීමක් ඇති සෑම පුරවැසියකුටම සමාජ වගකීමක් ද ඇත්තේය. බොහෝ අය නොසලකා හරින්නේ එයයි. දරුවන්ගේ අනාගතය හා ඔවුන්ගේ ආරක්ෂාව වෙනුවෙන් මුළු මහත් මානව වර්ගයාටම සමාජ වගකීමක් ඇත්තේය. මහනුවර මහෙස්ත‍්‍රාත් අධිකරණයේ නඩු අංක 12118/16 හන්තාන ළමා අපයෝජන සිද්ධියට අදාළ නඩුව කැඳවූ අවස්ථාවේ දී අගතියට පත් පාර්ශ්වය වෙනුවෙන් නීතිඥයන් එකොළොස් දෙනකු ස්වේච්ඡාවෙන් පෙනී සිටියේය. ඔවුන් අධිකරණයට කියා සිටියේ සැකකරුට දේශපාලන සබඳතා හා ඉහළ නිලධාරීන්ගේ සහාය ලැබිය හැකි නිසා නීතිය සාධාරණව කි‍්‍රයාත්මක කිරීම පිණිස තමන් පෙනී සිටින බවයි.
මුහුණු සඟවා ගැනීම
දේශශක්ති සිංහ සළු පොරොවා ගත් නිමල් එන්. පීරිස් අගෝස්තු 11 වන දින අධිකරණයට පැමිණියේ තමන්ගේ හිස වැසෙන සේ රෙද්දක් පොරොවාගෙනය. නඩුවේ සාක්ෂි අනුව සැකකරු අගෝස්තු 22 දක්වා රක්ෂිත බන්ධනාගාරගත කරන්නට මහනුවර ප‍්‍රධාන මහෙස්ත‍්‍රාත් බුද්ධික ශ‍්‍රී රාගල මහතා නියෝග කළේය. නිමල් පීරිස් ක්ලාන්තව ඇද වැටුණේය. සැකකරු රෝහල්ගත කර ඒ සම්බන්ධයෙන් වාර්තාවක් අධිකරණයට ඉදිරිපත් කරන ලෙස ද දැනුම් දී ඇත. ආතතියෙන් පෙන්වා දී ඇත්තේ තමන් බන්ධනාගාර රෝහලට ඇතුළත් කරන ලෙසදැයි අප දන්නේ නැත. සැඟවූ මුහුණු එළියට දේශශක්ති ‘සිංහ’ නිමල් එන්. පීරිස් ඇසුරු කළ ප‍්‍රභූන්, රාජ්‍ය නිලධාරීන්, සිංහ සමාජ නායකයන්, නළුවන්, නිළියන්, ආණ්ඩුකාරවරුන්, ඇමැතිවරුන්, මන්ත‍්‍රීවරුන් කවුරුද යන්න සමාජජාල වෙබ් අඩවි හරහා දැක බලාගැනීමට ඔහු විසින් අපට අවස්ථාව ලබා දී තිබේ. රටේ ජනතාවගේ දැනගැනීම පිණිස අපි ඒවා මෙම පිටුවෙහි පළ කර සිටින්නෙමු…! මේ ඡායාරූපවල සිටින බොහෝ අය නිමල් පීරිස්ගේ බත් බොජුන් වැළඳු අය ය. මධුවිතෙන් සප්පායම් වූ අය ය. දොළ පිදේනි ලෙස බාල වයස්කාර දරුවන් බිල්ලට ගත් නරුමයෝ කවුදැයි මේ ඡායාරූපවලින් පෙනෙන්නේ නැත. එහෙත් ඒවායින් කියැවෙන කතාවක් ද ඇත. ඒ කතා තේරුම් ගැනීම දැන් ඔබට භාරය.
(දයා නෙත්තසිංහ විසින් සත්හඬ පුවත්පතට ලියන ලද ලිපියකි)
Facebook Comments
