UN කියන විදියට හොඳටම කරගෙන යන බවට ආණ්ඩුව සහතික වෙයි

0

එක්සත් ජාතීන්ගේ මානව හිමිකම් කොමිසම කෙරෙහි පෙර පැවති දැඩි පිළිවෙත වෙනුවට රාජපක්‍ෂ ආණ්ඩුව විසින් නම්‍යශීලි පිළිවෙතක් අනුගමනය කර තිබේ.

ශ්‍රී ලංකාව පිලිබඳ වාර්තාවක් ඉදිරිපත් කරමින් මානව හිමිකම් කොමසාරිස් මිෂෙල් බැෂලේ 48 වැනි මානව හිමිකම් සැසිය [13] ඊයේ ඇරඹීමෙන් පසු විදේශ ඇමැති ජී.ඇල් පීරිස් [14] අද කරුණු දක්වමින් කියා සිටියේ “අප විසින් ස්වේච්ඡාවෙන් භාර ගන්නා ලද ජාත්‍යන්තර බැඳීම්වලට අනුකූලව, මෙම කවුන්සිලය සහ එක්සත් ජාතීන් විසින් නියම කරන ලද මානව හිමිකම් පද්ධතිය සමඟ අපගේ ශක්තිමත් හා අඛණ්ඩ සහයෝගීතාව“ පිළිබඳව අවධාරණය කරන බවය.

කෙසේවෙතත්, වගවීම සම්බන්ධයෙන් විදේශීය මැදිහත්වීම පෙරසේම ප්‍රතික්ෂේප කරන බවද මහාචාර්යවරයා ජිනීවා සිට වීඩියෝ තාක්ෂණයෙන් එක්සත් ජාතීන්ගේ මානව හිමිකම් කොමිසම අමතා කියා සිටියේය.

ඊට අමතරව විදේශ ඇමැති ජි ඇල් පීරිස් මානව හිමිකම් කොමිසම හමුවේ “වගකිව යුතු ප්‍රජාතන්ත්‍රවාදී රජයක් ලෙස වගවීම, සංහිඳියාව , මානව හිමිකම්, සාමය සහ තිරසාර සංවර්ධනය යන කරුණු සම්බන්ධ සමස්ත පරාසයකම ස්පෘශ්‍ය ප්‍රගතියක් ලබා ගැනීම සඳහා අපි කැපවී සිටින්නෙමු“යැයි ද සහතික විය.

අතුරුදහන් වූ තැනැත්තන් පිළිබඳ කාර්යාලය මගින් අතුරුදහන් වූවන්ගේ ලැයිස්තුව සකස් කොට අවසන් කරමින් හිමිකම් ඉල්ලීම් 3,775 ක් සකස් කොට ඇති බවත්, ජාතික සමගිය හා සංහිඳියාව සඳහා වූ කාර්යාලය කරුණු 8 කින් සමන්විත ක්‍රියාකාරී සැලැස්ම අඛණ්ඩව ක්‍රියාත්මක කරන බවත්,තිරසාර සංවර්ධන ඉලක්ක 16 පිළිබඳ මෙහෙයුම් කමිටුවක් සාමය, යුක්තිය සහ ශක්තිමත් ආයතන වැඩි දියුණු කිරීම සඳහා කටයුතු කරමින් සිටින බවත් පවසන විදේශ ඇමැති පීරිස් සඳහන් කරන්නේ ශ්‍රී ලංකා මානව හිමිකම් කොමිසම ද නිසි ලෙස ක්‍රියාත්මක වන බවයි.

“වගවීම සහ අතුරුදහන් වූවන්ගේ ගැටලු විසඳීමට කලින් පැවති කොමිෂන් සභාවල නිර්දේශ නැවත සලකා බැලීමටශ්‍රේෂ්ඨාධිකරණ විනිසුරුවරයෙකුගේ මූලිකත්වයෙන් පරීක්ෂණ කොමිෂන් සභාවක් පිහිටුවන ලැබුවා“ යැයි ද විදේශ ඇමැති සඳහන් කළේය.

“ත්‍රස්තවාදය වැළැක්වීමේ පනත නැවත සලකා බැලීමට සහ ජාත්‍යන්තර සම්මතයන්ට, විශිෂ්ඨ පරිචයන්ට අනුකූලව එය ගෙන ඒම සඳහා අමාත්‍ය මණ්ඩල අනු කමිටුවක් පත් කරන ලදී. මේ මස අවසානයේ දී අමාත්‍ය මණ්ඩලය වෙත ඒ ගැන වාර්තාවක් ඉදිරිපත් කරනු ඇත. ත්‍රස්තවාදය වැළැක්වීමේ පනත යටතේ රඳවා තබා ගැනීමේ සිද්ධීන් පිළිබඳව සොයා බැලීමට සහ එවැනි නඩු කඩිනමින් විසඳීමට නිර්දේශ ඉදිරිපත් කිරීම පිණිස උපදේශක මණ්ඩලයක් පත් කරන ලදී“ යැයි විදෙස් කටයුතු ඇමැති කියා සිටියේ ත්‍රස්ත පනත යොදා ගනිමින් රාජපක්ෂ ආණ්ඩුව තව දුරටත් කරමින් සිටින මානව හිමිකම් උල්ලංඝන චෝදනාවන්ගෙන් ආණ්ඩුව ගලවා ගැනීම වෙනුවෙනි.

ශ්‍රී ලංකාව ගැන වැඩ කරන දෙස් විදෙස් සංවිධාන බහුතරයක් මෙවර මානව හිමිකම් සමුළුවට වැඩි අවධාරණයක් කරනු ලැබුයේ ත්‍රස්ත පනත කෙරෙහිය.

LTTE සාමාජිකයින් 16 දෙනකුට ජනාධිපති සමාව ලබාදීම, බිම්බෝම්බ ඉවත් කිරීම, ප්‍රතිසංස්කරණය හා නැවත පදිංචි කිරීමේ වැඩසටහන්වල සාර්ථකත්වය, පළාත් සභා මැතිවරණ ද හැකි ඉක්මනින් පැවැත්වීම, ආදිය රාජපක්‍ෂ ආණ්ඩුව සංහිඳියාව වෙනුවෙන් කළ දේවල් ලෙස හුවා දක්වමින් කියා සිටී පීරිස් ඇමැති යුද අපරාධ ගැන ජාත්‍යන්තර පරීක්‍ෂණ පිටු දකිමින් කියා සිටියේ “දේශීය ක්‍රියාවලීන් මඟින් අදාළ කාරණා පිළිබඳව ශක්තිමත් ලෙස කටයුතු කරන අතර, 46/1 යෝජනාව මඟින් පිහිටුවන ලදැයි කියනු ලබන බාහිර ක්‍රියාමාර්ග සඳහා වන යෝජනාව අපි ප්‍රතික්ෂේප කරමු“ යනුවෙනි.

Facebook Comments