සාමකාමී දේදුනු ධජය සන්තකයේ තබා ගත් පාසල් සිසුවියට කොළඹ ජාත්‍යන්තර පාසල විසින් තහංචි මාලාවක් පනවා තිබේ.
කොළඹ ජාත්‍යන්තර පාසලේ උසස් පෙළ හදාරන යෞවනියකට එම දණ්ඩනය පැනවූ පාලනාධිකාරිය ඇය පාසලින් අස් කිරීමේ අවදානමට මුහුණ පා සිටින බවටද අනතුරු අඟවා ඇත.
ගැහැණු ළමයින්ට නොගැලපෙන දිගු කලිසමක් හැඳ පාසලට පැමිණීමත් ගුරු විරෝධය නොතකා දේදුනු වර්ණ ධජයක් රැගෙන ඒමත් ශිෂ්‍යාව විසින් කරන ලද විනය විරෝධී කටයුතු ලෙස වැඩබලන විදුහල්පතිනි සාරා පිලිප්ස් විසින් දෙමාපියන් වෙත යවන ලද ලිපියෙහි සඳහන් වේ.
එයට දඬුවම් ලෙස පාසලේ සියලුම ක්‍රීඩා කටයුතු, සංවත්සර උත්සව සහ මෝස්‌තර ප්‍රදර්ශන ඇතුළු බාහිර ක්‍රියාකාරකම් වලින් ඇය ඉවත් කිරීමට කොළඹ ජාත්‍යන්තර පාසලේ පාලන අධිකාරිය තීන්දු කර ඇත.
“මෝස්‌තර ප්‍රදර්ශනයේ අඳින ඇඳුමේ අංගයක් ලෙස දේදුනු කොඩිය පැළඳිමට ඇයට අවශ්‍ය විය. ඊට ඉඩ දිය නොහැකි බවත්, එය නොඉවසන බවත් ඇයට කියන ලදී. ඇය දිගටම එම කබාය පුහුණුවීම් සඳහා රැගෙන ආවාය. තව දුරටත් මෝස්‌තර ප්‍රදර්ශනයට පෙනී සිටිය නොහැකි බව ඇයට දැනුම් දෙන ලදී. එහෙත් ඇය ඊයේත් (19. 09. 2018) පුහුණු සඳහා පැමිණියාය.”
“අද උදේ ඇය පාසලට ගෙනා දේදුනු කොඩියෙන් ගමන් මල්ල ආවරණය කර තැබුවාය. එය ඉවත් කිරීම ඇය විසින් ප්‍රතික්ෂේප කරන ලදී. මෙය විනය විරෝධී ක්‍රියාවක් මෙන්ම පාසල් නීති උල්ලංඝනයක් බවත් ඇයට පැහැදිලි කර දෙන ලදී.” යනුවෙන් වැඩ බලන විදුහල්පතිනියගේ ලිපියෙහි සඳහන් වෙයි.
ගමන් මල්ල ආවාරණ කර තිබු දේදුනු ධජය ඉවත් කර ගැනීමය ශිෂ්‍යාව පෑ විරෝධය “ආචාරශීලී සහ ගෞරව සම්පන්න නොවන” බව වැඩබලන විදුහල්පතිනි සාරා පිලිප්ස්ගේ අදහසයි.
Facebook Comments
