උතුරු නැගෙනහිර ජනතාවගේ අල්ලා ගන්න ලද ඉඩම් වලට අදාළ ලියකියවිලි ඉදිරිපත් කරන්නේ නම් එම ඉඩම් මුල් හිමිකරුවන්ට ලබා දීම මේ වසර අවසන් වීමට පෙර සිදු කළ යුතු බවට ජනාධිපතිවරයා සියලු අංශ වලට උපදෙස් දී ඇති බව ජනාධිපති මාධ්‍ය අංශය පවසයි.
ඉඩම් ප්‍රශ්න නොවිසඳීම ජනතාව තුල නොසන්සුන්තා ඇති වීමට හේතුව බව උතුරු හා නැගෙනහිර පළාත් සංවර්ධනය පිළිබඳ පත්කළ ජනාධිපති කාර්ය සාධන බලකාය තුන්වන වරට 3 බදාදා රැස්වු අවස්ථාවේ ජනාධිපති මෛත්‍රීපාල සිරිසේන විසින් මෙසේ උපදෙස් ලබා දී ඇත.
“උතුරු නැගෙනහිර ජනතාවගේ මේ වන විටත් නොසන්සුන්තාවය ඇති වන ප්‍රශ්නය තමයි මේ ඉඩම් ප්‍රශ්න විසඳීම ප්‍රමාද වෙන එක. ඒ ජනතාවට හිමි ඉඩම් අනිවාර්යෙන් ඒ ජනතාවට දෙන්න ඕනෙ ඒ ගැන කිසිම තර්කයක් නැහැ. ඒ ඉඩම් හිමි ජනතාව තමන්ගේ අයිතිය පෙන්නුම් කරනවා නම් යුද්ධයට පෙර ඉඩම් වල අයිතිකරුවන් තමන්ගේ කඩදාසි ඉදිරිපත් කරනවා නම් ඉඩම් වල කිසිඳු සීමවක් නොතකා ඒ අයට ඒ ඉඩම් දෙන්න කියලා මම සති දෙකකය කලින් උපදෙස් දුන්නා.”
විධිමත් කාල රාමුවක් සකසා ගනිමින් අදාළ වැඩපිළිවෙළ දියත් කරන ලෙසත් එහි ප‍්‍රගතිය ලබන මස පැවැත්වෙන උතුරු හා නැගෙනහිර පළාත් සංවර්ධනය පිළිබඳ ජනාධිපති කාර්ය සාධන බලකා රැස්වීමට ඉදිරිපත් කරන ලෙසත් ජනාධිපතිවරයා නියෝග කර තිබේ.
යුද්ධයෙන් තම ගේදොර ඉඩකඩම් පමණක් නොව ලියකියවිලිද අහිමි වූ ජනතාව සම්බන්ධයෙන් කවර පියවරක් අනුගමනය කරනවාද යන්න ජනාධිපති මාධ්‍ය ඒකකය සඳහන් කර නැත.
රජයේ ආරක්ෂ අංශ අත්පත් කරගෙන සිටින පාසල්වලට අයත් ඉඩම් සහ ගොඩනැගිලි නිදහස් කිරීම පිළිබඳව මෙහිදී විශේෂ අවධානයක් යොමු බවයි ජනාධිපති මාධ්‍ය ඒකකය නිවේදනය කරන්නේ.
කිලිනොච්චි දිස්ත්‍රික්කයට බලපා ඇති නියං තත්ත්වය හමුවේ ජනතාවට සහන සැලසීමට ගෙන යන වැඩපිළිවෙළේ ප‍්‍රගතිය හා උතුරු නැගෙනහිර පළාත්වල ප‍්‍රචණ්ඩත්වය හා මත්ද්‍රව්‍ය භාවිතය වැළැක්වීමට ගෙනයන වැඩසටහන සම්බන්ධයෙන්ද ජනපති සියි අවධාකය යොමු කර තිබේ.
විපක්ෂනායක ආර්. සම්බන්ධන් ඇතුළු මැති ඇමතිවරු පිරිසක් ද, ආණ්ඩුකාරවරු, ජනාධිපති ලේකම් උදය ආර්. සෙනෙවිරත්න ඇතුළු රාජ්‍ය නිලධාරින්, ත‍්‍රිවිධ හමුදාපතිවරු, පොලිස්පතිතුමා ඇතුළු ආරක්ෂක අංශ ප‍්‍රධානීන් ද මේ අවස්ථාවට එක්ව සිටියහ.
Facebook Comments
