යුද්ධයෙන් පසු කාලපරිච්ඡේදයේ නැති ආරක්ෂාවක් එල්ටීටීඊ පාලන සමයේ උතුරේ ජනතාවට තිබුනු බවට ළමා හා කාන්තා කටයුතු පිළිබඳ රාජ්‍ය ඇමැතිනිය කරන ලද ප්‍රකාශය සත්‍ය බව උතුරු පලාත් මහ ඇමැතිවරයා ප්‍රකාශ කර තිබේ.
එල්ටීටීඊ පාලනය පැවති අවදියේ යුද්ධයෙන් ඇතිවූ පීඩාව හැරුනුකොට වෙනත් හිරිහැරයක් සිදු නොවූ බව පැවසූ මහ ඇමැති සී.වී. විග්නේස්වරන් අද වන විට උතුර අනාරක්ෂිත වී ඇතැයි විජයකලා මහේෂ්වරන් රාජ්‍ය අමාත්‍යවරියගේ ප්‍රකාශය සම්බන්ධයෙන් යාපනයේදී මාධ්‍යවේදීන් කළ විමසීමකට පිළිතුරු දෙමින් කියා සිටියේය.
උතුරේ ජනතාවගේ අනාරක්ෂිත භාවය පිළිබඳ විමර්ශනය කිරීමේ කිසිදු වැරද්දක් නැති බවයි මහ ඇමැතිවරයා පෙන්වා දෙන්නේ.
එල්ටීටීඊ පාලන සමයේදී දෙමළ ජනයා ආරක්ෂිතව සිටි බවට පැවසීමෙන් සියලු දෙනා ත්‍රස්තවාදීන් නොවන බවයි මහ ඇමැතිවරයා අවධාරණය කරන්නේ.
“ප්‍රභාකරන් ගේ කාලයේ අපේ ජනතාව ආරක්ෂිතව ජීවත් වුනා කීමෙන් අපි ත්‍රස්තවාදීන් වෙන්නේ නෑ,”
යුද්ධය පැවති කාලයේදී කාන්තාවකට බියෙන් තොරව රාත්‍රීයේ පවා අවශ්‍ය ඕනෑම තැනකට යාමට ආරක්ෂාව තිබු බවත් යුද්ධයෙන් පසුව කඩු, ස්ත්‍රී දුෂණ, ප්‍රචන්ඩ ක්‍රියා, මත්ද්‍රව්‍ය පාවිච්චිය ඉතා ඉහල ගොස් ඇති බවයි සී වී විග්නේස්වරන් මහ ඇමැතිවරයා පෙන්වා දෙන්නේ.
මෙම වතාවරණය පාලන කිරීමට දිගින් දිගටම පොලිස් බලතල ඉල්ලා සිටිය ද දකුණේ ඉන්නා දේශපාලකයන් ඒ පිළිබඳව වටහා නොගෙන ජාතිවාදී මත වපුරන බවට මහ ඇමැතිවරයා කනගාටුව පල කළේය.
