බලශක්ති අමාත්‍ය උදය ගම්මන්පිල මහතාට එරෙහිව ඉදිරිපත්ව ඇති විශ්වාසභංග යෝජනාව ඒකමතිකව පරාජය කිරීමට ආණ්ඩු පක්ෂ මන්ත්‍රී කණ්ඩායම තීරණය කර තිබේ.
විශ්වාසභංග යෝජනා විවාදය ඇතුළු කරුණු සම්බන්ධයෙන් සාකච්ඡා කිරීම සඳහා ආණ්ඩු පක්ෂ මන්ත්‍රී කණ්ඩායම 18 ඉරිදා ජනාධිපති ගෝඨාභය රාජපක්ෂගේ ප්‍රධානත්වයෙන් රැස්විය.
අදාළ සාකච්ඡාවේදී විශ්වාසභංග යෝජනාව පරාජයකට පත්කිරීමට ආණ්ඩුව තීන්දු කළ බවට රැස්වීමට එක්ව සිටි මන්ත්‍රීවරු කිහිප දෙනෙකුම මාධ්‍ය වෙත පවසා තිබුනි.
තෙල් මිල වැඩි කිරීම අමාත්‍යවරයෙකුගේ තනි තීරණයක් නොවීම හේතුවෙන් එම විශ්වාසභංගය ආණ්ඩු පක්ෂය විසින් පරාජය කරන බව ඩී.වී චානක රාජ්‍ය අමාත්‍යවරයා ප්‍රකාශ කර තිබේ.
ඉන්ධන මිල ඉහළ නැංවීමට ගත් තීරණයට එරෙහිව සමගි ජන බලවේගය පක්ෂය විසින් උදය ගම්මන්පිල අමාත්‍යවරයාට විශ්වාසභංග යෝජනාවක් ඉදිරිපත් කළ අතර එය අද දිනයේ විවාද කිරීමට නියමිතය.
Facebook Comments
