පෑලියගොඩ පොලිසියේ දී ඝාතනය කළ දෙදරු පියා වෙනුවෙන් දශලක්ෂයක වන්දියක්

පොලිස් අත්අඩංගුවේ දී සිව් වසරකට පෙර ඝාතනයට ලක් වු දෙදරු පියකුගේ පවුලේ සාමාජිකයන්ට රුපියල් මිලියනයක වන්දි මුදලක් ගෙවන ලෙස අධිකරණය නියෝග කර තිබේ.

2017 වසරේදී පෑලියගොඩ පොලීස් අත්අඩංගුවේ සිටියදී ඝාතනයට ලක්වූ ශ්‍යාමන් වික්‍රමරත්නගේ බිරිදගේ හා දරුවන් දෙදෙනාගේ මූලික අයිතිවාසිකම් කඩ වී ඇතැයි තීන්දු කළ ශ්‍රේෂ්ඨාධිකරණය නියෝග කර ඇත්තේ එයට වන්දි වශයෙන් ඔවුන්ට රුපියල් ලක්ෂ දහයක මුදලක් ගෙවන ලෙසයි.

එම වන්දි මුදලින් රුපියල් හත් ලක්ෂ පනස්දහක් රජයෙන්ද, ඉතිරි ලක්ෂ දෙක හමාරක මුදල රුපියල් පනස්දහස බැගින්, ඝාතනය සම්බන්ධයෙන් චෝදනා එල්ල වී සිටින පෑලියගොඩ පොලිසීයේ පොලිස් නිලධාරීන් පස් දෙනා විසින්ද අදාළ කාන්තාවට ගෙවිය යුතු බවට ශ්‍රේෂ්ඨාධිකරණය වැඩි දුරටත් නියෝග කර තිබේ.

රුපියල් ලක්ෂ දහයක් වන මුළු වන්දි මුදලින් දරුවන් දෙදෙනාගේ නමින් රාජ්‍ය බැංකුවක ගිනුම්වල ලක්ෂ දෙක හමාර බැගින් ද ඉතිරි ලක්ෂ පහක වන්දි මුදල පෙත්සම්කාරිය සතු විය යුතු බවද අධිකරණය තව දුරටත් නියෝග කර ඇත.

ජනක් ද සිල්වා, මහින්ද සමයවර්ධන යන විනිසුරුවරුන්ගේ එකගත්වයෙන්, විනිසුරු ප්‍රතී පද්මන් සූරසේන නඩු තීන්දුව ප්‍රකාශයට පත් කර තිබේ.

ශ්‍යාමන් වික්‍රමරත්නගේ බිරිද වන කඩුවෙල, පහළ බෝමිරිය රස්සපාන පාරේ පදිංචි ජයමුනි අනුරාධ නිල්මිණි විජේසේකර ගොනු කළ මෙම පෙත්සමේ වගඋත්තරකරුවන් ලෙස පෑලියගොඩ පොලීසියේ පොලිස් කොස්තාපල්වරුන් වන සුමේධ තුෂාර, ඉන්දික ප්‍රියදර්ශන, චානුක රුක්මන්, අජිත් ජයලාල් සහ ළහිරු රොශාන් නම් කර තිබුනි.

බරපතල තැලුම් තුවාල

පෑලියගොඩ පොලිසියේ අපරාධ අංශයේ අත්අඩංගුවේ සිටි තම සැමියා මිය ගොස් ඇත්තේ පොලිසිය විසින් පහර දීමෙන් බව මරණ පරීක්ෂණයෙන් පසු ශ්‍යාමන් වික්‍රමරත්නගේ බිරිද 2017 වසරේදි ප්‍රකාශ තිබුනි.

පෑලියගොඩ පොලීසියේ අපරාධ අංශය මගින් විසින් අත් අඩංගුවට ගන්නා ලද රාත්‍රියේම කඩුවෙල නවගමුව ප්‍රදේශයේ පදිංචි එවකට 41 හැවිරිදි චදික් ශ්‍යාමන් වික්‍රමාරච්චිගේ මළ සිරුර කොළඹ ජාතික රෝහලට ගෙනවිත් තිබෙන බව වෛද්‍ය වාර්තාවලින් හෙළිවේ.

විශේෂඥ අධිකරණ වෛද්‍ය නිලධාරී එස් ඩී චන්න පෙරේරා විසින් 2017 වසරේ පෙබරවාරි 26 ඉරිදා පවත්වන ලද පශ්චාත් මරණ පරීක්ෂණ වාර්තාවේ සඳහන් පරිදි 2017 වසරේ පෙවරවාරි 25 සෙනසුරාදා රෝහලට ගෙනෑවිත් ඇත්තේ මළ සිරුරයි.

වික්‍රමාරච්චි මියයාමට හේතුව ලෙස එහි නිගමනය කොට තිබුනේ බරපතල තැලුම් හේතුවෙන් ශරීරයේ රුධිර සංසරණය අඩුවීමයි.

මරණය සිදුවී ඇත්තේ මොට ආයුධයකින් පහරදීමෙන් යයි අධිකරණ වෛද්‍ය නිලධාරියා කී බව චදික් ශ්‍යාමන් වික්‍රමාරච්චිගේ බිරිඳ 2017 වසරේ මාධ්‍යවේදීන් හා කියා සිටියාය.

දරුණු විදියට ගහලා

පහළොස් වසරකින් මෙපිට මෙවන් පහරදීමකින් වූ මරණයක් සම්බන්ධයෙන් තමන් පරීක්ෂණ පවත්වා නැතැයි වෛද්‍ය නිලධාරියා ප්‍රකාශ කළ බව පශ්චාත් මරණ පරීක්ෂණයෙන් අනතුරුව ඇය විලාප දෙමින් පවසා තිබුනි.

“දරුණු විදියට ගහලා තියෙන්නේ,” යි ඇය කියා සිටියාය. “පොලිසියේ සිවිල් ඇඳගත්තු එක්කෙනෙක් ඇවිත් අරන් ගිහින් උදේ ඉස්පිරිතාලේ ගිහින් බලනකොට මරලා දාලා. ඔලුවෙත් වැලි. මුළු ඇඟේම වැලි.”

පෑලියගොඩ පොලිස් නිලධාරීන් කිහිප දෙනෙකු 2017 වසරේ පෙබරවාරි 25 දා රාත්‍රියේ පැමිණ කටඋත්තරයක් ගැනීම සඳහා අවශ්‍ය බව පවසමින් චදික් ශ්‍යාමන් වික්‍රමාරච්චි ගෙන ගිය බව ඥාතීහු පවසති.

පසු දා උදෑසන ඔවුන්ට දැනගන්නට ලැබී ඇත්තේ මියගිය දෙදරු පියා පොලිස් ස්ථානයෙන් කොළඹ ජාතික ‍රෝහල වෙත රැගෙන ගොස් ඇති බවයි.

උප පොලිස් පරීක්ෂකවරයකු සහ පොලිස් කොස්තාපල්වරුන් සිව්දෙනකු එම ඝාතනය සම්බන්ධයෙන් අත්ඩුවට ගෙන තිබුනි.

මංකොල්ල කෑම්වලට සම්බන්ධ සැකකරුවකු සිදුකළ ප්‍රකාශයක් අනුව අත්අඩංගුවට ගත් මියගිය තැනැත්තාට පහරදී ඇති බවට පශ්චාත් මරණ පරීක්ෂණයෙන් හෙළිදරව් වී ඇති බව එවකට සිටි පොලිස් මාධ්‍ය ප්‍රකාශක ප්‍රියන්ත ජයකොඩි ද පිළිගෙන තිබුනි.