රාජපක්ෂ පාලන සමයේ අගනුවර සිදු වු පැහැර ගැනීම සහ වධ බන්ධන සම්බන්ධව එවක ආරක්ෂක ලේකම්වරයා සහ යුද හමුදාපතිවරයා එකිනෙකාට චෝදනා එල්ල කර තිබේ.
එම සිද්ධින් සම්බන්ධව හිටපු ආරක්ෂක ලේකම් වරයාට සහ යුද සමයේ රාජ්‍ය බුද්ධි සේවා ප්‍රධානියා වගකිව යුතු බවට ෆීල්ඩ් මාර්ෂල් සරත් ෆොන්සේකා මාධ්‍යවේදීන්ට ප්‍රකාශ කළේ කීත් නොයාර් මාධ්‍යවේදියා දස වසරකට ඉහතදී පැහැරගෙන ගොස් වධහිංසා කිරීම සම්බන්ධ රහස් පොලිස් පරීක්ෂණය සඳහා ප්‍රකාශයක් ලබාදීමෙන් අනතුරුවය.
කෙසේ වෙතත් එම අපරාධය සම්බන්ධව හිටපු ආරක්ෂක ලේකම් ගෝඨාභය රාජපක්ෂ චෝදනා නගා තිබුනේ හිටපු හමුදාපති වත්මන් වනජීවී කටයුතු භාර අමාත්‍ය ෆීල්ඩ් මාර්ෂල් සරත් ෆොන්සේකා වෙතයි.
“කීත් නොයර්ට පහර දීම මගේ අනුදැනුම යටතේ සිද්ධ වුනා කියලා ගෝඨාභය රාජපක්ෂ මෙතනට ඇවිල්ල කියල තියෙනවා. ඒ ගැන තමයි මගෙන් ඇහුවේ. මම එදත් කිව්වා අදත් කියනවා, කොළඹ වෙච්චි පහර දීම්, පැහැරගැනීම්, ඒ සියලු දේ ගෝඨාභය රාජපක්ෂලා කපිල හෙන්දවිතරනලා මෙහෙයවපු කල්ලි හරහා සිද්ධ වෙච්චි දේවල් කියලා.” යි ඔහු පැවසීය.
යුද හමුදා නිලධාරීන් විසින් කරන ලද අපරාධ සම්බන්ධයෙන් හමුදාපතිවරයා ද වගකිව යුතු බව පෙන්වා දුන් මාධ්‍යවේදියකුට සරත් ෆොන්සේකා අමාත්‍යවරයා ප්‍රතිචාර දැක්වුයේ යුද සමයේ මාධ්‍ය විසින් කරන ලද විවේචන රජයට එල්ලවූ හෙයින් යුද හමුදාවට මාධ්‍ය මර්දනයේ අවශ්‍යතාවක් නොවූ බව පවසමිනි.
“රජය එක්ක තිබුණු ප්‍රශ්න මත තමයි ඒ හැමදේම සිද්ධ වුනේ. එතකොට ඒවා ඔලුවට ගත්තේ රජයයි ගෝඨාභය රාජපක්ෂලා මිසක්, අපි එව්වා ඔලුවට ගත්තේ නෑ,” යි කී හිටපු හමුදාපති ප්‍රකාශ කළේය.
Facebook Comments
