පස් වසරකට ඉහත දී වැලිකඩ හිරගෙදරදී විසි හත් දෙනකු ඝාතනය කිරීමේ ප්‍රහාරය සම්බන්ධයෙන් චෝදනා එල්ල වී තිබෙන ප්‍රධානතම සැකකරු වන පොලිස් මත්ද්‍රව්‍ය නාශක කාර්යාංශ පොලිස් පරීක්ෂක නියෝමාල් රංගජීව ඇප මත මුදා හැර තිබේ.
නියෝමාල් රංගජීව වෙනුවෙන් ඉදිරිපත් වූ ප්‍රතිශේධන පෙත්සමක් සලකා බැලීමෙන් අනතුරුව අභියාචනාධිකරණය 25 අඟහරුවාදා රුපියල් ලක්ෂ 02 බැගින් වූ ශරීර ඇප දෙකක් මත ඔහු මුදා හැරීමට නියෝග කළේය.
සැකකරු හට විදෙස් ගමන් තහනම් පැනවු අධිකරණය සෑම ඉරිදා දිනකම අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙස ද නියෝග කර ඇත.
2012 වසරේ නොවැම්බර් මස 9 දා වැලිකඩ බන්ධනාගාරය තුළදී රැඳවියන් 27 දෙනකු ඝාතනය කිරීමේ සිද්ධියේදී ඝාතනයට ලක් වූ රැඳවියන් ඝාතකයන්ට හඳුන්වා දීමට නියෝමාල් රංගජීව මූලිකත්වය ගෙන ඇති බව, ප්‍රහාරය සම්බන්ධයෙන් සොයා බැලීමට පත් කළ ත්‍රිපුද්ගල කමිටු වාර්තාවෙන් අනාවරණය වී තිබේ.
වැලිකඩ සිරගෙදරට සන්නද්ධව කඩා වැදුණු රජයේ ආරක්ෂක හමුදා සහ සිරකරුවන් අතර 2012 නොවැම්බරයේ ගැටුමකින් මියගිය අයට අමතරව හතළිහකට නොඅඩු පිරිසකට තුවාල සිදුවිය.
වැලිකඩ බන්ධනාගාරයේදී විසි හත් දෙනකු ඝාතනය කරන අවස්ථාවේ එහි සිටි ප්‍රධාන සාක්ෂි කරුවකුට ද පසුගිය වසරේ මරණිය තර්ජනයක් එල්ලවී තිබුනි.
Facebook Comments
