තමන් අත්අඩංගුවට ගැනීම වැළැක්වීමේ නියෝගයක් රහස් පොලීසිය වෙත නිකුත් කරන මෙන් ඉල්ලා හිටපු නාවික හමුදාපතිවරයෙකු ශ්‍රේෂ්ඨාධිකරණයට පෙත්සමක් ඉදිරිපත්කර තිබේ.
අද්මිරාල් වසන්ත කරන්නාගොඩ විසින් ගොනු කරනු ලැබ ඇති මෙම පෙත්සමේ වගඋත්තරකරුවන් වශයෙන් අපරාධ පරීක්ෂණ දෙපාර්තමේන්තුවේ සංවිධානාත්මක අපරාධ අංශයේ ස්ථානාධිපකි නිශාන්ත සිල්වා , එහි අධ්‍යක්ෂ ශානි අබේසේකර , පොලිස්පති පූජිත ජයසුන්දර ඇතුළු පස් දෙනෙකු වග උත්තර කරුවන් ලෙස නම් කර ඇත.
රාජපක්ෂ පාලන සමයේ කොළඹ හා තදාසන්න ප්‍රදේශවල පුද්ගලයින් පිරිසක් අතුරුදහන් කරවීම සම්බන්ධව රහස් පොලිසියේ මෙසේ තමන් අත්අඩංගුවට ගැනීමට සුදානම් වන බවටයි හිටපු නාවික හමුදාපති තම පෙත්සමෙන් දැනුම් දී ඇත්තේ.
පෙත්සම්කරු හිටපු ජනාධිපති මහින්ද රාජපක්ෂ සහ හිටපු ආරක්ෂක ලේකම් ගෝඨාභය රාජපක්ෂ මහතාගේ සමීපතමයෙකු බැවින් රහස් පොලීසිය මේ පිළිබඳ දැඩි උනන්දුවක් දක්වයි. මෙම තත්ත්වය තුළ පෙත්සම්කරු අත්අඩංගුවට ගැනීමේ අවදානමක් පවතින බව පෙත්සම්කරු කියා සිටී. යැයි පෙතසමේ සඳහන් වේ.
හිටපු නාවික හමුදාපති ට්‍රැවිස් සින්නයියා විසින් පෙත්සම්කරුට එරෙහිව ව්‍යාජ තොරතුරු අඩංගු ප්‍රකාශයක් අපරාධ පරීක්ෂණ දෙපාර්තමේන්තුවට ලබා දී ඇති බවත් ලූතිනන් කොමාන්ඩර් වෙළගෙදර නැමැති නිලධාරියා පෙත්සම්කරු ඇතුළු නිලධාරීන් කිහිපදෙනෙකුට එරෙහිව සාවද්‍ය තොරතුරු සහිතව අපරාධ පරීක්ෂණ දෙපාර්තමේන්තුවට පැමිණිලි කර ඇති බවටයි පෙත්සමේ දක්වා ඇත්තේ.
මෙම පරීක්ෂණවල කිසිදු සාධාරණ බවක් හෝ පදනමක් නොමැති බැවින් වගඋත්තරකරුවන්ට නොතීසි නිකුත් කරන ලෙසද ,තම මූලික අයිතිවාසිකම් කඩවී ඇති බව ප‍්‍රකාශ කරන ලෙසද , වගඋත්තරකරුවන්ට එරෙහිව විනය පරීක්ෂණයක් පවත්වන ලෙසද , මෙම පෙත්සම විභාගයට ගෙන අවසන් වන තුරු තමන් අත්අඩංගුවට ගැනීම වළක්වාලන අතුරු නියෝගයක් නිකුත් කරන ලෙසට ද හිටපු හමුදාපති අද්මිරාල් වසන්ත කරන්නාගොඩ සිය පෙත්සමෙන් ඉල්ලා තිබේ.
කෙසේ වෙතත් නාවික හමුදාව විසින් පුද්ගලයන් පැහැර ගැනීමට සම්බන්ධ නඩුවකට අදාළව හිටපු හමුදාපති අද්මිරාල් වසන්ත කරන්නාගොඩ හට රහස් පොලිසියට පැමිණ ප්‍රකාශයක් ලබා දෙන ලෙසට කරන ලද නියෝගයද ඔහු විසින් මඟ හැර තිබු බවට මාධ්‍ය වාර්තා කර තිබුණි.
Facebook Comments
