ශ්‍රී ලංකාවේ යුද අපරාධ සිදුවූ බව ප්‍රතික්ෂේප කරන අමාත්‍යවරුන් දෙදෙනකු අතුරුදහන් වුවන් පිළිබඳ කාර්යාලයේ නිර්දේශ ක්‍රියාත්මක කිරීම බාර කමිටුවට පත් කිරීම නිසා අතුරුදහන් වුවන්ට ආණ්ඩුවෙන් යුක්තිය ඉටු වනු ඇති බවට තිබු අවසන් බලාපොරොත්තුවත් සුන්වී යනු ඇතිදැයි ජාත්‍යන්තර මානව හිමිකම් සංවිධානයක් සැක පල කරයි.
අතුරුදහන් වුවන් පිළිබඳ කාර්යාලය (OMP) ඉදිරිපත් කර ඇති නිර්දේශ ක්‍රියාත්මක කිරීම සඳහා ජනාධිපති වරයා විසින් භාරදී ඇත්තේ දස පුද්ගල කැබිනට් අනු කමිටුවකටය.
එම කමිටුවේ සාමාජිකයකු වන අමාත්‍ය මහින්ද සමරසිංහ බලහත්කාර අතුරුදහන් කිරීම් ඇතුළු යුද අපරාධ ප්‍රතික්ෂේප කර ඇති බව පෙන්වා දෙන දකුණු අප්‍රිකාවේ ජොහැන්නස්බර්ග් මුලස්ථාන කොටගත් ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) ඔහු යුද කලාපයේ හිරවී සිටි නිරායුද වැසියන් පිළිබඳ නිවැරදි සංඛ්‍යා ලේඛන ඉදිරිපත් නොකළ බවද පෙන්වා දෙයි.
එමෙන්ම එම කමිටුවේ නායකත්වයට පත් කර ඇති විජයදාස රාජපක්ෂ අමාත්‍යවරයාගේ සුදුසුකමද ITJP විසින් ප්‍රශ්න කොට ඇත.
OMP කාර්යාලය සම්බන්ධයෙන් ආණ්ඩුව බරපතල ලෙස සලකන්නේ ද යන ප්‍රශ්නය ඔවුන්ගේ පත්වීම නිසා මතුවන බව පවසන ITJP සංවිධානය අමාත්‍ය මණ්ඩල අනු කමිටුවට සිය කාර්ය භාරය නිම කිරීම සඳහා දින නියමයක් නොදීමෙන් සිදුවන්නේ කල් මැරීමක් ද යන ප්‍රශ්නයද මතු කරයි.
යස්මින් සූකා
“ජාත්‍යන්තර ප්‍රජාවේ බොහෝදෙනා විසින් අතුරුදහන් වුවන් පිළිබඳ කාර්යාලය සලකනු ලබන්නේ ශ්‍රී ලංකාවේ වගවීම පිළිබඳ අන්තිම බලාපොරොත්තුව ලෙසයි.” යනුවෙන් ITJP විධායක අධ්‍යක්ෂිකා යැස්මින් සුකා පවසන්නීය.
යුද්ධාවසානයේ ශ්‍රී ලංකා යුද හමුදා අත් අඩංගුවට පත්වූවන්ට අත්වූ ඉරණම හෙළි කරගැනීම ප්‍රමුඛත්වයෙහි ලා සලකන බව OMP කාර්යාලය තිර කොට කියා තිබියදී භාරවුවන් ඝාතනය නොකළේ යැයි මෑතදී කොළඹදී මාධ්‍යවේදීන් අමතා කළ ප්‍රකාශයද මහින්ද සමරසිංහ අමාත්‍යවරයා ගේ යෝග්‍යතාව ප්‍රශ්න කිරීමට හේතුවක් ලෙසින් ITJP සංවිධානය විසින් දක්වා තිබේ.
ආගමික අන්තවාදීන්ට අනුග්‍රහ දක්වන බවට චෝදනා ලබන, සුළු ආගමිකයන්ට, ප්‍රකාශනයේ නිදහසට හා සමලිංගික අයිතියට විරෝධය දක්වා ත්‍රස්තවාදය වැළක්වීමේ පනත ඇතුළු මර්දනීය අනපනත් ප්‍රතිසංස්කරණය සඳහා යෝජනා එක්සත් ජාතීන්ගේ සංවිධානය විසින් ඉදිරිපත් කරන විට ඊට දැඩි ලෙස විරුද්ධවූ පුද්ගලයකු ලෙස සහ මානව හිමිකම් ක්ෂේත්‍රයේ විරෝධයට පාත්‍රවූ ක්‍රියාකාරකම් ගණනාවක් කළ අයකු ලෙසද, විජයදාස රාජපක්ෂ අමාත්‍යවරයා කටයුතු කර ඇති ආකාරය පිළිබඳ විස්තර ITJP සිය නිවේදනය සමග නිකුත් කර තිබේ.
Facebook Comments
