නැගෙනහිර පළාතේ මුස්ලිම් ජනයාගේ ඉඩම් බලහත්කාරයෙන් කොල්ලකන බවට සංඝනායක හිමිනමකට යලිත් වරක් චෝදනා එල්ල වී තිබේ.
පුල්මුඩේ, අංක 1 ග්‍රාම නිලධාරී වසමේ පදිංචි මුස්ලිම් පවුල් හයකට අයත් කෘෂිකාර්මික ඉඩම් බලහත්කාරයෙන් අත්පත් කර ගැනීමට වෑයම් කරන්නේ උතුර සහ නැගෙනහිර දෙපළාතේ සහ තමන්කඩුව දිශාවේ ප්‍රධාන සංඝනායක අරිසිමලේ ආරණ්‍ය සේනාසනාධිපති පනාමුරේ තිලකවංශ හිමියන් බවයි ප්‍රදේශවාසින් පවසන්නේ.
පනාමුරේ තිලකවංශ හිමියන් නැගෙනහිර පළාතේ පුරාවිද්‍යා උරුමයන් කළමනාකරණය සඳහා හිටපු ජනාධිපති ගෝඨාභය රාජපක්ෂ විසින් දේශීය හා ජාත්‍යන්තර විරෝධය මධ්‍යයේ ආරක්ෂක ලේකම් කමල් ගුණරත්නගේ නායකත්වයෙන් පත්කළ ජනාධිපති කාර්ය සාධක බලකායේ ඉදිරිපෙළ සාමාජිකයෙකි.
සැප්තැම්බර් 22 දා පනාමුරේ තිලකවංශ හිමියන් සහ ඔහුගේ සහෝදරයකු බැකෝ යන්ත්‍රණයක් යොදා භුමිය ශුද්ධ කරමින් සිටියදී, එම ස්ථානයට පැමිණි ඉඩම් හිමියන් එයට විරෝධය දක්වමින් සදහන් කළේ එම ඉඩම් සදහා තමන්ට ඔප්පු ඇති බවයි.
භුමිය ශුද්ධ කිරීමේ කටයුතු නවතාලීම වෙනුවෙන් ඔවුන් බැකෝ යන්ත්‍රයටද ගොඩවී ඇති අතර එයින් ඇද වැටී තුවාල ලබා සැමිසුඩීන් සුලයිකා නැමැති 42 වියැති අයකු රෝහල් ගත කර ඇති බව පළාත් බද වාර්තාකරුවන් සදහන් කරයි.
පැමිණි මුස්ලිම් වැසියන්ට පනාමුරේ තිලකවංශ හිමියන් ජාතිවාදී බසින් බැන වදින ආකාරය ප්‍රදේශවාසීන් විසින් විඩියෝ ගත කර සමාජ මාධ්‍ය වලට නිකුත් කර ඇති වීඩියෝ වල දැක ගත හැකිය.
” වද දෙන්නැතුව පලයව් බං. වදනොදී. මොන කාලකණ්නි හැත්තක් ද උඹලා. ඇයි බං මේ පන්සල් ඉඩමක බව දන් නැද්ද උඹලා.” යනුවෙන් බැදවදින හිමියන් තවත් වරෙක මුස්ලිම් ජනයාට බැන වදින්නේ “මහ කාලකණ්නි ජාතියක් බං” යනුවෙනි.
පනාමුරේ තිලකවංශ හිමියන් පවසන්නේ තමන් ශුද්ධ කරන ඉඩම් වල අයිතිය පන්සල සතු බවයි.
ආරක්ෂක සෙබළුන්ගේ රැකවරණ යටතේ මුහුදුබඩ ඉඩමක් කොල්ලකෑමට උත්සාහ කළ අවස්ථාවක විරෝධය පෑ මුස්ලිම් සහ දෙමළ වැසියන්ට තිලකවංශ හිමියන් ගේ ශරීරාරක්ෂකයෙක් ගිනි අවි අමෝරා තර්ජනය කළ කිරීමක් ඉකුත් අප්‍රේල් මාසයේ වාර්තා විය.
දෙමළ සහ මුස්ලිම් ජනයා වසර ගණනාවක් තිස්සේ කෘෂිකාර්මික කටයුතු සදහා භාවිත කරන ත්‍රිකුණාමලය දිස්ත්‍රික්කයේ කුච්චවේලි ප්‍රාදේශීය ලේකම් කොට්ඨාශයේ පුල්මුඩේ, පොන්මලෙයි කන්ද ආශ්‍රිත භුමිය බෞද්ධාගමික ඉදිකිරීමක් සදහා අත්පත්කරගැනීමට පුරා විද්‍යා දෙපාර්තමේන්තුවේ නිලධාරීන් සමග මාර්තු 30 වැනිදා පනාමුරේ තිලකවංශ හිමියන් ඇතුළු භික්ෂුන් දැරූ උත්සාහය ජනතා විරෝධය හමුවේ නවතා දමා තිබුනි.
Facebook Comments
