වධහිංසාවට එරෙහි සම්මුතිය යටතේ, ශ්‍රී ලංකාවේ වගවීම සහතික කරන ලෙස එක්සත් ජනපද කොංග්‍රසයේ ආණ්ඩු පක්ෂ හා විරුද්ධ පක්ෂ මන්ත්‍රීවරුන් 12 දෙනෙක් රාජ්‍ය ලේකම් ඇන්තනි බ්ලින්කන්ගෙන් ඉල්ලා තිබේ.
දෙමළ ජනතාවට එරෙහිව ශ්‍රී ලංකා හමුදාවෙන් සහ අනෙකුත් රාජ්‍ය ආයතනයන්ගෙන් මුහුණදීමට සිදු වූ ම්ලේචඡ වධහිංසා පිලිබඳ ප්‍රධාන අවධානයක් සිය ලිපිය මගින් ඔවුන් යොමු කර ඇත.
ඩිමොක්‍රටික් පක්ෂයේ කොංග්‍රස් මන්ත්‍රීවරියක් වන සමර් ලී සහ ඩිමොක්‍රටික් පාක්ෂික මන්ත්‍රී බිල් ජොන්සන් ගේ ප්‍රධානත්වයෙන් ඔවුන් එක්සත් ජනපද රජයට කියා ඇත්තේ “දෙමළ ජනතාවට එරෙහිව සිදු කරන ලද මානව හිමිකම් උල්ලංඝනය කිරීම් සහ ජාත්‍යන්තර මානුෂීය නීතිය උල්ලංඝනය කිරීම් සම්බන්ධයෙන් ශ්‍රී ලංකාව විධිමත් ලෙස වගවිය යුතු” බවයි.
දේශීය දේශපාලන වෙනස්කම් අතහැර ඒකාබද්ධ ලිපියක් මගින් ඔවුන් එක්සත් ජනපද රාජ්‍ය දෙපාර්තුමේන්තුවෙන් ඉල්ලා ඇත්තේ එක්සත් ජාතීන්ගේ සංවිධානයේ වධහිංසා සම්මුතියට ශ්‍රී ලංකාවේ නෛතික වගඋත්තරදායකත්වය ලබාගන්නා ලෙසයි.
“අපගේ මතයට අනුව ශ්‍රී ලංකාවේ අපරාධකරුවන් විසින් තවමත් භුක්ති වඳින දණ්ඩ මුක්තිය ශ්‍රී ලංකාවේ ආර්ථික සහ දේශපලනික අර්බුදයන්ටත් හේතු වී තිබෙන අතර මානව හිමිකම් සුරැකීමට සහා ප්‍රජාතන්ත්‍රවාදී මූලධර්ම ආරක්ෂා කිරීමට කැපවී සිටින රටක් වශයෙන් ඇමරිකාව මෙම ක්‍රියාකාරකම් වලට විරුද්ධ විය යුතු බවත් එය නවතා දැමීමට කටයුතු කලයුතු බවයි.”
ශ්‍රී ලංකාවේ රජය සහ හමුදාව බරපතල ජාත්‍යන්තර අපරාධ සිදු කර ඇති බවට ලිපියට අත්සන් කළ දොලොස් දෙනා චෝදනා කර ඇත.
“එල්ටීටීඊය සහ ශ්‍රී ලංකා හමුදාව අතර යුදමය ගැටුමේදී ජාත්‍යන්තර අපරාධ සිදු කළ බවට ශ්‍රී ලංකා රජයට සහ හමුදාවට විශ්වාසනීය ලෙස චෝදනා එල්ල වී තිබේ. ශ්‍රී ලංකා හමුදාව 2009 ජනවාරි සිට මැයි දක්වා ඊනියා යුද මුක්ත කලාපවල දෙමළ සිවිල් වැසියන්ට සහ රෝහල් ඇතුළු සිවිල් දේපළ වලට හිතාමතාම ෂෙල් වෙඩි ප්‍රහාර එල්ල කළ නිසා ශ්‍රී ලංකා හමුදාවේ ක්‍රියාකලාපය විශේෂ අවධානයට ලක්විය යුතුයි”.
තවද යුද සමයේදී දෙමළ ජනතාවට එරෙහිව හමුදාව විසින් සිදු කරන ලද ලිංගික අපයෝජන පිළිබඳව ද ඔවුන් පෙන්වා දී තිබේ.
“ශ්‍රී ලංකා රජය සහ හමුදාව විසින් දෙමළ කාන්තාවන් සහ ගැහැණු දරුවන් සිය ගණනකට ආසන්න ප්‍රමාණයක් ඝාතනය කිරීමට පෙර දුෂණය කර ලිංගික අංගඡේදනයට ලක් කර තිබුණි.”
ශ්‍රී ලංකාවේ වගඋත්තර දායකත්වයක් නැති වූවද බරපතළ ලෙස මානව හිමිකම් කඩ කළ පුද්ගලයන්ට වරදාන පිරිනැමීමේ සංස්කෘතියක් රට තුළ පවතින බව ඔවුන් කියා සිටී.
“මෙම මානව හිමිකම් කඩ කිරීමේ චෝදනා විමර්ශනය කිරීම සහ නඩු පැවරීම වෙනුවට, ශ්‍රී ලංකා රජය බොහෝ යුද අපරාධකරුවන්ට ඉහළ පෙළේ දේශපාලන හෝ හමුදා ප්‍රධානී තනතුරු තෑගී ලෙසින් ලබා දී ඇති අතර, ඇතැමුන් අදටත් එම තනතුරු දරමින් සිටී.”
යුක්තිය සහ වගවීම සම්බන්ධයෙන් ප්‍රත්‍යක්ෂ ප්‍රගතියක් ලබා නොගැනීම සම්බන්ධයෙන් අනුප්‍රාප්තික ශ්‍රී ලංකා රජයන් වගකිව යුතු බවත්, ඒ සඳහා වධහිංසාවට එරෙහි සම්මුතියේ 30 වැනි වගන්තිය අනුගමනය කරන ලෙස ඔවුහු රාජ්‍ය දෙපාර්තමේන්තුවෙන් ඉල්ලා සිටිති.
මේ ශ්‍රී ලංකාව ගිවිසගත් බැඳීම් කඩ කිරීම සම්බන්ධයෙන් විධිමත් වගකීමක් සහතික කිරීම සහ පැවරීම වෙනුවෙනි.
වගවීම සහතික කිරීම සහ දණ්ඩමුක්තියේ සංස්කෘතිය අවසන් කිරීම සහ දෙමළ වින්දිතයන් බේරා ගැනීම සඳහා ත්‍රිවිධ උපාය මාර්ගයක් ද ඔවුන් යෝජනා කර ඇත.
පළමුව විධිමත් සාකච්ඡා මාර්ගයෙන් මෙය සාක්ෂාත් කර ගැනීමට යෝජනා කරන අතර, එම සාකච්ඡා නිෂ්ඵල භාවයෙන් හෝ අවහිර වීමෙන් අසාර්ථක වුවහොත්, මීළඟ පියවර ලෙස බේරුම්කරණය ක්‍රියාවට නැංවිය යුතු බවත් මාස හයක් ඇතුළත ආරවුල විසඳා නොගතහොත්, තම රජය ශ්‍රී ලංකාවට එරෙහිව ජාත්‍යන්තර අපරාධ අධිකරණය හමුවේ කරුණු දැක්විය යුතු බවත් එක්සත් ජනපද මන්ත්‍රී කණ්ඩායම ඉල්ලා තිබේ.
ශ්‍රී ලංකාවේ මෙන්ම ඇමරිකා එක්සත් ජනපදයේද ආණ්ඩු ජාත්‍යන්තර අපරාධ අධිකරණය ස්ථාපිත කළ රෝම ප්‍රඥප්තියට අත්සන් තබා නැත.
Facebook Comments
