යෝජිත නව ව්‍යවස්ථාව හරහා පාර්ලිමේන්තුව ශක්තිමත් කරන ක්‍රමයක් ඇති කිරීමට කැමැත්ත පළ කර ඇති ජනපති තම සහාය හිමි වන්නේ එවැනි ව්‍යවස්ථාවකට බව ප්‍රකාශ කර තිබේ.
හොඳ රටක් හැදීමට ව්‍යවස්ථාවේ වෙනසක් අවශ්‍ය බව ජනපති මෛත්‍රීපාල සිරිසේන 31 බ්‍රහස්පතින්දා හොරණ ඓතිහාසික ඔලබොඩුව ශ්‍රී ජයවර්ධනාරාම රජමහා විහාරස්ථානයේ පැවැති උත්සවයක දී ප්‍රකාශ කර ඇත.
කෙසේ වෙතත් පාර්ලිමේන්තුව ශක්තිමත් කරන ආකාරය හෝ විධායක ජනාධිපති ක්‍රමය අහෝසි කිරීම ගැන ජනාධිපතිවරයා කිසිවක් ප්‍රකාශ කර නැත.
ශක්තිමත් පාර්ලිමේන්තුවක් නොමැතිවීමේ අනිසි ප්‍රතිඵලය වන්නේ රටේ අනාගතය සඳහා අවශ්‍ය තීන්දු තීරණ ක්‍රියාවට නැංවීමට නොහැකිවීම මෙන්ම දේශපාලන ස්ථාවරත්වය ද අඩපණ වීම බව ජනපති පෙන්වා දී ඇත.
නව ව්‍යවස්ථාව පිළිබඳව ඇතැමුන් අදහස් ප්‍රකාශ කල ද තමා අතට තවමත් එවැන්නක් පත්වී නොමැති අතර ඒ පිළිබඳ දැනුවත්වීමක් ද සිදු වී නොමැති බව ජනපති පැවසීය.
ව්‍යවස්ථාවක් පිළිබඳ කතා කිරීම එක් පැත්තකින් දකුණේ බෞද්ධ ජනතාව නොසන්සුන් කිරීමක් වන අතර අනෙක් පැත්තෙන් උතුරේ ජනතාව රැවටීමක් බව ද ජනාධිපතිවරයා වැඩි දුරටත් චෝදනා කළේය.
Facebook Comments
