ශ්‍රී ලංකාවේ ආරක්ෂක ලේකම්වරයා විසින් ප්‍රසිද්ධියේ කරන ලද ඉල්ලීමකට අනුව යුද හමුදාවේ දෙවෙනි ප්‍රධානීයාට එරෙහිව යුද අපරාධ චෝදනා ගොණු කිරීමට අවශ්‍ය සාක්ෂි සහිත වාර්තාවක් ජාත්‍යන්තර මානව හිමිකම් සංවිධානයක් විසින් එවා තිබේ.
මෙරට ආරක්ෂක අංශ විසින් සිදු කරන ලද අපරාධ සම්බන්ධ සාක්ෂි වෙතොත් ඔවුන් හට නඩු පැවරීමට ඒවා ලබා දෙන ලෙස ආරක්ෂ ලේකම් හේමසිරි ප්‍රනාන්දු ඔහු වෙනුවෙන් ආනන්ද විදුහලේ පැවති උපහාර උළෙලකදී විදෙස්ගත ඩයස්පෝරාවට අභියෝග කළේය.
“ලංකාවේ සිදුවෙච්ච බිහිසුණු මිලේච්ජ මිනිමැරුම් කළ 11 දෙනෙකුට අපි ඉදිරියේ දී නඩු පවරනවා. එතකොට ඩයස්පෝරාවට කියන්න බැහැ මානව හිමිකම් කඩකරපු හමුදා නීතිය කඩපු අයට දඬුවම් දෙන්නේ නැහැ කියලා.” යි ආරක්ෂක ලේකම් හේමසිරි ප්‍රනාන්දු 21 සඳුදා කොළඹ නාලන්දා විද්‍යාලයේ උත්සවයකට එක්වෙමින් පැවසීය.
“අපි එදාට අභියෝග කරනවා ඩයස්පෝරා එකට උඹලට තියෙනවා නම් තවත් මේ වගේ ඔප්පු කරන්න පුලුවන් සාධක ඇති, ඒ වාගේ මිනීමැරුම් ගැන අපිට දෙන්න. අපි ඒවත් දඬුවම් දෙනවා.” ආරක්ෂ ලේකම්වරයා කියා සිටියේය.
ඒ අනුව ජනාධිපතිවරයා විසින් යුද හමුදාපතිවරයාට පමණක් දෙවෙනි වන යුද හමුදා මාණ්ඩලික ප්‍රධානී ධුරයට පත් කරන ලද මේජර් ජෙනරාල් ශවේන්ද්‍ර සිල්වාට මහත් සේ වරද පවරන චෝදනා රැගත් පිටු 137 ක වාර්තාවක් ඔහුට එරෙහිව නඩු පැවරීමට ශ්‍රී ලංකාවේ ආරක්ෂක ලේකම් හේමසිරි ප්‍රනාන්දු වෙත යැවු බව යැස්මින් සූකා ගේ ප්‍රධානත්වයෙන් යුත් ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) පවසයි.
සිය අලුත්ම වාර්තාව යුද සමයේ කවර හෝ සෙන්පතියකුට එරෙහිව මේතාක් සම්පාදනය කරන ලද වඩාත් සවිස්තරාත්මක සාක්ෂි සම්පිණ්ඩනය බව පවසන ITJP, ශ්‍රී ලංකා රජයේ ආරක්ෂක අංශ වල සේවය කළ පුද්ගලයන් විසින්ද සපයන ලද ඡායාරූප, අදාළ සමයේ කෙටි ජංගම පණිවිඩ සහ සාක්ෂි වාචක මෙන්ම, සත්‍යය වසන් කිරීමේ අරමුණින් යුතුව පසු කලෙක අන්තර්ජාලයෙන් ඉවත් කරගන්නා ලද නිල හමුදා නිවේදන සහ එක්සත් ජාතීන්ගේ විමර්ශන වාර්තා වලින් සොයාගන්නා ලද කරුණු ද එහි ඇතුලත් බව කියා සිටී.
ශ්‍රී ලංකා යුද හමුදාවේ දෙවැනියා සම්බන්ධයෙන් තමන් විසින් ගොනු කර ඇති විස්තර වලට වඩා අඩු තොරතුරු ප්‍රමාණයක් මත පදනම් වී ජාත්‍යන්තර විනිශ්චය සභා ජාත්‍යන්තර අපරාධ අධිකරණය විසින් නඩු නිම කර ඇති බව ITJP අවධාරණය කරයි.
ශවේන්ද්‍ර සිල්වාගේ අණ යටතේ පැවති 58 වැනි සේනාංකය 2008-9 වකවානුවේ ශ්‍රී ලංකාවේ උතුරේ ගම් හා නගර ගණනාවකට එල්ල කළ ප්‍රහාර පිලිබඳ විස්තර ඇගේ මෙහෙයවීමෙන් සම්පාදනය කරන ලද තොරතුරු ගොනුවේ දැක්වෙයි.
කුප්‍රකට සුදුකොඩි භාරවීමේ සඳහන් එල්ටීටීඊ දේශපාලන නායකයන් වන සීවරත්නම් පුලිදේවන් සහ බාලසිංහම් නඩේසන් දෙදෙනා යුද්ධය අවසානයේ දී 58 සේනාංකයට යටත් වීමේදී මේජර් ජෙනරාල් ශවේන්ද්‍ර සිල්වා ට පුද්ගලිකවම අතට අත දුන් බව සිද්ධිය සියැසින් දුටු අයකු තහවුරු කර ඇතැයි ද ITJP පවසයි.
Facebook Comments
