උතුරේ ධීවරයන් දෙදෙනකුගේ මරණ වලට ඉන්දීය ධීවරයන්ගේ සබඳතා ඇත්දැයි ඉන්දියාව විමර්ශනයක් අරඹා තිබේ.
වඩමාරච්චියේ වත්තිරායන්හි පදිංචි ජෝශප් ප්‍රේම්කුමාර් සහ අරුන් කුමාර් තනියෛමාරන් නම් ධීවරයන් යාත්‍රා කළ බෝට්ටුව ඉන්දීය ට්‍රෝලර් යාත්‍රාවක ගැටී ඉකුත් 30 වැනිදා මුහුදු බත් වීමෙන් අනතුරුව මියගිය ගොස් සිටි ඔවුන් දෙදෙනාගේ සිරුරු පසු දින වෙරළට ගසා ගෙන ඒමත් සමගම යාපනය අර්ධද්වීපයම උණුසුම් කරමින් විරෝධතා ඇරඹිණි.
උද්ඝෝෂකයන් විසින් චෝදනා කරනු ලැබුවේ සිමා මායිම් පැන පැමිණි ඉන්දීය ධීවරයන් ප්‍රේම් කුමාර් හා අරුන් කුමාර් ධීවරයන් දෙදෙනාට පහර දී ඇති බවටයි.
තවත් ඉන්දීය ට්‍රෝලර් යාත්‍රාවක් වට කළ වඩමරාච්චි ධීවරයන්ට පෙට්‍රල් බෝම්බ ප්‍රහාර එල්ල කළ බවට චෝදනා කෙරේ.
“මේ ධීවරයන් දෙන්නාට පහර දීලා, බෝට්ටු ගිල්වා මරා දැමූ බවට උතුරේ ධීවරයෝ උද්ඝෝෂණ රැසක් පැවැත්වුවා. හැමෝම මේ ගැන කතා කරන්නේ අමනාපෙන්. ඒත් ඇත්ත මොකක්ද කියලා හොයා බැලුවේ නැහැ.උතුරේ ධීවරයන්ට පහර දුන්නා ද,රාත්‍රියේ මුහුදේ සිදු වුනේ මොකක්ද කියලා,“යැයි ඉන්දීය ධීවර සම්මේලනයේ නායක බෙන්සින්ලාස් ජේසුරාසා අවධාරණය කරයි.
“ඉන්දීය ධීවර සංගම් තමිල්නාඩු ප්‍රාන්ත ආණ්ඩුව සමග එක්ව ඉන්දීය ධීවරයන් මෙම මරණ වලට සම්බන්ධදැයි විමර්ශනය කරනවා.“
ඉන්දීය මධ්‍යම ආණ්ඩුව හා ලංකාවේ ආණ්ඩුව ධීවරයන්ගේ ගැටළු අත්හැර දමා ඇති බැවින් දෙරටේ දෙමළ ධීවරයන් අතර එකතුවකට මග විවරව ඇතැයිද ඉන්දීය ධීවර නායකයා පෙන්වා දෙයි.
“එකම බසකට, සංස්කෘතියකට හිමිකම් කියනා තමිල්නාඩු හා උතුරු ලංකාවේ ධීවරයන් අතර පවත්නා ගැටළු නිරාකරණය කර ගන්න දැන් අවස්ථාව එළඹී තියෙනවා,“යැයි ජේසුරාසා මාධ්‍යයට කියා සිටියේ දෙරට අතර ධීවරයන්ගේ ගැටලුව ගැන තමිල්නාඩු ධීවරයන්ගේ ස්ථාවරය පැහැදිලි කරමින්ය.
දකුණු ඉන්දීය හා උතුරු ලංකා ධීවරයන් දිගු කලක් පුරා මසුන් මරමින් සිටියේ සමීප ඥාතීන් ලෙස බවද ඔහු පවසයි.
මේ අතර ඉන්දීය මධ්‍යම ආණ්ඩුවට හා ලංකා ආණ්ඩුවට එරෙහිව උද්ඝෝෂණය කළ රාමේශ්වරම් ධීවරයෝ, ලංකා නාවික හමුදාව විසින් අත්අඩංගුවට ගත් ඉන්දීය ධීවරයන් 11 දෙනා හා ඔවුන්ගේ බෝට්ටු නිදහස් කරන ලෙසත්, පහරදීම් හා අත්අඩංගුවට ගැනීම් නවතා දමන ලෙසත්, නාවික හමුදා බාරයට ගත් තම බෝට්ටු හා ආම්පන්න වෙන්දේසිය නවතා ආපසු ලබා දෙන ලෙසත් ඉල්ලා සිටියහ.
ඒ සඳහා පසුගිය සිකුරාදා සිට දින 15 ක කාලයක් ඉන්දීය මධ්‍යම ආණ්ඩුවට ලබා දී තිබේ.
ධනුෂ්කොඩි ආසන්න මුහුදේ මසුන් මරමින් සිටි තමිල් නාඩු ධීවරයන්ව මුර සංචාරයේ යෙදී සිටී ලංකා නාවික හමුදා සෙබළුන් විසින් පළවා හැර ඇත්තේ ඉන්දීය රුපියල් ලක්ෂයක් පමණ වටිනා දැල් ආම්පන්න වලට හානි කරමින් බව රාමේශ්වරම් ධීවර සංගම් චෝදනා කරයි.
එම ධීවර සංගම් පවසන්නේ මෙම සිදුවීම් හමුවේ රාමේශ්වරම් ධීවරයන් මසුන් සොයා මන්ගලෝර් වැනි ප්‍රදේශ කරා යාත්‍රා කරන බවයි
Facebook Comments
