පොලිසිය විසින් කරන ලද විමර්ශනයකින් අනතුරුව චෝදනාවලින් නිර්දෝෂී වූ කෙනකු ආණ්ඩු වෙනස් වීමෙන් පසු නැවත එකී චෝදනාවන්ටම වැරදිකරු වන්නේ කෙසේදැයි මුස්ලිම් ජනනායකයෙක් විමසයි.
2019 අප්‍රියෙල් 21 පාස්කු ඉරිදා එල්ල වූ මරාගෙන මැරෙන බෝම්බ ප්‍රහාර මාලාවට තමාගේ කිසිදු සම්බන්ධයක් නොමැති බවට රටේ පොලිස් ප්‍රධානියා විසින් එවකට සිටි පාර්ලිමේන්තු මහලේකම්වරයාට ලිඛිතව දැනුම් දී තිබියදීත් නැවත චෝදනා එල්ලවීම පිළිබඳව යහපාලන රජයේ හිටපු වාණිජ හා කර්මාන්ත අමාත්‍ය රිෂාඩ් බදියුද්දීන් සමස්ත ලංකා ජනතා කොන්ග්‍රසයේ නායකයා මාධ්‍ය හමුවකදී කනස්සල්ල පළකර සිටියේය.
පාස්කු ප්‍රහාරය සඳහා බෝම්බ නිෂ්පාදනය කළ බවට සැක කෙරෙන ඉන්ෂාෆ් අහමඩ් ගේ කර්මාන්ත ශාලාවට සිය අමාත්‍යාංශයෙන් සුළු ප්‍රමාණයක් තඹ ලබා දුන් නමුත් ආරක්ෂක අමාත්‍යාංශය ඇතුළු සිංහල බෞද්ධයන් අධිකාරිත්වය ඉසිලූ වෙනත් ආයතනවලින් මහා පරිමාණයෙන් තඹ ලබා දී ඇති අයුරු පෙන්වා දෙන සමස්ත ලංකා ජනතා කොන්ග්‍රසයේ නායකයා තමා මුස්ලිම් ජාතිකයෙක් නිසා සියලු වැරදි තමාපිට පැටවීම සාධාරණ නොවන බවට ආණ්ඩුවට චෝදනා කරයි.
මුස්ලිම් දේශපාලනඥයකු හා ආණ්ඩුවට සහය නොදක්වන්නකු වීම නිසා ගෝඨාභය රාජපක්ෂ ජනාධිපතිවරයාගේ වර්තමාන රජයේ නීතිය තමන්ට වෙනස් කොට සලකා ඇතැයි පවසන හෙතෙම සැකකරුවකු සමග පුළුල් සම්බන්ධයක් පැවැත්වූ ආණ්ඩු පක්ෂයේ ආධාරකරුවකු නිදහස් කර යැවූ පොලිසිය එම සැකකරුවා සමග අඩුමට්ටමේ සම්බන්ධයක් පැවැත්වූ සිය සහෝදර හිටපු පළාත් සභා මන්ත්‍රී රිෆ්කාන් බදියුද්දීන් දිගටම සිරගත කොට තබාගෙන සිටින බව පැවසුවේ හැඟුම්බරවය.
“මෙවර ඡන්දයට නාමයෝජනා භාරදීලා සති 3ක් ගතවෙද්දී මගේ සහෝදරයා අත්අඩංගුවට ගත්තා. මරාගෙන මැරුණු බෝම්බකරුවෙක් වූ ඉන්සාම් ඉබ්‍රාහීම් මගේ මල්ලීට කෝල් 6 ක් 7 ක් අර ගෙන තියෙනවා කියල තමයි චෝදනාව. නමුත් එදාම පොහොට්ටුවේ ආධාරකරුවෙක් අත්අඩංගුවට ගත්තා බෝම්බකරුවන්කරුවන් දෙදෙනෙක්ට කෝල් 256 ක් අරගෙන තියෙන. හැබැයි ආණ්ඩු පක්ෂයේ කෙනෙක් නිසා එයා එදාම නිදහස් වුනා”.
සිය සහෝදරයා අධිකරණයට හෝ ඉදිරිපත් නොකරමින් අත්අඩංගුවේ රඳවා තබා ගැනීමට එරෙහිව මේ වනවිට මුලික මිනිස් අයිතිවාසිකම් නඩුවක් පවරා තිබෙන අධිකරණයෙන් සාධාරණයක් ඉටුවේයැයි ද බදුර්දීන් පක්ෂ නායකයා විශ්වාසය පල කළේය.
කියන හැම දේම ඇත්ත නොවේ
දේශපාලන පලිගැනීම් පිලිබඳ සොයා බැලෙන විශේෂ ජනාධිපති කොමිසම ඉදිරියේ එක් එක් පුද්ගලයන් කරන්නා වූ ප්‍රකාශ සියල්ලම සත්‍ය නොවන බව පවසන බදුර්දීන් හිටපු ඇමතිවරයා පාස්කු ප්‍රහාරය පිලිබඳ සොයා බැලූ පාර්ලිමේන්තු තේරීම් කමිටුව, රහස් පොලිසිය හා විශේෂ ජනාධිපති කොමිසම හමුවේ ඉදිරිපත් වී ඇති සියලු කරුණු සම්පිණ්ඩනය කරමින් තීන්දුවකට පැමිණීම සාධාරණ බවද අවධාරණය කළේය.
මේ අතර මාධ්‍ය සාකච්ඡාවකට සහභාගී වූ ජාලිය සේනාරත්න පොලිස් මාධ්‍ය ප්‍රකාශකයා රිෂාඩ් බදියුද්දීන් හිටපු අමාත්‍යවරයා පාස්කු ඉරිදා සිදුවූ ත්‍රස්තවාදී කටයුතුවලට සම්බන්ධ නැතැයි වැඩබලන පොලිස්පතිවරයා 2019.6.20 දින පාර්ලිමේන්තු මහලේකම්වරයාට වාර්තාවක් යැවූ බව පිළිගනිමින් එම වාර්තාව මාධ්‍යවේදීන්ටද ප්‍රදර්ශනය කළේය. නමුත් එම වාර්තාවේ සඳහන්ව ඇතැයි කියන “මෙතෙක් සිදුකරන ලද විමර්ශනයේදී” යන වචනය පුනරුච්චාරණය කරමින් අවධාරනය කළේ ඉන්පසු කරන ලද විමර්ශනයන් ගෙන් හිටපු ඇමැතිවරයා ත්‍රස්තවාදී කටයුතුවලට සම්බන්ධ බවට තොරතුරු ලැබී ඇති බවයි.
කෙසේ වෙතත් දෙමළ ජනඝාතක යුද්ධයට සහාය දෙමින් එල් ටී ටී ඊ ය පරාජය කරන්නට දකුණේ සිංහල බෞද්ධ ආණ්ඩුව සමඟ අත්වැල් බැඳගත් තමනට යුද ජයග්‍රහණයෙන් පසු රාජපක්ෂ ආණ්ඩු වලින් කරන්නා වූ අවමන් සහගත සැලකිලි පිළිබඳව විස්සෝපයෙන් සිටින බව සමස්ත ලංකා ජනතා කොන්ග්‍රසයේ නායක රිෂාඩ් බදියුද්දීන් මාධ්‍යවේදීන් හමුවේ කියා සිටියේය.
Facebook Comments
