දැඩි ආර්ථික දුෂ්කරතා මධ්‍යයේ වුවද ගෙවුණු වසර තුන තුළ ජනතාවට සහන ලබාදෙමින් රට ඉදිරියට ගෙන යාමට හැකි වූ බව පවසන අගමැතිවරයා ආණ්ඩුවේ මීළඟ පියවර වන්නේ රටේ කර්මාන්ත හා ව්‍යාපාර දියුණු කරමින් විදේශ විනිමය වැඩි කර රටේ ණය බර සම්පූර්ණයෙන්ම ගෙවා දැමීම බව පවසයි.
හිටපු ජනපති මහින්ද රාජපක්ෂ විසින් වසර දෙකකට කලින් ජනාධිපතිවරණයක් කැඳවුයේ රට ගෙනයාමට මුදල් නොතිබීම හා සෑම අතකින්ම රට විනාශයට තල්ලු වී ගොස් තිබු නිසාවෙන් බවයි අගමැති රනිල් වික්‍රමසිංහ පෙන්වා දෙන්නේ.
“2015 දී අපි මේ ආණ්ඩුව බාර ගන්නා විට රටේ ආර්ථිකය මුළුමනින්ම කඩා වැටී තිබුණා. රට විශාල ණය උගුලක සිර වී සිටියා. එදා රට ඉදිරියට ගෙන යාමට මුදල් තිබුණේ නැහැ. සෑම පැත්තකින්ම රට විනාශයට තල්ලූ වී තිබුණා. උද්ගතව තිබූ ඒ තත්ත්වය මත රට තවදුරටත් ඉදිරියට ගෙන යාමට නොහැකිව, පාලන කාලය වසර දෙකක් ඉතිරිව තිබිය දී මහින්ද රාජපක්ෂ හිටපු ජනාධිපතිවරයා හදිසි ජනාධිපතිවරණයක් කැදෙව්වා.” යි අගමැතිවරයා 15 සෙනසුරාදා මාතලේ, එඩ්වඩ් ක්‍රීඩාංගනයේ පැවැති සමෘද්ධි සහනාධාර හිමිකම් ප්‍රදානය කිරීමේ උත්සවයට සහභාගි වෙමින් පැවසීය.
එවක පාලකයින් ලබාගෙන තිබූ මහා ණය කන්දරාවේ පොලිය ගෙවීමටවත් රටේ ආදායම ප්‍රමාණවත් නොවන තරමට 2015 දී රටේ ආර්ථික කඩා වැටී තිබු බවයි අගමැතිවරයා සඳහන් කළේ.
ගතවු වසර 3 තුන යහපාලන රජය විසින් ජනතාවට සහන ලබා දුන් බව කී අගමැතිවරයා රජයේ ඊළඟ අරමුණ වන්නේ කර්මාන්ත හා ව්‍යාපාර දියුණු කරමින් විදේශ විනිමය වැඩි කර, ලබාගෙන තිබෙන ණය අනාගත පරපුරට ගෙවීමට ඉඩ නොතබා, එය සම්පූර්ණයෙන්ම ගෙවා දමා රටේ සීඝ්‍ර සංවර්ධනයක් ඇති කිරීම බවයි අවධාරණය කරන්නේ.
Facebook Comments
