කොරෝනා වෛරසය හේතුවෙන් ඉතා හදිසි ප්‍රතිකාර හැර අනිකුත් සියලුම දෛනික පරීක්ෂා කිරීම් සහ යොදා ඇති හදිසි නොවන ශෛල්‍ය කර්ම තාවකාලිකව කල් දැමීමට ඉඩ ඇති බව ශ්‍රී ලංකා උගුර, කණ, නාසය සම්බන්ධ විශේෂඥ වෛද්‍යවරුන්ගේ සංගමය රෝගීන්ට දැනුම් දෙයි.
උගුර, කණ, නාසය (ENT) ආශ්‍රිත රෝගයක් විනිශ්චයට එම රෝගියාගේ උගුර, කණ ස්වර තන්ත්‍ර පරීක්ෂාව සහ එන්ඩොස් කොපි පරීක්ෂණ අවශ්‍ය වන අතර යම් ශල්‍ය කර්ම වලටද භාජනය කිරීමට සිදු වන බවයි එම සංගමය පවසන්නේ.
කොරෝනා වෛරසය ආසාදනය වී තිබුනත් තවමත් රෝග ලක්ෂණ පහල නොවු රෝගීන්ගෙන් එම වෛරසය ආසාදිත කෙල බිදිති හෝ ශ්‍රාවයන් මගින් පසහුවෙන්ම සෞඛ්‍ය සේවකයන් වෙත සම්ප්‍රේෂණය වීමට හැකි බව විද්‍යාත්මක පෙන්වා දී ඇතැයි පවසන ශ්‍රී ලංකා උගුර, කණ, නාසය සම්බන්ධ විශේෂඥ වෛද්‍යවරුන්ගේ සංගමයේ සභාපති විශේෂඥ වෛද්‍ය ඒ.ඩී.කේ. එස්.එන් යසවර්ධන අවධාරණය කර ඇත්තේ ඒ ඔස්සේ සෞඛ්‍ය සේවකයන් රෝගී වුවහොත් ඔවුනට නිරෝධායනයට ලක්වීමට සිදු වන බැවින් රෝහල් සම්පුර්ණ වශයෙන් වුවද වසා දැමීමට සිදු වන බවයි.
මීට අමතරව එම සෞඛ්‍ය සේවකයන්ගෙන් නිරෝගී මහජනතාවට ද එම රෝගය පැතිරීමට ඉඩ ඇති බව එම සංගමය නිවේදනයක් මගින් පෙන්වා දී තිබේ.
ලොව පුරා ඇති තම සංගමය වැනි සංගම් කිහිපයක් විසින් ද එවැනි නිර්දේශ ඉදිරිපත් කර ඇති බව පෙන්වා දෙන විශේෂඥ වෛද්‍ය ඒ.ඩී.කේ. එස්.එන් යසවර්ධන තව දුරටත් අවධාරණය කරන්නේ උගුර, කණ, නාසය සම්බන්ධයෙන් කිසියම් ගැටළුවක් ඇත්නම් අදාල වෛද්‍ය කණ්ඩායම් දුරකථන මාර්ගයෙන් අමතා උපදෙස් ලබා ගන්නා ලෙසයි.
වගකීම් සාහගත පුරවැසියන්ට
මෙවැනි තත්වයක් හමුවේ වගකීම් සහගත පුරවැසියන් ලෙස කළ හැකි කාර්යභාරයන් කිහිපයක් එම සංගමය පෙන්වා දෙයි.
1. මස්, මාළු ආහාරයට ගන්නේ නම් ඒවා තුළ ඇති කටු ඉවත්කර ඒවා උගුරේ හෝ ආහාර මාර්ගයේ නොරැදෙන ලෙස ප්‍රවේශමෙන් ආහාරයට ගැනීම (විශේෂයෙන්ම කුඩා දරුවන්ට ආහාර කැවීමේදී වැඩි පුර ප්‍රවේශම් විය යුතුය)
2.කුඩා දරුවන් ගැන විශේෂ අවධානයකින් සිටිය යුතුය. කුඩා දරුවන් සමහර විට බාහිර ද්‍රව්‍ය වන කුඩා සෙල්ලම් බඩු වල කොටස්, ප්ලාස්ටික්, පබළු, කාසි , කොණ්ඩ කටු සහ ඇට වර්ග කන්වල නාසයේ හෝ කට තුලට දමා ගැනීමට හෝ ගිලීමට හැකිය. එම නිසා දරුවන්ට සෙල්ලම් කිරීමට ඉහත ද්‍රව්‍ය නොදී සිටීමට වග බලා ගත යුතුය.
3.කුඩා රවුම් බැටරි වැනි දේවල් කිසියම් විටෙක දරුවාට ගත හැකි ස්ථානවල නොතැබිය යුතුය. මෙම කුඩා බැටරි දරුවාගේ ශරීරයට ඉතා අහිතකර අතර ශරීරයේ සියුම් පටක ඉක්මනින් විනාශ වේ.
4.අවුරුදු 3 ට අඩු දරුවන්ට ආහාර දීමේදී රටකජු හෝ එවැනි දරුවන්ට සැපීමට අපහසු තද ද්‍රව්‍ය නොදිය යුතුය. මෙවැනි තද ද්‍රව්‍ය ඉතා පහසුවෙන් දරුවන්ගේ ස්වසන මාර්ගයට ඇතුලු වී ජීවිත අවදානම් තත්වයට පත් විය හැකිය.
5.කෘතිම දත් පළදින්නේනම් එය ඉතා ප්‍රවේශමෙන් කළ යුතුය. හදිසියේ එම දත් ඇන්ද හෝ කොටසක් ගිලී යාම වැලැක්වීමට ප්‍රවේශම් විය යුතුය.
6.කිසියම් විටකදී හෝ පුළුන් කූරු, ආය කටු වැනි දේවල් වලින් කන පිරිසිදු කිරීම කිසිසේත්ම නොකළ යුතුය.මෙමගින් කන අභ්‍යන්තරයට හානි විය හැක.
7.දරුවන් සෙල්ලම් කිරීමේදී වැටීම්, තුවාල වීම් අවම කර ගැනීමට සැලකිලිමත් වන්න.
8.හදිසි අනතුරු අවම කරගැනීමට හැකි තරම් ප්‍රවේශම් විය යුතුය.
ඉහත හදිසි අනතුරු රෝගීන් රෝහලේදී පරීක්ෂාවේදී ප්‍රමාදවීම් වලට හා පෙර අවදානම් ඇගයීම් වලට භාජනය වීමට සිදු වන බැවින් මෙවැනි අනතුරු වලක්වා ගැනීම අතිශය වැදගත් බව විශේෂඥ වෛද්‍ය ඒ.ඩී.කේ. එස්.එන් යසවර්ධන සිය නිවේදනය මගින් පෙන්වා දී තිබේ.
Facebook Comments
