ජනාධිපති නීතිඥවරුන් පත් කිරීමට විරුද්ධව නඩුවක්

0

වත්මන් ජනාධිපතිවරයාගේ කාල සීමාව තුළ ජනාධිපති නිතිඥවරුන් පත් කිරීම නිසි ක්‍රමවේදයට සිදු නොවන බව පවසමින් නිතිඥයකු ඉහලම අධිකරණයට පැමිණිල්ලක් ගොනු කර තිබේ.

ප‍්‍රියන්ත ජයවර්ධන, එල්.ටී. බී.දෙහිදෙණිය සහ ප‍්‍රීති පද්මන් සූරසේන යන විනිසුරු තුන් කට්ටුව හමුවේ එම පෙත්සම කැඳවු අවස්ථාවේ උපදෙස් ලබා ගැනීමට තමන්ට කල් ලබා දෙන්නැයි නීතිපති වෙනුවෙන් පෙනී සිටි රජයේ නීතීඥවරයා කරන ලද ඉල්ලීම හේතුවෙන් ලබන 31 වැනිදා එය සළකා බැලීමට ශ්‍රේෂ්ඨාධිකරණය තීරණය කර ඇත.

නීතීඥ උපුල් කුමරප්පෙරුම විසින් ගොනු කරන ලද පෙත්සමේ වගඋත්තරකරුවන් වශයෙන් ජනාධිපති වෙනුවෙන් නීතිපත, ශ්‍රී ලංකා නීතීඥ සංගමයේ සභාපති, එහි ලේකම් සහ ජනාධිපති ලේකම්වරයා නම් කරනු ලැබ සිටිති.

2017 , 2018 සහ 2019 වසර වලදී පමණක් ජනාධිපති නීතිඥවරුන් 75 දෙනකු පත්කර ඇති බව පෙන්වා දෙන පෙත්සම්කරු ඔවුන් පත් කිරීමේදී පිළිගත් නිර්නායකයන් අනුගමනය කර නොමැති බවට සිය පෙත්සමෙන් චෝදනා කර සිටී.

ජනාධිපති නීතීඥවරුන් පත් කිරීමේදී වසර 25ක වෘත්තීය සේවා කාලය පැවතීම , නීතීඥ ක්ෂේත‍්‍රයට ඉටුකළ සේවය සළකා බැලීම සිදුවන බවයි පෙත්සම්කාර නීතීඥ උපුල් කුමරප්පෙරුම පෙන්වා දෙන්නේ.

එහෙත් පසුගිය කාලය පුරා ජනාධිපති නීතීඥවරුන් පත් කිරීමේ නිසි ක‍්‍රමවේදයකට අනුව සිදූවී නොමැති බවත් , මේ සම්බන්ධයෙන් තමන් ශ්‍රී ලංකා නීතීඥ සංගමයද දැනුවත් කළ බවද හෙතෙම කියා සිටී.

නිසි ක‍්‍රමවේදයකින් තොරව එලෙස ජනාධිපති නීතීඥවරුන් පත් කිරීමෙන් ආණ්ඩුක‍්‍රම ව්‍යවස්ථාව යටතේ ඇති 12.1 වගන්තිය යටතේ ඇති සිය මූලික අයිතිවාසිකම් උල්ලංඝණය වී ඇති බව පෙන්වා දෙන පෙත්සම්කරු සිය මූලික අයිතිවාසිකම් කඩවී ඇති බවට ප‍්‍රකාශයට පත් කර ජනාධිපති නීතීඥවරුන් පත් කිරීමේ නිර්නායකයන් හඳුන්වා දෙන ලෙසට සිය පෙත්සමෙන් වැඩි දුරටත් ඉල්ලා ඇත.

Facebook Comments

wedding people