පුරාවිද්‍යා උපදේශක භික්ෂුන් ගෙන් අගමැතිට “වැඩිම මනාප” ආශිර්වාදයක් (VIDEO)

0
161
Ivory Agency Sri Lanka
HailHost
wedding people

එක් ආගමකට අයත් පුජකයන් පමණක් ඇතුලත් කරමින් ජනාධිපතිවරයා පත්කළ පුරාවිද්‍යා කාර්ය සාධක බලකායකට විරෝධතා එල්ල වෙමින් තිබියදී, නැවත වතාවක් එයාකාරයේම සංයුතියකින් යුත් පුරාවිද්‍යා උපදේශක කමිටුවක් පත් කිරීමට අග්‍රාමාත්‍යවරයා ද ක්‍රියා කර තිබේ.

පුරාවිද්‍යා උරුමයන් ආරක්ෂා කිරීමේ අරමුණින් ජුලි 29 බදාදා පත් කරන ලද බව අග්‍රාමාත්‍ය කාර්යාලය පවසන උපදේශක කමිටුවේ නායක ස්වාමීන් වහන්සේ නමක් එහිදී දේශපාලන සෙත් පැතීමක් ද කරනු දැකගන්නට ලැබිණි.

නැගෙනහිර පළාතේ පුරාවිද්‍යා උරුමයන් කළමනාකරණය සඳහා ජනාධිපතිවරයා විසින් පසුගියදා පිහිටවු ජනාධිපති කාර්ය සාධක බලකායට ඇතුල් කරගෙන තිබුනේද බෞද්ධ නායකයන් පමණි.

වසර 35 ට වැඩි කාලයක් පුරා විද්‍යා උපදේශක සභාවේ සිටි තමන් අග්‍රාමාත්‍යවරයකු අතින් පත්වීම් ලිපි ලබා ගත් පළමු අවස්ථාව මේ යයි ප්‍රමෝදයට පත්ව සිටි එල්ලාවල මේධානන්ද හිමියෝ “කුරුණෑගල දිස්ත්‍රික්කයෙන් වැඩිම මනාප ලබා නැවත අගමැති තනතුරට පත්වීම” සඳහා ආශිර්වාදය ද පුද කළහ.

දිවයිනේ පුරාවිද්‍යාත්මක කටයුතු සම්බන්ධයෙන් විෂයභාර අමාත්‍යවරයාට උපදෙස් ලබා ගැනීම, විශේෂ ව්‍යාපෘති සඳහා උපදෙස් ලබා ගැනීම, ප්‍රතිපත්ති සම්පාදනය, පුරාවිද්‍යා ස්ථානීය නිරීක්ෂණ සහ සංවර්ධන කටයුතු ප්‍රවර්ධනය කිරීමට අවශ්‍ය සහාය ලබා ගැනීම අලුත් උපදේශක කමිටුව මගින් අපේක්ෂිත බව අග්‍රාමාත්‍ය කාර්යාලය පවසයි.

අස්ගිරි පාර්ශ්වයේ අනුනායක වෙඬරුවේ උපාලි, මැටරඹ හේමරතන, ආචාර්ය පල්ලේගම හේමරතන, එල්ලාවල මේධානන්ද, ඇලිකේවෙළ සීලානන්ද, යටිගල්ඔළුවේ විමලරතන, ආචාර්ය පහමුණේ ශ්‍රි සුමංගල, මහාචාර්ය ඉදුරාගාරේ ධම්මරතන, ආචාර්ය මාදුරුඔයේ දම්මිස්සර යන හිමිවරුන් එම කමිටුවේ සාමාජිකයෝ වෙති.

මීට අමතරව ආචාර්ය ශිරාන් දැරණියගල, මහාචාර්ය ටී.ජි. කුලතුංග, ආචාර්ය ගාමිණි විජේසුරිය, ජ්‍යෙෂ්ඨ මහාචාර්ය නිමල් ද සිල්වා, ඉංජිනේරු ගැමුණු සිල්වා, ජ්‍යෙෂ්ඨ මහාචාර්ය අනුර මනතුංග, වාස්තු විද්‍යාඥ ඈෂ්ලි ද වෝෂ්, ජ්‍යෙෂ්ඨ මහාචාර්ය රාජ් සෝමදේව, මහාචාර්ය මුනිදාස පත්මසිරි රණවීර, ඩබ්ලිව්. එම්. එස් වීරසේකර සහ සිරිනිමල් ලද්දුසිංහ මෙම උපදේශක කමිටුවේ සෙසු සාමාජිකයන්ය.

ශ්‍රී ලංකාවේ පුරා වස්තු ස්ථාන දෙලක්ෂ පනස්දහසකට වැඩි ප්‍රමාණයක් පවතින බව සිහිපත් කළ පුරා විද්‍යා චක්‍රවර්තී එල්ලාවල මේධානන්ද හිමියන් එහිදී වැඩි දුරටත් සඳහන් කළේ ඒ සියල්ල සම්බන්ධයෙන් මේ වන විට සංගණනයක් සිදු වන බවයි.

Facebook Comments

HailHost