ආණ්ඩුවට බලපෑම් කරන ලෙස ජාත්‍යන්තර බලවතුන්ට ඉල්ලීමක්

0
240
Ivory Agency Sri Lanka
HailHost
wedding people

වැඩි වෙමින් පවතින ශ්‍රී ලංකාවේ මානව හිමිකම් කෙලෙසීම් නවතා ගැනීම සඳහා මැදිහත් වන ලෙස ජාත්‍යන්තර මානව හිමිකම් සංවිධාන සමූහයක් එක්සත් ජාතීන්ගෙන් සහ ණය ලබා දෙන විදේශීය රටවලින් ඉල්ලා සිටී.

නීතිඥයන්, ක්‍රියාධාරීන්, මානව හිමිකම් ආරක්ෂකයන්, මාධ්‍යවේදීන් සහ අතීතයේ සිදු කරන ලද අපරාධ වල වින්දිතයන් ඉලක්ක කොටගෙන සිදුකරන බියවැද්දීම් හා තර්ජන අත් හිටුවන්නට ආණ්ඩුව පියවර ගත යුතුයැයි දැඩි ලෙස කියා සිටින ජාත්‍යන්තර මානව හිමිකම් සංවිධාන දහයක්, 2019 ජනාධිපතිවරණයේ සිට උත්සන්න වෙමින් පවත්නා බියගැන්වීමේ ක්‍රියාදාමය ඉදිරි පාර්ලිමේන්තු මැතිවරණය මත්තේ සෙවනැල්ලක් පතිත කර ඇති බවට අනතුරු අඟවයි.

ශ්‍රී ලංකාව පසුගිය කාල වකවානුව තුල මානව හිමිකම් ක්ෂේත්‍රයේ “බිඳෙන සුළු ප්‍රගතියක්” අත් කර ගන්නා ලදැයි විශ්වාසය පලකරන එම සංවිධාන සමූහය, ජනාධිපති, අගමැති වර්තමාන ආණ්ඩුවේ බොහොමයක් දෙනා යුද අපරාධ සම්බන්ධයෙන් චෝදනා ඇතියවුන් බවද සිහිපත් කර දෙයි. හමුදා නායකත්වයෙන් යුතුව ආණ්ඩුව විසින් පිහිටුවා ඇති කාර්ය සාධක බලකා රාජ්‍යය හමුදාකරණය කරා ගෙනයන බියජනක ප්‍රවනතාවක් ලෙස එමගින් අනතුරු අැගවීමක්ද කර තිබේ.

“සකල ශ්‍රී ලාංකිකයන්ගේ මානව හිමිකම් වලට ගෞරවය, ආරක්ෂාව හා පූර්ණත්වය සලසා දෙන ලෙසත්, විශේෂයෙන්ම මෑත අවුරුදු වලදී මානව හිමිකම් ආරක්ෂා කිරීම සම්බන්ධයෙන් අත් කරගත් බිඳෙන සුළු ප්‍රගතිය ආපස්සට හැරවීම නවතා දමන ලෙසත් එක්සත් ජාතීන්ගේ සංවිධානය මෙන්ම ශ්‍රී ලංකාවේ හවුල්කරුවන් හා විදේශීය ආධාර දෙන්නන් වහාම ඉල්ලා සිටිය යුතුයැ,” යි ජාත්‍යන්තර සංවිධාන විසින් ජූලි 29 දා නිකුත් කරන ලද ඒකාබද්ධ නිවේදනය පවසා සිටී.

රට තුල ක්‍රියාත්මක වන රාජ්‍ය නොවන සංවිධාන විමර්ශනයට ලක් කිරීමට අගමැති මහින්ද රාජපක්ෂ විසින් කර ඇති යෝජනාවක් කෙරේ සිය අවධානය යොමුකරන ජාත්‍යන්තර සංවිධාන සමූහය, උතුරු නැගෙනහිර සංවිධාන සම්බන්ධයෙන් දැනටම ක්‍රියාවේ යොදවා ඇති එම සැලසුම් නිර්ලජ්ජිත ඒවා ලෙසින් හෙලා දැක තිබේ.

“2019 නොවැම්බර් මාසයේ ජනාධිපතිවරණයෙන් පසු ගතවූ මාස කිහිපය තුලදී බුද්ධි අංශ නිලධාරීන් විශේෂයෙන්ම, දිවයිනේ යුද පීඩිත උතුරු නැගෙනහිර පළාත් වල පිහිටි සංවිධාන ඇතුළු සංවිධාන ගණනාවකටම පැමිණ කාර්ය මණ්ඩල, වැඩ සටහන් සහ ලැබෙන ආධාර පිලිබඳ විස්තර විමසූ බව වාර්තාවී තිබේ. එසේ පැමිණීම ශ්‍රී ලංකාවේ සිවිල් සමාජය හිරිහැරයට හා බියට පත් කිරීමට ගන්නා නිර්ලජ්ජිත උත්සාහයකි.”

හිරිහැරයට, බියවැද්දීමට, තර්ජනයට සහ අත් අඩංගුවට පත් වී සිටින මානව හිමිකම් වෙනුවෙන් පෙනී සිටින සිංහල, දෙමළ හා මුස්ලිම් නීතිඥයන් මෙන්ම මාධ්‍යවේදීන්ද කිහිප දෙනකු නමින් සඳහන් කරමින් ජගත් අවධානයට යොමු කර ඇති ජාත්‍යන්තර නිවේදනය ත්‍රස්තවාදය වැළක්වීමේ පනත යටතේ රඳවාගෙන සිටින නීතිඥ හිජාස් හිස්බුල්ලා සහ සිවිල් හා දේශපාලන අයිතිවාසිකම් පිළිබඳ ජාත්‍යන්තර ප්‍රඥප්තිය (ICCPR) උපයෝගී කරගෙන සිරගත කර සිටින රම්සි රසීක් ලේඛකයා වහාම නිදහස් කරන ලෙස රජයට බලකර සිටී.

ශ්‍රී ලංකාවේ මානව හිමිකම් වෙනුවෙන් පෙනී සිටීමට ඉඩකඩ සැලසීමට සුදුසු වාතාවරණයක් තහවුරු කිරීම ආණ්ඩුව විසින් දිගින් දිගටම ප්‍රතික්ෂේප කිරීම නිසා ජාත්‍යන්තර සහාය ඉල්ලා සිටීමට පෙළඹුණු බව මානව හිමිකම් සංවිධාන 10 විසින් ප්‍රකාශයට පත් කරන ලද නිවේදනය දැඩි ලෙස අවධාරණය කරයි.

පහත දැක්වෙන සංවිධාන නිවේදනයට අත්සන් තබා ඇත.

Amnesty International

CIVICUS: World Alliance for Citizen Participation

FIDH, in the framework of the Observatory for the Protection of Human Rights Defenders

Asian Forum for Human Rights and Development (FORUM-ASIA)

Front Line Defenders

Human Rights Watch

International Commission of Jurists

International Service for Human Rights

Reporters Without Borders

South Asians for Human Rights

World Organisation Against Torture (OMCT), in the framework of the Observatory for the Protection of Human Rights Defenders

Facebook Comments

HailHost