වත්මන් ආණ්ඩුව සිදුකළැයි කියන විශාලම දූෂණ හා වංචා දහයක් හෙවත් “ටොප් ටෙන්” පිළිබඳ පරීක්ෂණ පැවැත්වීමට අදාළ ලිපි ගොනු ඒකාබද්ධ විපක්ෂයේ මන්ත්‍රී පිරිසක් අද (09) අල්ලස් හෝ දුෂණ චෝදනා විමර්ශන කොමිසමට භාරදෙනු ලැබුවා.
වසර එකහමාරක කාලයක් තුළ යහපාලන රජයේ අගමැති ඇතුළු මැති ඇමතිවරුන් සිදු කරනු ලැබු වංචා දුෂණ සම්බන්ධයෙන් මෙම ලිපි ගොණු සමන්විත බවයි ඔවුන් පවසන්නේ.
පසුගිය සතියේ අග්‍රාමාත්‍යවරයාට එරෙහිව පැමිණිලි කළ බවත්, මේ ආකාරයට දූෂිත ලැයිස්තුවේ ඉහළම 10 දෙනා ගැන විටෙන් විට පැමිණිලි කරන බවයි ඒකාබද්ධ විපක්ෂ මන්ත්‍රී කණ්ඩායම මෙහිදී පවසා සිටියේ.
රවී ඉහළින්ම
මෙම ලිපි ගොණුවේ වැඩිම චෝදනා ප්‍රමාණයක් ඇත්තේ මුදල් අමාත්‍ය රවී කරුණානායකට බවයි ඔවුන් පවසන්නේ.
මුදල් ඇමතිවරයාට එරෙහිව චෝදනා 12ක් පවත්නා බවත්, අද දිනයේ එයින් චෝදනා 3ක් සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාවට පැමිණිලි ඉදිරිපත් කර ඇත.
නියමිත බදු මුදල් නොගෙවා රේගුව හරහා ප්‍රා‍ඩෝ වර්ගයේ මෝටර් රථ 800ක් සහ බෙන්ස් වර්ගයේ මෝටර් රථ 900ක් නිදහස් කිරීම, මුදල් අමාත්‍යවරයාගේ දියණියට අයත් යයි සැලකෙන “ග්ලෝබල් පාර්ක්”සමාගමට ඇපකරයක් නොමැතිව ගුදමක් ලබාදීම,රවී කරුණානායක අධ්‍යක්ෂ ධූරයක් දරන ලද සිංගප්පූරු සමාගමක ප්‍රධාන පරිපාලන නිලධාරියාට කොළඹ හිල්ටන් හෝටලයේ නවාතැන් ගැනීමට පහසුකම් සලසාදී ඔහුගේ සියලු වියදම් මුදල් අමාත්‍යංශයේ මහජන මුදලින් ගෙවීමට කටයුතු කිරීම යන චෝදනා යටතේ අද දින පැමිණීලි ඉදිරිපත් කර තිබේ.
ගෙවුණු කාලය තුළ මේ ආණ්ඩුවේ මැති ඇමතිවරුන්ගේ දූෂිත ක්‍රියා හේතුවෙන් රජයට පාඩුවී ඇති මුදල්වල වටිනාකම රු.බිලියන 32ක් පමණ වන බවත්, එයින් මේවන විට කරන ලද පැමිණිලි සමග අගමැතිවරයා රු.බිලියන 15ක්ද, රවී කරුණානායක බිලියන 10ක වංචාවක්ද කර ඇති බව පෙන්වාදෙන මන්ත්‍රීවරුන් අවධාරණය කර සිටියේ ඉදිරියේදී තවත් මෙවැනි වංචා හෙළිදරව් කරන බවයි.
Facebook Comments
