අතුරුදහන් වුවන් සඳහා වන කාර්යාලය (OMP) ප්‍රදේශිය මට්ටමෙන් කාර්යාල දොළහක් පිහිටුවීමට තීරණය කර ඇති බව එහි සභාපතිවරයා පවසයි.
ප්‍රාදේශීය කාර්යාලවලින් පහක් උතුරු පළාත තුළ ද තුනක් නැගෙනහිර පළාත තුළ ද ස්ථාපිත කිරීමට සැලසුම් කර ඇති බව පවසන කාර්යාලයේ සභාපති ජනාධිපති නීතීඥ සාලිය පීරිස් අනෙක් කාර්යාල හතර සෙසු පළාත්වල ස්ථාපිත කිරීමට සැලසුම් කර ඇති බවයි පෙන්වා දෙන්නේ.
එම ප්‍රාදේශීය කාර්යාල සඳහා නව කාර්යය මණ්ඩලයක් බඳවා ගැනීමට ද නියමිත බව සභාපතිවරයා මාධ්‍ය වෙත කියා සිටියේය.
අතුරුදන්වූ පුද්ගලයින්ට සහන නිර්දේශ කිරිම සහ අසාධාරණයට ලක්වූ පවුල් වෙත සිද්ධීන් විමර්ශනය කර දැනුවත් කිරීම OMP කාර්යාලයේ ප්‍රධාන වගකීම බව ජනාධිපති නීතීඥ සාලිය පීරිස් පෙන්වා දුනි.
විමර්ශනයක් නැහැ
යුද්ධයට පෙර සහ පසු කාලවල අතුරුදන්වූවන් සම්බන්ධ පැමිණිලි 13,000ක් පමණ ග්‍රාමනිලධාරීන් වෙත ලැබී ඇති අතර එල්.එල්.ආර්.සී. පිටිපන සහ මනෝරි මුත්තෙට්ටුවේගම යන කොමිෂන් සභා වාර්තා අනුව ඒවා පිළිබඳ සොයා බැලීමේ කටයුතු අතුරුදන්වුවන්ගේ කාර්යාලය ආරම්භ කර තිබෙන බව සභාපතිවරයා මාධ්‍ය වෙත ප්‍රකාශ කර සිටියේය.
ශිෂ්ට සම්පන්න රටක අතුරුදන්වීම් හෝ අතුරුදන් කිරීම් සිදුනොවිය යුතු අතර අතුරුදන්වූවන්ගේ අවසන් ලැයිස්තුව සකස් කිරීමට පියවර ගන්නා බව සභාපතිවරයා පවසයි.
යළිත් රට තුළ අතුරුදන් කිරීම් ඇති නොවීම සඳහා නිර්දේශ ඉදිරිපත් කිරීම පමණක් අතුරුදහන් වුවන් සඳහා වන කාර්යාලය වගකීම බවත් දඞුවම් ලබාදීම සඳහා විමර්ශනයක් සිදුනොකරන බව ජනාධිපති නීතීඥ සාලිය පීරිස් වැඩි දුරටත් අවධාරණය කළේය.
Facebook Comments
