රාජපක්ෂ පාලන සමයේ මිග් ගණුදෙනුව ඇතුළු බරපතල වංචා රැසකට සම්බන්ධ බවට සැක කෙරන උදයංග වීරතුංග සහ යහපාලන රජයේ ක්‍රිස්තියානු කටයුතු හා සංචාරක සංවර්ධන නියෝජ්‍ය අමාත්‍ය අරුන්දික ප්‍රනාන්දු අතර ජපානයේ සිදුවු හමුව සම්බන්ධව බුද්ධි අංශ විසින් ජනාධිපතිවරයා වෙත වාර්තා කර තිබේ.
හිටපු ජනපති මහින්ද රාජපක්ෂ සමඟ අරුන්දික ඇමතිවරයා ජපානයේ සංචාරයක නිරතව සිටන සංචාරය අතුරතුර මෙම හමුව සිදුව ඇති බව වාර්තා කරන බුද්ධි අංශ සංචාරය සඳහා පහසුකම් සපයා ඇත්තේ අරුන්දික ඇමතිවරයාට මෙන්ම හිටපු ජනාධිපතිවරයාට සමීප කෝටිපති ව්‍යාපාරිකයන් පිරිසක් බවද කියා සිටි.
පසුගිය පාලන සමයේ සිදුවු බරපතල ගණයේ වංචා හා දුෂණ සම්බන්ධයෙක් උදංයග වීරතුංග සැකකරුවෙක් ලෙස පොලිසිය අධිකරණයට දන්වා ඇති අතර ඔහු සිටින ස්ථානයක් සොයා ගැනීමට නොහැකි වී ඇති බවට අධිකරණයට වාර්තා කර තිබුණි.
ජනපතිගේ හොඳ හිත
කෙසේ වෙතත් මේ සම්බන්ධව සිලෝන් ජර්නල්ස් වෙත අදහසක් දක්වමින් නම සඳහන් කිරීමට අකමැති වු පුත්තලම් දිස්ත්‍රික්කයේ ආණ්ඩු පක්ෂ මන්ත්‍රීවරයෙක් කියා සිටියේ අරුන්දික ප්‍රනාන්දු ඇතුළු ශ්‍රීලනිපයේ පිරිසක් ජනාධිපතිවරයාගේ හොඳ හිත පාවිච්චි කරමින් නැවත රාජපක්ෂ පාලනයක් ගෙන ඒමේ කුමන්ත්‍රණයක නිරත වන බවයි.
යහපාලන රජයේ සිටිමින් රාජපක්ෂවරුන් ආරක්ෂා කිරීමට උත්සාහ කරන බවට අරුන්දික ඇමතිවරයා සම්බන්ධව මීට පෙරද ජනාධිපතිවරයාට පැමිණිලි ලැබී ඇති බව කී මන්ත්‍රීවරයා ඉදිරි මාස කිහිපයක තුලදී ඒ සම්බන්ධව ජනාධිපතිවරයා දැඩී තීරණයක් ගනු ඇති බවට විශ්වාසය පල කළේය.
උදයංග හා අරුන්දික හමුවට පෙර හිටපු ජනාපති පාර්ලිමේන්තු මන්ත්‍රී මහින්ද රාජපක්ෂ සහ ඇමති අරුන්දික අතර සිදු වු හමුව සම්බන්ධව සිලෝන් ජර්නල්ස් වාර්තා කල නමුත් එම හමු වලදී සාකච්ඡා වු දෑ සම්බන්ධව මෙතෙක් අනාවරණය වී නොමැත.
පසුගිය රාජපක්ෂ පාලන සමයේ පැහැරගෙන ගොස් අතුරුදහන් කරන ලද මාධ්‍යවේදී ප්‍රගීත් එක්නැලිගොඩ ප්‍රංශයේදී මුණ ගැසුන බවට ව්‍යාජ තොරතුරු සපයා පරික්ෂණ යට ගැසීමේ උත්සාහයක යෙදුනේ අරුන්දික ප්‍රනාන්දු ඇමතිවරයාය.
Facebook Comments
