යාපනයට එන ජනාධිපතිට එරෙහි විරෝධතාවට උසාවිය හරස් නොවෙයි

ජනාධිපතිවරයා නව වසරේ පළමු මස අවසන් දිනයේ උතුරේ සංචාරයක යෙදෙනවිට පැවැත්වීමට සුදානම් කොට ඇති බවට සැකකෙරෙන විරෝධතා තහනම් කරන ලෙස පොලිසිය සිදු කළ ඉල්ලීම අධිකරණය විසින් ප්‍රතික්ෂේප කර තිබේ.

යාපනයේ දිස්ත්‍රික් ලේකම් කාර්යාලයේ ජනවාරි 31 දා පැවැත්වෙන දිස්ත්‍රික් සම්බන්ධිකරණ කමිටු රැස්වීමට ජනාධිපති අනුර කුමාර දිසානායක සහභාගී විමට නියමිතව ඇත.

එදින විරෝධතා දියත් කිරීමට සුදානම් වන බවට පොලීසිය නම් කළ පිරිසට යාපනය මහේස්ත්‍රාත් ඒ ආනන්ද රාජා නියෝග කර ඇත්තේ ජනාධිපතිවරයා එන මාර්ගය අවහිර නොවන අයුරින් උද්ඝෝෂණ දියත් කිරීමටයි.

1979 අංක 15 දරන අපරාධ නඩු විධාන සංග්‍රහයේ 106 ( 1) ( 2) ( 3) වගන්ති යටතේ යාපනය පොලීසිය ජනවාරි 29 වැනිදා මහේස්ත්‍රාත් අධිකරණයෙන් කළ ඉල්ලීමට ප්‍රතිචාර දක්වමින් පොලීසිය විසින් නම් කර තිබු දෙමළ ජනතා නියෝජිතයෙකු ඇතුළු දෙමළ ක්‍රියාධාරීන් පිරිසක අධිකරණය නියෝග කර තිබුනේ ඔවුන්ගේ කරුණු දැක්වීමට 30 වැනි බ්‍රහස්පතින්දා අධිකරණය හමුවේ පෙනී සිටින ලෙසයි.

ඒ අනුව යාපනය දිස්ත්‍රික් පාර්ලිමේන්තු මන්ත්‍රී වෛද්‍ය රාමනාදන් අර්ජුනා, උතුරු පළාතේ රැකියා විරහිත උපාධිධාරීන්ගේ සංගමයේ නායක සර්වානන්ද ශිවම් සශිකරන්, විරෝධතා කණ්ඩායමේ යාපනය දිස්ත්‍රික් නායක පෝන්රාජ් ප්‍රේම් ඩග්ලස් ප්‍රභාකරන්, අනියම් සෞඛ්‍ය නිලධාරී සංගමයේ නායිකා එස්. ජස්මින්, `හඬක් නැතිවුන්ගේ හඬ`සංවිධානයේ නායක මුරුගයියා කෝමගන් අධිකරණය හමුවේ පෙනී සිට තිබේ.

උතුරු පළාතේ රැකියා විරහිත උපාධිධාරීන්ගේ සංගමය වෙනුවෙන් පෙනී සිටි යාපනයේ හිටපු නගරාධිපතිවරයකුද වන නීතිඥ විශ්වලිංගම් මනිවන්නන් අධිකරණ කටයුතු නිමා වීමෙන් පසුව මාධ්‍යවේදීන්ට දැනුම් දී සිටියේ පොලිසිය ඉල්ලා සිටි තහනම් නියෝගය ලබා දීම මහේස්ත්‍රාත් ඒ ආනන්ද රාජා විසින් ප්‍රතික්ෂේප කරන ලද බවයි.

“අධි ආරක්‍ෂිත කලාප ප්‍රදේශයට යන්නේ නැතුව, ජනාධිපතිවරයා එන මාර්ගය අවහිර නොකර, පාර හරස් කරලා බාධා කරන්නේ නැතුව සාමකාමි විදිහට උද්ඝෝෂණ කරන්න අධිකරණය අනුමැතිය දිලා තියනවා. පොලීසිය ඉල්ලා සිටි තහනම් නියෝගය ලබා දීම ප්‍රතික්ෂේප කරලා තියනවා.”

රැකියා විරහිත උපාධිධාරීන්ගේ සංගමය සැලසුම් කළ පරිදි විරෝධතාවය දියත් කිරීමේ සුදානමත් නීතිඥවරයා එහිදී හෙළි කළේය.

“රැකියා විරහිත උපාධිධාරීන්ගේ සංගමය වෙනුවෙන් අපි, අපේ ඉල්ලීම ඉදිරිපත් කරමින් උද්ඝෝෂණයක් කරන්න සුදානම් වෙමින් ඉන්නවා. ඒ සඳහා අවසර දිය යුතුයි. මෙම තහනම් නියෝගය ලබා නොදෙන ලෙස අපි ඉල්ලීමක් කරා. එය පදනම් කරගෙන අධිකරණය අපගේ ඉල්ලීම සලකා බලා නියෝග නිකුත් කරා.”

නීතිඥ විශ්වලිංගම් මනිවන්නන් එහිදී තව දුරටත් පවසා තිබුනේ සාමකාමී ලෙස විරෝධතා දියත් කිරීම ඔවුන්ගේ අයිතියක් බවයි.

“රැකියා විරහිත උපාධිධාරීන් තමන්ගේ ඉල්ලීම ඉදිරිපත් කරලා සාමකාමී ලෙස ආරක්ෂාවට තර්ජනයක් නොවන විදිහට කිසිවෙකුට බාධා නොවන විදිහට අපේ ඉල්ලීම් ඉදිරිපත් කරන්නට කැමතියි. ඒකට අනුමැතිය ලබා දිය යුතුයි. ඒක අපේ අයිතියක්.”

ආණ්ඩුවට එරෙහිව පවත්වන විරෝධතාවලට තමන් හරස්වන්නේ නැති බව බලයට පත්වීමට පෙර වීදි සටන් කිරීමේ දීර්ඝ ඉතිහාසයක් ඇති පක්ෂ නායකයකු වන ජනාධිපතිවරයා ප්‍රසිද්ධියේ ප්‍රකාශ කර ඇත.