මැති ඇමැතිවරුන්ගේ වැටුප් වැඩි කිරීමට ගෙන එන ලද යෝජනාවට විරෝධය දක්වා ඇති ජනාධිපතිවරයා “සත පහක් වැඩි කරන්න දෙන්නෙ නැහැ මං” යනුවෙන් දැඩිව කියා තිබේ.
පසුගිය සතිය වන විට මැති ඇමති වැටුප් වැඩි කිරීම ගැන යෝජනා කළ අයෙකු නැතිව පුවත් පළව තිබූ නමුත් සති අන්තය වන විට පක්ෂ නායකයින් අතර එකඟතාවක් මත වැටුප් වැඩි කිරීමට සූදානම් වන බව පුවත්පත් වල පල වී තිබු බවට ජනපති මෛත්‍රීපාල සිරිසේන කියා සිටියේය.
“ඊයේ පත්තර බලනකොට ඒකට අයිතිකාරයෙක් හිටියෙ නැහැ. අද පත්තර බලන කොට පේනවා අයිතිකාරයෙක් ඉන්නවා. කියල තියෙනවා අපේ හිතවත් ඇමැතිතුමෙක් පක්ෂ නායක ඔක්කෝම එකට එකතු වෙලා තීන්දුවක් ගත්ත කියල පඩි වැඩි කරන්න. සත පහක් වැඩි කරන්න දෙන්නෙ නැහැ මං.” යැයි ජනපති පැවසීය.
මෙය මැති ඇමැති වරුන්ගේ වැටුප් වැඩිකරන කාලයක් නොවේ යැයි ද 2015 සිට මැති ඇමති වැටුප් සහ දීමනා අවස්ථා කීපයක් වැඩි කර තිබෙන බව ද පිබිදෙමු පොලොන්නරුව දිස්ත්‍රික් සංවර්ධන වැඩ සටහන යටතේ පොලොන්නරුව නගරයේ ඉදිකල නව වෙළද සංකීර්ණය විවෘත කිරීමෙන් අනතුරුව පැවති ජන හමුව දී ජනාධිපතිවරයා පෙන්වා දුනි.
කැබිනට් මණ්ඩලයේ දී එම තීන්දුව සම්මත කර ගැනීමට ඉඩ නොතබන බව ජනාධිපති මෛත්‍රීපාල සිරිසේන වැඩි දුරටත් අවධාරණය කළේය.
Facebook Comments
