රතු මුහුදට යුද නැව් යැවීම ‘නොබැඳි පිළිවෙත උල්ලංඝනයක්’

නොබැඳි ජාතීන්ගේ රාජ්‍ය නායක සමුළුවට සහභාගී වීමට සුදානම්ව සිටින ශ්‍රී ලංකාවේ ජනාධිපතිවරයා එහි මුලධර්මයන්ට පටහැනිව කටයුතු කර ඇති බවට දෙමළ ජනතා නියෝජිතයකුගේ දෝෂ දර්ශනයට ලක්ව සිටී.

ජනාධිපතිවරයා නොබැදි ප්‍රතිපත්තිවල සිටීම අගය කරන ඉලංකෙයි තමිල් අරසු කච්චි පාර්ලිමේන්තු මන්ත්‍රී නීතිඥ එම්.ඒ සුමන්තිරන් පවසන්නේ රනිල් වික්‍රමසිංහ ජනාධිපතිවරයා එම මුලධර්මයට පටහැනිව පාර්ලිමේන්තුවේ හෝ අවසරයකින් තොරව රතු මුහුදට ශ්‍රී ලංකා නාවික හමුදාවේ සහාය ලබා දීමට තිරණය කර ඇති බවයි.

එම තීරණය හෙලා දකින දෙමළ ජනතා නියෝජිතයා අනතුරු අගවන්නේ ජනාධිපතිවරයාගේ මෙම තිරණය නිසා රටට විශාල බාධාවක් ද එල්ල විය හැකි බවයි.

“මේක නොබැඳි ප්‍රතිපත්තියක් නෙමෙයි. මේ තීන්දුව නිසා රටට ලොකු අපකීර්තියක් බාධාවක් එනවා.”

2024 වසරේ ජනවාරි 3 වැනිදා පෙරවරුවේ කොළඹ සිරිමාවෝ බණ්ඩාරනායක අනුස්මරණ ප්‍රදර්ශන මධ්‍යස්ථානයේදී පැවැති “ශිල්ප අභිමානී 2023” ජනාධිපති හස්ත කර්මාන්ත සම්මාන උළෙල අමතමින් ශ්‍රී ලංකා නාවික හමුදාවේ නැවක් රතු මුහුදට යැවිමේ සුදානම ජනාධිපති රනිල් වික්‍රමසිංහ මුල් වරට ප්‍රකාශ කර තිබුනි.

“දැනටමත් රතු මුහුදේ හූතී කණ්ඩාම් නැව්වලට ප්‍රහාර එල්ල කිරීම නිසා නැව් ගමනා ගමනය නැවති තිබෙනවා. මෙම නැව් රතු මුහුදෙන් එන්නේ නැතිව දකුණු අප්‍රිකාව වටේ ගමන් කළහොත් එයින් බඩු මිල ඉහළ යනවා. එම නිසා හූති වැඩකටයුතුවලට විරුද්ධව ශ්‍රී ලංකා නාවික හමුදාවේ නැවක් රතු මුහුදට යවා එහි ආරක්ෂාවට සහාය දීමට අප එකඟ වී තිබෙනවා.”

යේමනයේ ෂියා මුස්ලිම් සුළුතරයක් වන සයිඩි උප නිකායට අයත් සන්නද්ධ කණ්ඩායමක් වන හූතී කැරලිකරුවන් ගේ නිල නාමය අන්සාර් අල්ලාහ් ය. ඊශ්‍රායල් විරෝධී ඔවුන් ප්‍රසිද්ධියට පත්වීම ආරම්භ වූයේ අනූව දශකයේදීය.

නාවික හමුදාවේ නැවක් සති දෙකක කාලයක් සදහා රතු මුහුදේ රැදවීම වෙනුවෙන් මිලියන 250ක් වැනි වියදමක් දරන්නට සිදු වන බවද ජනාධිපතිවරයා පවසා තිබේ.

අගනගරයේ මාධ්‍යවේදීන් සිදු කළ විමසීමකට පිළිතුරු දෙමින් නාවික හමුදාවේ මාධ්‍ය අධ්‍යක්ෂක කැප්ටන් ගයාන් වික්‍රමසුරිය සදහන් කළේ රතු මුහුද ප්‍රදේශය බලා යාත්‍රා කිරීමට නාවික හමුදාවේ නෞකාවන් සුදානමින් සිටින නමුත් එම දිනය තවමත් නිශ්චිතව තීරණය කර නොමැති බවයි.

එම්. ඒ සුමන්තරන් මන්ත්‍රීවරයා අවධාරණය කරන්නේ ශ්‍රී ලංකාව සෘජුවම නොබැදි (Non-Aligned) මුලධර්ම රැකිය යුතු බවයි.

විදේශීය සංචාරයක් සදහා මේ වන විටත් රටින් බැහැරව සිටින ශ්‍රී ලංකාවේ ජනාධිපති රනිල් වික්‍රමසිංහ උගන්ඩාවේ පැවැත්වෙන නොබැඳි ජාතීන්ගේ 19 වැනි රාජ්‍ය නායක සමුළුවට සහභාගී වීමට නියමිත බව ජනමාධ්‍ය වාර්තා කර තිබේ.

එම රාජ්‍ය නායක සමුළුව ජනවාරි මස 23 හා 24 දිනවල කම්පාලා නුවර දී පැවැත්වීමට නියමිත බව එම වාර්තා වල වැඩිදුරටත් සඳහන්ය.