ආණ්ඩුක‍්‍රම ව්‍යවස්ථාවේ 19 වන සංශෝධනයට අනුව මීළග ජනාධිපතිවරණයකින් පසු ජනාධිපතිවරයාගේ බලතල ඉතා සීමිත වන අතර රටේ ප‍්‍රධාන තනතුර වන්නේ අග‍්‍රාමාත්‍ය ධුරය බැවින් දේශපාලන ක්ෂේත‍්‍රයේ සියලු දෙනාගේ සංවාදයට සහ සාකච්ඡාවට ලක්විය යුත්තේ මීළග ජනාධිපතිවරණයක් පිළිබඳව නොව රටට හොද අග‍්‍රාමාත්‍යවරයෙක් තෝරා පත් කර ගැනීම පිළිබඳව බව ජනාධිපතිවරයා පවසයි.
පුද්ගලයින් වටා ගොඩනැගෙන දේශපාලන ව්‍යාපාර තාවකාලික වන අතර රටට අවශ්‍ය වන්නේ දර්ශනයක් සහ දැක්මත් සහිත දේශපාලන ව්‍යාපාරයක් බව ජනාධිපති මෛත්‍රීපාල සරිසේන 08 සෙනසුරාදා නිවිතිගල මහජන පොළ භූමියේ පැවති නිවිතිගල ශ‍්‍රී ලංකා නිදහස් පක්ෂ මධ්‍යම බල මණ්ඩල රැස්වීම අමතමින් පැවසීය.
තමන් පිළිබඳ කුමන විවේචන ඉදිරිපත් කරමින්, දේශපාලන වශයෙන් ප‍්‍රතිවාදින් කුමන අන්දමින් පහර දුන්න ද එම කිසිවෙකු ඉටු නොකළ වැඩ කොටසක් තමා රට වෙනුවෙන් ඉටුකර තිබෙන බවයි ජනාධිපතිවරයා පෙන්වා දෙන්නේ.
ලොව කිසිදු නායකයෙකු නොකළ අන්දමින් විධායක ජනාධිපති ධූරය සතු අසීමිත බලතල පාර්ලිමේන්තුවට පවරාදෙමින් රටේ ප‍්‍රජාතන්ත‍්‍රවාදය ශක්තිමත් කරමින් පොඩි මිනිසාට ද ඉහළට යා හැකි පසුබිම තමා විසින් නිර්මාණය කරදුන් බව ද ජනපති කියා සිටියේය.
අපි නැතුව බැහැ
ජනාධිපතිවරණයක් පිළිබද අනවශ්‍ය උණුසුමක් රට තුළ ඇති කර තිබෙන බව සඳහන් කරන ජනාධිපතිතුමා ඉතා ඉක්මණින් ජනාධිපතිවරණයක් ලබාදෙන බවට ඇතැමුන් ප‍්‍රකාශ නිකුත් කළත් නියමිත කාලයට පෙර ජනාධිපතිවරණයක් පැවැත්වීමට තමාගේ කිසිදු සූදානමක් නොමැති බව අවධාරණය කළේය.
පොදුජන පෙරමුණත්, එක්සත් ජාතික පක්ෂයත් දේශපාලන වශයෙන් අධි තක්සේරුවකට පත්ව ඇත්නම් එය ඔවුන් වරද්දා ගන්නා තැනක් බව කී ජනපති ඔවුන් කිසිවෙකුට ශ‍්‍රී ලංකා නිදහස් පක්ෂයේ සහය නොමැතිව තනිව ආණ්ඩුවක් ගොඩැනැගිය නොහැකි බව සිහිතබා ගත යුතු බව ද වැඩි දුරටත් පැවසීය.
Facebook Comments
