ජනපතිවරණයට එන බවට කරූ ඉඟි පළ කරයි

0

ජනාධිපතිවරණයට ඉදිරිපත් වන ලෙස ලැබී ඇති ඉල්ලීම් සලකා බලා තමා ඒ සඳහා ඉදිරිපත් වන්නේ නම් එසේ සිදු කරන්නේ විධායක ජනාධිපතිධූරය අහෝසි කිරීමේ අරමුණින් පමණක් බවට කතානායකවරයා නිවේදනය කර තිබේ.

ඉදිරි ජනපතිවරණයට තමන් ඉදිරිපත් වන්නේ නම් එය එක්සත් ජාතික පක්ෂයේ ව්‍යවස්ථාව අනුව සිදුකරන බවත් එය නිශ්චිත කාලසීමාවක් වෙනුවෙන් කරන කැප කිරීමක් බවයි කරූ ජයසුරිය පවසන්නේ.

“ජනාධිපතිවරණයට ඉදිරිපත් වන ලෙස ලැබී ඇති කවර ඉල්ලිමක් වුවද මා හට සලකා බැලිය හැක්කේ, “ 1995 වසරේ සිට අප අඛණ්ඩව පෙනී සිටි විධායක ජනාධිපති ධූරය අහෝසි කරලීමේ පරමාර්ථය මුඛ්‍ය අරමුණ කොටගත් දේශපාලන බලවේග සමඟ එක්ව පමණි.” යැයි ඔහු නිකුත් කළ නිවේදනයේ දැක්වේ.

19 වන සංශෝධනය මඟින් තහවුරු කළ දියුණු ප්‍රශස්ත ප්‍රජාතන්ත්‍රවාදි ප්‍රතිසංස්කරණ වෙනුවෙන් පෙනී සිටින පාර්ශවයන් සමඟ පමණක් තමන් ජනපතිවරණයට ඉදිරිපත් වීමට සුදානම් බව ද කතානායක කරූ ජයසුරිය කියා සිටී.

“එය දියුණු ප්‍රජාතන්ත්‍රවාදයක් සහිත ආර්ථික හා සදාචාරාත්මක වශයෙන් ශක්තිමත් සුරක්ෂිත දේශයක් උදෙසා පදනම සැකසීම පිණිස යම් නිශ්චිත සීමිත කාලයක් සඳහා කරනු ලබන කැපවීමක් මිස කිසිවිටකත් ජනාධිපති තනතුර අපේක්ෂාවෙන් කරන මැදහත්විමක් නොවන බවද අවධාරණය ‍කරමි.”

යහපාලන රජය බිහි කිරීමට උර දුන් සිවිල් සංවිධානය විසින් ඉදිරි ජනපතිවරණයට ඉදිරිපත් වන ලෙසට කතානායක කරූ ජයසුරියගෙන් පසුගියදා ඉල්ලීමක් කර තිබුනි.

Facebook Comments

wedding people